އައްޑޫ، ފޭދޫން ވަގަށް ނެގި އަލަ ގޯންޏެއްގެ ވެރިފަރާތް ހޯދަން ފުލުހުން އިއުލާން ކޮށްފި އެވެ.
އައްޑޫގައި މި މަހު ވަޅޯމަހާއި ބައްޓާއި ފަތްކެޔޮ ވެސް ވަގަށް ނަގާފައި ވަނިކޮށް ފެނި، އޭގެ ވެރިން ހޯދަން އިއުލާނުކޮށްފައި ވަނިކޮށް އިއްޔެ އަލަ ގޯންޏެއް ވެސް ފެނިގެން އަނެއްކާ އިއުލާނުކޮށްފި އެވެ.
އަލަ ގޯނީގެ ފޮޓޯ އާންމުކޮށް ފުލުހުން ބުނީ އެ ފެނުނީ މިދިޔަ އަންގާރަ ދުވަހު ފުލުހުން ރަށުތެރެ ޕެޓްރޯލް ކުރަމުން ދަނިކޮށް ކަމަށެވެ.
ފުލުހުން ބުނީ މި އަލަ ގޯންޏަކީ ފޭދޫ މަގުމަތިން ފެނުނު މީހެއްގެ އަތުގައި އޮތް އެއްޗެއް ކަމަށެވެ. އެ މީހާއާ މެދު ޝައްކުވެގެން ފާސްކުރި އިރު އަލަ ގޯނި ފެނުމުން އެ މީހާ ވަނީ ގަމު ޕޮލިސް ސްޓޭޝަނަށް ގެންގޮސްފައި ކަމަށް ވެސް ފުލުހުން ބުންޏެވެ.
މި މަހު ހަ ވަނަ ދުވަހު އައްޑޫގައި ވަގަށް ނެގި ބައިސްކަލެއް ހޯދައި ވެރިފަރާތާ ހަވާލުކޮށްފައި ވާއިރު އޭގެ އަނެއް ދުވަހު ވެސް ބައިސްކަލަކާއި ޕަވަބެންކެއް ވަގަށް ނަގާފައި ވަނިކޮށް ހޯދައި ވެރިފަރާތާ ހަވާލުކުރި ކަމަށް ބުނެފައިވެ އެވެ. އެ ދުވަހު ވެސް ވަގަށް ނެގި ތަކެތީގެ ތެރޭގައި ބަރަބޮލެއް ހިމެނެ އެވެ.
މި މަހުގެ 12 ވަނަ ދުވަހު ފޯނެއް ވަގަށް ނަގާފައި ވަނިކޮށް އެ ހޯދައި ވެރިފަރާތާ ހަވާލުކުރި އެވެ.
މި މަހު 15 ވަނަ ދުވަހު އައްޑޫ ފުލުހުން ވަނީ ވަގަށް ނަގާފައިވާ ވެލްޑިން ޕްލާންޓެއްގެ ވެރިފަރާތް ހޯދަން ވެސް އިއުލާނުކޮށްފަ އެވެ.
މީގެ އިތުރުން 17 ވަނަ ދުވަހު ވަގަށް ނެގި ހަތަރު "ލަވް ބާޑް" ހޯދައި ވެރިފަރާތާ ހަވާލުކޮށްފައި ވާއިރު އޭގެ އަނެއް ދުވަހު ވެސް ދޫންޏަކާއި ފެން ހޫނުކުރާ ޑިސްޕެންސާއެއްގެ އިތުރުން 13 ފަންކާ ހިތަދޫން ވަގަށް ނަގާފައި ވަނިކޮށް ހޯދައި އޭގެ ވެރިން ހޯދަން އިއުލާނުކުރި އެވެ.
ވަގަށް ނަގާފައިވާ ބައިސްކަލަކާއި، ކަރަންޓު ވަޔަރުކުރާ ސާމާނުތަކެއް ވެސް ވަގަށް ނަގާފައި ވަނިކޮށް މި މަހު ފެނުނެވެ.
މި މަހު 19 ވަނަ ދުވަހު ފުލުހުން ވަނީ ވަޅޯމަހާއި ބަށިތަކެއްގެ ވެރިފަރާތް ހޯދަން އޭގެ ފޮޓޯ އާންމުކޮށްފަ އެވެ. ހިތަދޫން ވަގަށް ނެގި ތަކެތި ފިޔަވައި އެހެން އެއްޗިއްސަކީ ފޭދޫން ވަގަށް ނަގާފައިވާ އެއްޗިއްސެވެ.
މި ތަކެތީގެ ވެރިން އެ ގެންދިޔަކަމެއް އަދި ނޭނގެ އެވެ.