އިންގްލެންޑުގެ ހުރިހާ ސްކޫލެއްގައި ވެސް ސަރުކާރުގެ ގައިޑްލައިންތަކާ އެއްގޮތަށް އަމަލުކޮށް، ސްކޫލް ދުވަސްތަކުގައި ދަރިވަރުން އެއްގޮތަކަށް ވެސް ފޯނުން ބޭނުން ނުކުރާކަން ކަށަވަރުކުރަން ޖެހޭނެ ކަމަށް އެޑިއުކޭޝަން ސެކްރެޓަރީ ބްރިޖެޓް ފިލިޕްސަން ވިދާޅުވެއްޖެ އެވެ.
"ކަލްކިއުލޭޓަރުގެ ގޮތުގައި ފޯނު ބޭނުންކުރުމަކީ ރަނގަޅު ގޮތެއް ނޫނެވެ. އަދި ރިސާޗްގެ ބޭނުމަށާއި ކްލާހުގެ ހުސް ވަގުތާއި ލަންޗް ގަޑީގައި ވެސް ފޯނު ބޭނުންކުރުމަކީ އެދެވިގެންވާ ކަމެއް ނޫނެވެ." ސްކޫލްތަކަށް ފިލިޕްސަން ފޮނުއްވި ސިޓީއަކާ ހަވާލާދީ ބީބީސީން ބުންޏެވެ.
އެ ސިޓީގައި ބުނެފައިވަނީ އޮފީސް ފޯ ސްޓޭންޑަޑްސް އިން އެޑިއުކޭޝަން، ޗިލްރެންސް ސާވިސަސް އެންޑް ސްކިލްސް (އޮފްސްޓެޑް) އިން ކުރިއަށް އޮތް ތަނުގައި ސްކޫލުތަކުން މޮބައިލް ފޯން ޕޮލިސީތައް ތަންފީޒުކުރާ ގޮތް އިންސްޕެކްޓް ކުރާނެ ކަމަށެވެ. އަދި ޓީޗަރުން ވެސް ދަރިވަރުންގެ ކުރިމަތީގައި ފޯނު ބޭނުން ނުކުރުމަށް ވެސް ނަސޭހަތްތެރިވާނެ ކަމަށް އޭނާ ވިދާޅުވި އެވެ.
އެކަމަކު ހެޑް ޓީޗަރުންގެ ޔޫނިއަން އަކުން ވަނީ ސްކޫލުތަކުގެ މޮބައިލް ފޯން ޕޮލިސީތައް "ޕޮލިސް" ކުރުމަށް އޮފްސްޓެޑް ބޭނުންކުރުމަކީ މާނައެއް ނެތް އަދި ބޭކާރު ކަމެއްގެ ގޮތުގައި ސިފަކޮށް ފާޑުކިޔައިފަ އެވެ.
ސްކޫލްތަކުގައި ފޯނު ބޭނުންކުރުމުގެ ގައިޑްލައިނެއް އެންމެ ފުރަތަަމަ އިންގްލެންޑުގައި ކަނޑައެޅީ ކޮންޒަވެޓިވް ޕާޓީގެ ސަރުކާރުން ފެބްރުއަރީ 2024 ގަ އެވެ. އެކަމަކު މިހާރުގެ ސަރުކާރުން ބުނެފައި ވަނީ ކުރީ ސަރުކާރުގެ ގައިޑްލައިންގައި ސްކޫލްތަކުން އަމަލުކުރަންވީ ގޮތް ސާފުކޮށް ބަޔާންކޮށްފައި ނެތް ކަމަށެވެ.
ސްކޫލްތަކުގައި ފޯނު ބޭނުންކުރުން މަނާކުރުމާ ބެހޭ ގޮތުން ފިލިޕްސަން ސިޓީ ފޮނުއްވާފައި މި ވަނީ އިނގިރޭސިވިލާތުގައި 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރުމާ ގުޅޭ ގޮތުން ތިން މަސް ދުވަހުގެ މަޝްވަރާތަކެއް ކުރިއަށް ގެންދަން ނިންމައި އެކަން އިއުލާނުކުރިތާ ހަފްތާއެއް ފަހުންނެވެ.