އިންޑިއާ އާއި ޔޫރަޕިއަން ޔުނިއަންއާ ދެމެދު ވިޔަފާރީގެ ދާއިރާއިން ބޮޑެތި އެއްބަސްވުންތަކެއް ހަދައި މިއީ އެއްބަސްވުންތަކުގެ "މަންމަ އެއްބަސްވުން" ކަމަށް ބުނެފި އެވެ.
މިއީ ވިއްސަކަށް އަހަރުގެ މަޝްވަރާތަކަށް ފަހު ދެ ބިލިއަނެއްހާ މީހުންގެ އާބާދީ ގުޅުވާލަދޭނެ މާކެޓެއް އުފެދިގެން ދިއުން ކަމަށް ވަނީ ބުނެފަ އެވެ.
އީޔޫގެ ވެރިންނާއި އިންޑިއާގެ ބޮޑުވަޒީރު ނަރެންދުރަ މޯދީ ގަބޫލުކުރައްވާ ގޮތުގައި މި އެއްބަސްވުމަކީ އެންމެ ބޮޑެތި އިގްތިސާދުތައް ކަމަށްވާ އެމެރިކާ އާއި ޗައިނާގެ ފަރާތުން ކުރިމަތިވެދާނެ އިގްތިސާދީ ގޮންޖެހުންތަކުން ދިފާއުކޮށްދޭނެ އައްޑަނައަކަށް ވާނެ އެވެ.
މި އެއްބަސްވުމުގެ ސަބަބުން ޔޫރަޕްގެ އެކްސްޕޯޓްގެ 97 ޕަސެންޓް އެކްސްޕޯޓުން ނަގާ ޓެރިފް ކުޑަވެ ނުވަތަ އެއްކޮށް އުނިވެގެން ދާނެ އެވެ. އަދި މިކަމުގެ ސަބަބުން އީޔޫއަށް އަހަރަކު ހަތަރު ބިލިއަން ޔޫރޯ (4.75 ބިލިއަން ޑޮލަރު) ޑިއުޓީން ސަލާމަތް ކުރެވޭނެ ކަމަށް އެ އިއްތިހާދުން ބުންޏެވެ.
"[މިއީ] ހުރިހާ ޑީލްތަކެއްގެ މަންމަ،" ކަމަށް ޔޫރަޕިއަން ކޮމިޝަންގެ ރައީސް އުރުސުލާ ވޮން ޑަ ލެޔެން އާއި ޔޫރަޕިއަން ކައުންސިލްގެ ރައީސް އެންޓޯނިއޯ ކޮސްޓާއާ ބައްދަލު ކުރައްވައި މޯދީ ވިދާޅުވި އެވެ.
"މި އެއްބަސްވުމުގެ ސަބަބުން އިންޑިއާގެ 1.4 ބިލިއަން ރައްޔިތުންނަށާއި އީޔޫގެ އެތައް މިލިއަން ބަޔަކަށް ގިނަ ފުރުސަތުތަކެއް ލިބިގެންދާނެ،" މިއީ ދުނިޔޭގެ ޖީޑީޕީގެ 25 ޕަސެންޓް ނުވަތަ މުޅި ދުނިޔޭގެ ވިޔަފާރީގެ ތިން ބައިކުޅަ އެއް ބައިކަން ފާހަގަކުރައްވަމުން މޯދީ ވިދާޅުވި އެވެ.
އީޔޫ އިން ދެކޭ ގޮތުގައި ދުނިޔޭގެ އެންމެ ބޮޑު އާބާދީ ކަމަށްވާ އިންޑިއާ އަކީ މުސްތަގުބަލުގައި މުހިންމު މާކެޓަކަށް ވާނެ އެވެ.
އިންޑިއާގެ ޖުމްހޫރީ ދުވަހުގެ ރަސްމިއްޔާތުގެ ޝަރަފުވެރި މެހެމާނުންގެ ގޮތުގައި ލެޔެން އާއި ކޮސްޓާ ބައިވެރިވެ ވަޑައިގަތުމަށް ފަހު ނެރުއްވި ބަޔާނެއްގައި ވިދާޅުވީ ޔޫރަޕާއި އިންޑިއާ މިއަދު ތާރީހުގައި ލިޔެވިގެންދާނެ ކަމަށެވެ.
"އަޅުގަނޑުމެން މި ގާއިމުކުރީ ދެ ބިލިއަން މީހުން ހިމެނޭ މިނިވަން ވިޔަފާރީގެ މައިދާނެއް. މިކަމުން ދެ ގައުމުގެ ވެސް އާންމުންނަށް ފައިދާތައް ކުރާނެ،" ބަޔާނުގައިވެ އެވެ.
އީޔޫގެ ތަފާސް ހިސާބުތައް ދައްކާ ގޮތުން 2024 ވަނަ އަހަރު މުދަލުގެ ވިޔަފާރި 120 ބިލިއަން ޔޫރޯ (139 ބިލިއަން ޑޮލަރު) އަށް އަރާފައިވާ އިރު، މިއީ ފާއިތުވި 10 އަހަރު އާ އަޅާބަލާއިރު 90 ޕަސެންޓް އިތުރު އަދަދެކެވެ.
އީޔޫގެ ތަފާސް ހިސާބުތައް ދައްކާ ގޮތުން 2024 ވަނަ އަހަރު މުދަލުގެ ވިޔަފާރި 120 ބިލިއަން ޔޫރޯ (139 ބިލިއަން ޑޮލަރު) އަށް އަރާފައިވާ އިރު، މިއީ ފާއިތުވި 10 އަހަރު އާ އަޅާބަލާއިރު 90 ޕަސެންޓް އިތުރު އަދަދެކެވެ.
މި އެއްބަސްވުމުގެ ދަށުން ޔޫރަޕްގެ ކުންފުނިތަކަށް އިންޑިއާގެ މާކެޓުން ފުރުސަތުތައް ފަސޭހަކޮށްދޭނެ އެވެ.