ރާއްޖޭގެ ކަނޑުގެ އަޑިން ތެލާއި މިނެރަލް ހޯދުމުގެ މަސައްކަތް ކުރުމަކީ ތިމާވެއްޓަށް ގެއްލުންވާނެ ބޮޑު ގޯހެއް ކަމަށް ކުރީގެ އެންވަޔަރަމެންޓް މިނިސްޓަރު އައިޝަތު ޝައުނާ ވިދާޅުވެއްޖެ އެވެ.
ސްޕެޝަލް އިކޮނޮމިކް ޒޯން(އެސްއީޒެޑް)ގައި ކުރެވޭ އެ ބާވަތުގެ މަސައްކަތްތައް ހިމަނުއްވައި ރައީސް ޑރ. މުހައްމަދު މުއިއްޒު ނެރުއްވި ގަރާރަށް އިސްލާހު ގެނެސް އިއްޔެ ވަނީ ތެލާއި ގޭހާއި މިނެރަލް އެކްސްޕްލޮރޭޝަން މަސައްކަތްތައް ހިމަނުއްވައިފަ އެވެ.
އެކަމާ ގުޅިގެން ޝައުނާ އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ ކަނޑު މައިންކޮށްގެން ތެލާއި މިނަރަލް ހޯދޭ ގޮތަށް ގާނޫނު ބަދަލުކުރުމަކީ ވަރަށް ބޮޑު ކަންބޮޑުވުމެއް ކަމަށާއި އެއީ ކުރު ރާސްތާގެ ފައިދާއަކަށް ވިސްނައި، ހަދާ ވަރަށް ބޮޑު ގޯހެއް ކަމަށެވެ.
"މީގެ ގެއްލުން މެރިން ބައޮޑައިވަސިޓީއަށް ކުރާނެ. ރާއްޖޭގެ މަސް ކަނޑުތައް ހަލާކުވެގެންދާނެ، އަދި ރާއްޖޭގެ ޓޫރިޒަމްގެ އަގު ވެއްޓިގެންދާނެ،" ކުރީގެ މިނިސްޓަރު ވިދާޅުވި އެވެ.
ރާއްޖޭން ތެޔޮ ފެނޭތޯ ބެލުމަށް ކުރީގެ ރައީސް އަބްދުﷲ ޔާމީންގެ ވެރިކަމުގައި ދިރާސާއެއް ކުރި ނަމަވެސް އެ މަސައްކަތް ކާމިޔާބުވެފައެއް ނުވެ އެވެ. ނަމަވެސް ރާއްޖޭން މިނެރަލްއެއް ފެނޭތޯ މީގެ ކުރިން މަސައްކަތެއް ކުރިކަމެއް އެނގޭކަށް ނެތެވެ.
އެސްއީޒެޑްގައި ހިންގޭނެ މަސައްކަތްތައް ކަނޑައެޅުއްވުމުގެ އިތުރުން އެފަދަ މަސައްކަތްތަކަށް އެންމެ ކުޑަކޮށް އިންވެސްޓްކުރެެވޭނެ މިންވަރު ވެސް ކަނޑައަޅުއްވަނީ ރައީސެވެ. މިިދިޔަ އަހަރު ނެރުއްވި ގަރާރާއި އިއްޔެ ނެރުއްވި ގަރާރުގައި ވެސް ސަސްޓެއިނަބުލް ޓައުންޝިޕް ތަރައްގީކުރުން ފިޔަވައި އެހެން މަަސައްކަތްތަކަށް އެންމެ ކުޑަކޮށް އިންވެސްޓްކުރެވޭނެ މިންވަރުގެ ގޮތުގައި އޮތީ 100 މިލިއަން ޑޮލަރެވެ.
ސަސްޓެއިނަބުލް ޓައުންޝިޕަށް އިންވެސްޓްކުރެވޭނެ އެންމެ ކުޑަ މިންވަރަކީ 500 މިލިއަން ޑޮލަރު ކަމަށް ކަނޑައަޅާފައިވާއިރު، އޭގެ މަޝްރޫއުއެއް މިހާރު ވަނީ ފަށައިފަ އެވެ.