ލާމަރުކަޒީ ނިޒާމެއް ހިންގުމުގެ އެންމެ ރަނގަޅު މިސާލު ދެއްކެވި ވެރިޔަކީ ރައީސް އަދި މާލޭގެ ކުރީގެ މޭޔަރު ޑރ. މުހައްމަދު މުއިއްޒު ކަމަށް ފޮރިން މިނިސްޓަރު ޑރ. އަބްދުﷲ ހަލީލް ރޭ ވިދާޅުވެއްޖެ އެވެ.
ޕީއެންސީގެ ގަލޮޅު އުތުރު ދާއިރާގެ ޖަގަހަ ހުޅުވުމަށް ބޭއްވި ޖަލްސާގައި ހަލީލް ވިދާޅުވީ ރައީސް މުއިއްޒު ސިލްސިލާކޮށް މާލޭގައި ބޭއްވެވި ރައްޔިތުންގެ ބައްދަލުވުންތަކުގައި ރޭގަނޑު 8:30 އިން ފެށިގެން ފަތިހު 4:30 އަށް ހަމައަށް އާންމުންގެ ހިޔާލުތައް އަޑުއެއްސެވުމަށް ހޭދަކުރެއްވި ކަމަށެވެ. ރައްޔިތުންނާ އެކު، އެހާ ގިނަ ވަގުތު ހޭދަކުރައްވަން ކެރިވަޑައިގެންނެވި އެހެން ވެރިޔަކު އަދި ނެތް ކަމަށް އޭނާ ވިދާޅުވި އެވެ.
ހަލީލް ވިދާޅުވީ ހަގީގީ ލާމަރުކަޒީ ނިޒާމަކީ ރައްޔިތުންނާ ކައިރިން ހިދުމަތްތައް ދިނުމާއި ރައްޔިތުންގެ ކައިރިއަށް ގޮސް އެމީހުންގެ ވާހަކަތައް އަޑުއެހުން ކަމަށެވެ. މި ނިޒާމުގައި ރައްޔިތުން ބާރުވެރިކުރެވޭނީ ރައްޔިތުންނާ އެކު ވެރިން ވަގުތު ހޭދަކޮށްގެން ކަމަށް އޭނާ ވިދާޅުވި އެވެ.
"މިއަދުގެ ރައީސުލްޖުމްހޫރިއްޔާ އެމަނިކުފާނު އެ ކުރައްވާ މަސައްކަތްޕުޅަކީ ރައްޔިތުންނާ ކައިރިއަށް ވަޑައިގެން ރައްޔިތުންގެ އަޑުއައްސަވައިގެން އެ އަޑާ އެއްގޮތަށް ރައްޔިތުން ބޭނުންވާ ހިދުމަތްތައް ފޯރުކޮށްދިނުމުގެ މަސައްކަތްޕުޅު އެ ކުރައްވަނީ،" ހަލީލް ވިދާޅުވި އެވެ.
"ހަމައެކަނި މިގޮތަށް ރައްޔިތުންނާ ޖަލްސާއެއްގައި ބައްދަލުކުރައްވަނީއެއް ނޫން، ކޮޅަށް ހުންނަވައިގެން ކޮންމެ ރައްޔިތެއްގެ އަޑު އަޑުއައްސަވައި، އަމިއްލަފުޅަށް ނޯޓުކުރައްވައި، ރައީސް އޮފީހުގައި ރެކޯޑް ކުރައްވައިފައި، އަޅުގަނޑުމެންނަށް ވެސް ފޮނުއްވާ. އަޅުގަނޑުމެން އެެއަށް ޖަވާބު ދޭތޯ ވެސް ރައީސް ބައްލަވާ."
ހަލީލް ވިދާޅުވި ގޮތުގައި، ރައީސް މުއިއްޒު ރައްޔިތުންނާ ކައިރިއަށް ވަޑައިގަންނަވަނީ ވެސް ރައްޔިތުން ބޭނުންވާ ކަންކަން އަމިއްލަފުޅަށް ވެސް ހޯއްދަވައި، އެ މުތާލިއާކުރައްވައިގެން ކަމަށެވެ.
"މިއީ ދައުލަތެއް ހިނގަމުންދާއިރު، ލާމަރުކަޒު ކުރާއިރުގައި، އެންމެ ބޮޑަށް ވިސްނަން ޖެހޭ ކަމަކީ. އެ ސަރުކާރުން ރައްޔިތުންނާ ހިސާބަށް، ރައްޔިތުންގެ އަޑުހަނީ ކިހާ މިންވަރަކަށްތޯ،" އޭނާ ވިދާޅުވި އެވެ.
ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ކޮމިޓީތަކުގެ އިންތިހާބުގައި ޕީއެންސީގެ ފަރާތުން ވާދަކުރައްވާ ކެންޑިޑޭޓުންނަކީ ރައީސް މުއިއްޒު ހިންގަވާ މަގުން ކުރިއަށް ވަޑައިގަންނަވާނެ ބޭފުޅުން ކަމާ މެދުގައި އެއްވެސް ޝައްކެތް ނެތް ކަމަށް ހަލީލް ވިދާޅުވި އެވެ.
"މުޅި ލާމަރުކަޒީ ނިޒާމު އެމަނިކުފާނު ބައްޓަން ކުރައްވަމުން އެ ގެންދަވަނީ ލާމަރުކަޒު ކުރުމުގެ އެންމެ ވަރުގަދަ ނިޒާމަކަށް،" ހަލީލް ވިދާޅުވި އެވެ.
ހަލީލް ވިދާޅުވި ގޮތުގައި، ރައީސް މުއިއްޒު ވެރިކަމަށް ވަޑައިގެން ލާމަރުކަޒުކުރުމަށް ކުރެއްވި އެންމެ މުހިންމު އެއް ކަމަކީ ހަވާސާއިން ބޭރުގައި، އާރެއް ބާރެއް ނެތި މީގެ ކުރިން އޮތް އަންހެނުންގެ ކޮމިޓީތަކަށް ހެޔޮ ބަދަލެއް ގެެނެސްދެއްވުމެވެ. އެ ކޮމިޓީގެ ރައީސާއަކީ ގާނޫނީ ގޮތުން ފުލް-ޓައިމް ވަޒީފާއަކަށް ހައްދަވައި، ބޮޑު މުސާރައެއް ލިބޭ ގޮތަށް ހެއްދެވީ އަންހެނުން ބާރުވެރިކުރުމުގެ ބޭނުމުގަ އެވެ.
ރައީސް އެކަން ކުރެއްވީ ރާއްޖޭގެ އާބާދީގެ ގާތްގަނޑަކަށް 50 ޕަސެންޓަކީ އަންހެނުންނަށް ވާތީ ކަމަށް ވެސް ހަލީލް ވިދާޅުވި އެވެ.
ހަލީލް ވިދާޅުވީ ކުރީގެ ސަރުކާރުތަކުން ލާމަރުކަޒު ކުރުމުގެ ބޮޑެތި އޮޅުވާލުންތައް ހިންގާފައިވާ ކަމަށެވެ.
ކައުންސިލްތަކަށް ބަޖެޓު ދޫނުކުރާ ކަމަށް ބުނެ އެއްވެސް ކަމެއް ނުކޮށްދީ ތިބުމާއި ސަރުކާރަށް އެއްބާރުލުން ނުދީ، ކައުންސިލްތަކުގެ މަސައްކަތްތައް ހުއްޓުވައިގެން ތިބިތަން މީގެ ކުރިން ފެނިފައިވާ ވާތީ، ސަރުކާރާ އެއްކޮޅު ކައުންސިލެއް ހުރިހާ ރަށެއްގައި އޮތުމަކީ ރައްޔިތުންގެ ކުރިއެރުމަށް ވަރަށް މުހިންމު ކަމެއް ކަމަށް އޭނާ ވިދާޅުވި އެވެ.