ކުރީގެ ރައީސް އިބްރާހިމް ނާސިރުގެ ބޮޑުވަޒީރު ކަމުގައި ދެކުނުގެ ތިން އަތޮޅުގައި އުފެއްދި ސުވާދީބު ދައުލަތުގެ ވެރިޔާ އަބްދުﷲ އަފީފު ދީދީގެ ނަމުގައި އައްޑޫގައި އީޖާދީ ވިސްނުންތައް އުފަންކުރާ ގައުމީ ފެންވަރުގެ މަރުކަޒެއް ހެދުމަށް ޕީއެންސީގެ "ދަ ގްރޭޓާ އައްޑޫ"ގެ ތަސައްވުރު ނުވަތަ މެނިފެސްޓޯގައި ހިމަނައިފި އެވެ.
ކުރިއަށް އޮތް ލޯކަލް ކައުންސިލް އިންތިހާބުގެ ކެމްޕެއިނަށް ޕީއެންސީން މިރޭ އާޓިފިޝަލް ބީޗުގައި ބޭއްވި "ދަ ގްރޭޓާ އައްޑޫ އިވެންޓު"ގައި ވަނީ މި ސަރުކާރުން އައްޑު އަށް ގެންގުޅޭ ބޮޑު ތަސައްވުރު އިފްތިތާހުކޮށްފަ އެވެ.
އެ ތަސައްވުރު އެކުލެވިގެންވަނީ މައިގަނޑު ހަ އަސާސެއްގެ މައްޗަށެވެ. އެއީ؛
- އައްޑޫގެ އަމިއްލަވަންތަކަން ހިމާޔަތްކުރުމާ އެކު އިލްމީ ދިރާސާތަކަށް ހާއްސަ މަރުކަޒެއް ގާއިމްކުރުން
-
އައްޑޫއަކީ ޓޫރިސްޓުންނަށް ހަމައެކަނި މަޑުކޮށްލާ މަރުކަޒެއްގެ ބަދަލުގައި އެ ސިޓީގެ މުއްސަނދިކަން ތަޖުރިބާކޮށް ބަލައިލާ ފަދަ ތަނަކަށް ހެދުން.
-
ޓޫރިޒަމްގެ ދާއިރާގެ ފަންނީ ވަޒީފާތައް އައްޑުއަށް ގެންދިއުން.
-
ރަށުން ބޭރުގައި ދިރިއުޅޭ އައްޑޫ ރައްޔިތުންނާ އޮންނަ ގުޅުން ހަރުދަނާކޮށް، އައްޑޫގެ އިލްމީ ގާބިލްކަން އިތުރުކުރުން.
-
އައްޑޫއަކީ އިންވެސްޓަރުންނަށް ފަހި، އީޖާދީ ވިސްނުންތަކާ ޒުވާނުންގެ ބައިވެރިވުން އިސްކުރާ ތަނަކަށް ހެދުން.
-
އިންޑިއާ ކަނޑުގެ ދަތުރުފަތުރާއި ވިޔަފާރިގެ މަރުކަޒެއްގެ ގޮތުގައި އައްޑޫ ބައްޓަންކޮށް، މުސްތަގުބަލަށް ތައްޔާރުވުން.
ޕީއެންސީގެ އައްޑޫ މެނިފެސްޓޯގައި ބުނީ އައްޑޫގެ ތާރީހު ރައްކާކުރާނެ ހާއްސަ މަރުކަޒަކާއި ދިރާސާތައް ކުރާނެ މަރުކަޒެއް ދުވަހަކު ވެސް ވުޖޫދުވެފައި ނެތް ކަމަށެވެ. އެހެންވެ، އައްޑޫގެ މާޒީ އާއި މުސްތަގުބަލު ގުޅުވައިދޭ ފަދަ އިލްމީ ބިނާއެއް ވުޖޫދަށް ގެނައުމަކީ އެ މެނިފެސްޓޯގެ މަގުސަދެއް ކަމަށް ބުންޏެވެ.
ސުވަދީބް ދާރުލް އާސާރައި އަފީފް އީޖާދީ މަރުކަޒުގެ ބޭނުމަކީ އެއް ފުރާޅެއްގެ ދަށުން އައްޑޫގެ ތާރީހާއި ތަރިކަ ރައްކާކޮށް، އެ މަސައްކަތުން ހާސިލްކުރެވޭ އިބުރަތްތަކަށް ފިކުރުކޮށް، ނަޒަރު ހިންގައިގެން ކުރިމަގު ބައްޓަންކުރަން ޖާގަދޭނެ، އީޖާދީ ވިސްނުން އުފަންކުރުވާނެ ގައުމީ ފެންވަރުގެ މުއައްސަސާއެއް އުފެއްދުން ކަމަށް އެ މެނިފެސްޓޯގައިވެ އެވެ.
އަފީފް އީޖާދީ މަރުކަޒު
- ވިޔަފާރި އާއި ޓޫރިޒަމް ސިންދަފާތު ކުރުން.
- ޒުވާނުން ވަޒީފާ އާއި ތައުލީމާއި ސިއްހަތާއި ކަސްރަތާ ގުޅޭ ދިރާސާތައް ކުރުން.
- ތިމާވެށި ހިމާޔަތްކުރުމާއި ދެމެހެއްޓެނިވި ތަރައްގީ އަދި ދުޅަހެޔޮ ދިރިއުޅުމުގެ ސިޔާސަތުތައް ދިރާސާ ކުރުން.
- އުމްރާނީ ތަރައްގީގެ ސިޔާސަތުތައް ދެނެގަނެ ދިރާސާއަށް ބިނާކޮށް ތަރައްގީގެ މަޝްރޫއުތައް ރޭވުން.
- ސަގާފީ ތަރިކަ ލިޔެކިޔުމުން ރައްކާތެރިކުރުމާއި އަރުޝީފުކުރުން.
ޕީއެންސީގެ މެނިފެސްޓޯގައި ބުނީ އެ މަރުކަޒުގެ މަސައްކަތްތައް ކުރިއަށް ގެންދާނީ، ދެމެހެއްޓެނިވި އަދި އުފެއްދުންތެރި ގޮތުގައި ވިލަރެސްކުރާނެ ސަރުކާރުގެ މިނިސްޓްރީތަކާއި ކަމާ ބެހޭ އިދާރާތަކާއި މުއައްސަސާތަކާއި އިލްމުވެރިންނާއި ފަންނީ މާހިރުންނާއި ވިޔަފާރިވެރިން އަދި އާންމުންގެ ހިޔާލައި މަޝްވަރާ ހޯދައިގެން ކަމަށެވެ.
މުޅި އައްޑޫގައި ފަސޭހައިން ދަތުރުފަތުކުރެވޭނެ ނިޒާމެއް ގާއިމްކުރުމާއި ދެކުނުގެ އަތޮޅުތައް ގުޅުވާލައިދޭ ޓޫރިޒަމްގެ ވިއުގާއެއް އައްޑޫގައި ގާއިމްކުރުމާއި ޓޫރިސްޓުންނަށް މަރުހަބާ ކިޔުމަށް އެކި ކަހަލަ ފެސިލިޓީތަކާއި އެހީތެރިކަން ދޭ މޭޒަކާއި ގާއިމްކުރުމާއި ރަށު ޓޫރިޒަމްގެ އިގްތިސާދީ ވިއުގާއެއް ގާއިމްކުރުން އެ މެނިފެސްޓޯގައިވެ އެވެ.
އެ މެނިފެސްޓޯގައި ވަނީ އައްޑޫގައި ބިޒްނަސް ޕާކެއް ހެދުމާއި ސަރުކާރުން އެކި ދާއިރާތަކުން އެހީތެރިކަން ފޯރުކޮށްދީގެން އައްޑޫ މީހުން އަނބުރާ ރަށަށް ގެންދިއުމަށް ގެންގުޅޭ ހާއްސަ ތަސައްވުރަކާއި ޓެކްގެ ދާއިރާ ފުޅާކުރުމަށް އައްޑޫ އޯޕަން ސިޓީ ފްލެޓްފޯމެއް ހެދުމަށް ހިމަނާފައިވެ އެވެ.
އިމްޕޯޓް އެކްސްޕޯޓުގެ ދާއިރާ ފުޅާކުރުމަށް "އައްޑޫ ކޮރިޑޯ ޑެސްކެއް" ހެދުމާއި ކޯލްޑް ސްޓޯރޭޖް ކެޕޭސިޓީ ވަރުގަދަކުރުމަށް "ކޮރިޑޯ ޒޯން"އެއް ހެދުމާއި ކޮންސިއުލާ އަދި ބައިނަލްއަގުވާމީ ވިޔަފާރިތަކަށް ދޮރު ހުޅުވާލުމާއި ވިޔަފާރިގެ އެކި ދާއިރާތަކުން ހުނަރުވެރިން ބިނާކުރުން ވެސް އެ މެނިފޯސްޓޯގައިވެ އެވެ.