މާލޭގެ ރައްޔިތުންނާއި މާލޭގައި ދިރިއުޅޭ ރައްޔިތުންނަށް ސަރުކާރުން ހުޅުވާލާފައިވާ ބޯހިޔާވަހިކަމުގެ މަޝްރޫއުގެ ޝަރުތުތައް ކަނޑައެޅުމާއި އެ މަޝްރޫއު ކުރިއަށް ގެންދިއުމާ ގުޅޭ ގޮތުން މާލެ ސިޓީ ކައުންސިލާ މަޝްވަރާކުރަން އެ ކައުންސިލްގައި ތިއްބަވާ އެމްޑީޕީގެ ދެ މެމްބަރަކު ގޮވާލައްވައިފި އެވެ.
ކައުންސިލްގައި ތިއްބަވާ އެމްޑީޕީގެ ތިން މެމްބަރުން ތެރެއިން ގަލޮޅު އުތުރު ދާއިރާގެ މުހައްމަދު ސައިފް ފާތިހާއި ގަލޮޅު ހުޅަނގު ދާއިރާގެ މެމްބަރު މަރިޔަމް ނާޒިމާ މުހައްމަދު ފާއިޒް، މޭޔަރު އާދަމް އާޒިމަށް ހުށަހެޅުއްވި ސިޓީއެއްގައި އެ ކަންބޮޑުވުން ފާޅުކުރައްވައި ވިދާޅުވީ، ސަރުކާރުގެ ބޯހިޔާވަހި ކަމުގައި ކައުންސިލްގެ ޒިންމާއެއް އޮންނާނެ ކަމަށެވެ.
މާލެ ސިޓީ ކައުންސިލުން މިއަދަށް ތާވަލްކުރި ބައްދަލުވުމަށް އެޖެންޑާ ކުރަން ހުށަހެޅި އެ ސިޓީގައި ވަނީ ބޯހިޔާވަހި ކަމުގެ ޝަރުތުތަކާ ގުޅޭގޮތުން ކައުންސިލާ އެއްވެސް މަޝްވަރާއެއް ކޮށްފައި ނުވާ ކަމަށެވެ. ކައުންސިލްގެ ހައުސިން ކޮމިޓީ އާއި ސަރުކާރުގެ ބޯހިޔާވަހިކަމުގެ ކޮމިޓީން ވެސް އެއްވެސް މަޝްވަރާއެއް ނުކުރާ ކަމަށް އެ ސިޓީގައިވެ އެވެ.
އެ މެންބަރުން ވިދާޅުވީ މާލެ އިން ދޫކުރާ ބޯހިޔާވަހި ކަމަށް ކައުންސިލްގެ ދައުރު ފުރިހަމައަ ށް އޮންނަން ޖެހޭ ކަމަށް މާލޭގެ މޭޔަރު ކަމުގައި ރައީސް ޑރ. މުހައްމަދު މުއިއްޒު ހުންނެވިއިރު ވިދާޅުވަމުން ގެންދެވި ކަމަށެވެ. އެހެންވެ ބޯހިޔާވަހި ކަމުގެ ކަންކަމުގައި ކައުންސިލާ މަޝްވަރާތައް ކުރުމަށާއި ބައިވެރި ކުރުމަށް އެ ދެ މެމްބަރުން އެދިވަޑައިގަތެވެ.
އެފަދަ ކަންކަމަކީ އާންމުންނާ ގުޅުން ހުރި މައްސަލައަކަށް ވާތީއާ އެކު، ސައިފް އާއި ނާޒިމާ މިއަދުގެ ޖަލްސާ އަށް ހުށަހަޅަން އެޖެންޑާ ކޮށްފައި ވަނީ، ބޯހިޔާވަހިކަމުގެ ޝަރުތަށް ބަދަލު ގެންނަންވީ ގޮތުގެ ލަފާދީ، އެ ބަދަލުތައް ގެނައުމަށް ސަރުކާރަށް ގޮވާލުމަށެވެ.
މިއަދުގެ ބައްދަލުވުމަށް އެ މައްސަލަ ތާވަލްކުރި ނަމަވެސް ކޯރަމް ހަމަނުވާތީ ޖަލްސާ ކެންސަލްކުރީ އެވެ. މޭޔަރު އާޒިމް ރިޔާސަތު ބެލެހެއްޓެވި މިއަދުގެ ޖަލްސާއަށް ހާޒިރުވީ 18 ކައުންސިލަރުންގެ ތެރެއިން އެންމެ 9 ކައުންސިލަރުންނެވެ.
މާލެ ސިޓީ ކައުންސިލްގައި މިހާރު ތިއްބަވާ 18 މެމްބަރުންގެ ތެރެއިން 14 މެމްބަރުންނަކީ ސަރުކާރު ހިންގާ ޕާޓީ، ޕީއެންސީގެ މެމްބަރުންނެވެ.
އެ މައްސަލައިގެ އިތުރުން ރައީސް މުއިއްޒު މާލޭގެ މޭޔަރަކަށް ހުންނެވިއިރު، އެކި ފަރާތްތަކަށް ދޫކޮށްފައިވާ މާލޭގެ ބިންތަކުގެ މައްސަލަ އާއި މާލޭ މަސް މާރުކޭޓް ދިނުމުގައި ހިޔާނާތް ވެފައިވާ ކަމަށް ތުހުމަތު ކުރެވޭ މައްސަލައިގައި ބާއްވަން އެޖެންޑާކުރި ޖަލްސާތައް ވެސް ކޯރަމް ހަމަނުވެގެން ނުބޭއްވުނެވެ.
އެކްސްގައި ސައިފް ހިއްސާކުރެއްވި ވީޑީއޯއިން ފެންނަ ގޮތުގައި، ޖަލްސާ ފެށި ވަގުތު ތިބީ އޭނާ އާއި ނާޒިމާގެ އިތުރުން މޭޔަރު އާޒިމާއި ގަލޮޅު ދެކުނު ކައުންސިލަރު މަރިޔަމް ރީހާން ނާޒިމާއި ހުޅުމާލެ ކައުންސިލަރު އަލީ އައިމަން އާއި މައްޗަންގޮޅި އުތުރު ކައުންސިލަރު ސައީދާ ރަޝާދުގެ އިތުރުން ހެންވޭރު ހުޅަނގު ކައުންސިލަރު ޝައުފާ ސަލީމް އެވެ.