ނަގުދު ފައިސާ އާއި ކޭޝް ކާޑުން ފިތުރު ޒަކާތް ބަލައިގަންނަން އިސްލާމީ މަރުކަަޒުގައި ފަށައިފި

އޮންލައިންކޮށް ޒަކާތް ދައްކަން އަހުލުވެރި ނޫން މީހުންނަށް ހާއްސަކޮށްގެން، ނަގުދު ފައިސާ އާއި ކޭޝް ކާޑުން ފިތުރު ޒަކާތް ބަލައިގަންނަން އިސްލާމީ މަރުކަޒުގައި މިއަދު ފަށައިފި އެވެ.

މޯލްޑިވްސް ޒަކާތު ހައުސްގެ ވެބްސައިޓުގައި ބުނީ އިސްލާމީ މަރުކަޒުގެ ޖަލްސާކުރާ މާލަމުގައި ގާއިމްކޮށްފައިވާ ކައުންޓަރުތަކުން ނަގުދު ފައިސާ އާއި ކޭޝް ކާޑުން ޒަކާތް ބަލައިގަންނަން މިހާރު ފަށާފައިވާ ކަމަށެވެ. 

ޒަކާތު ހައުސް އިން ބުނީ ރަށްރަށުގައި، އޮންލައިންކޮށް ޒަކާތް ދެއްކުމަށް އަހުލުވެރި ނޫން މީހުން ފިތުރު ޒަކާތް ދައްކާނީ އެ ރަށެއްގެ ކައުންސިލް އިދާރާއަށް ގޮސްގެން ކަމަށެވެ. ނަގުދު ފައިސާއިންނާއި ގޮވާމުން ޒަކާތް ބަލައިގަތުމަށް ކައުންސިލުތަކުން ބޭނުންކުރާނީ އެކަމަށް ހާއްސަކޮށްގެން އިސްލާމިކް މިނިސްޓްރީން ތައާރަފުކޮށްފައިވާ ފިތުރު ޕޯޓަލް ކަމަށް ޒަކާތު ހައުސް އިން ބުންޏެވެ. 

އާންމުން ކައުންސިލް އިދާރާތަކަށް ނުވަތަ އިސްލާމީ މަރުކަޒަށް ގޮސް ނަގުދު ފައިސާއިން ޒަކާތް ދެއްކުމުން، ހުއްދަ ދެވިފައިވާ މުވައްޒަފުން އެ މުއާމަލާތް ވަގުތުން ފިތުރު ޕޯޓަލުގައި ރެކޯޑުކުރާނެ ކަމަށް ޒަކާތު ހައުސް އިން ބުންޏެވެ.

ޒަކާތު ހައުސް އިން ބުނީ ފައިސާ ދައްކައި ނިމުމުން، ފިތުރު ޒަކާތުގެ ގޮތުގައި ދެއްކި އަދަދު ކަށަވަރުކޮށްދޭން އެސްއެމްއެސްއެއް ވަގުތުން އެ މީހަކަށް ލިބޭނެ ކަމަށެވެ. އަދި ސޮދަގާތުގެ ގޮތުގައި އިތުރު ފައިސާއެއް ދައްކާފައިވާ ނަމަ، އެ އަދަދު ވެސް އެ މެސެޖުގައި ހިމެނޭނެ ކަމަށް ބުންޏެވެ.

ޒަކާތު ހައުސް އިން ރޯދަމަހުގެ ފުރަތަމަ ދުވަހު ވަނީ އޮންލައިންކޮށް، ޖުމްލަ ހަތް ޕްލެޓްފޯމެއް މެދުވެރިިކޮށް ޒަކާތް ބަލައިގަތުމުގެ އިންތިޒާމު ހަމަޖައްސައިފަ އެވެ.  

ބަނޑޭރިޕޭ އާއި ފަހިޕޭ މެދުވެރިކޮށް ރޯދަމަހުގެ އެންމެ ފަހު ދުވަހާ ހަމައަށް ވެސް ފިތުރު ޒަކާތް ދެއްކޭނެ އެވެ. އެހެން ޕްލެޓްފޯމުތައް މެދުވެރިކޮށް ރޯދަމަހުގެ 27 ވަނަ ދުވަހުގެ ހެނދުނު 06:00 އާ ހަމައަށް ފިތުރު ޒަކާތް ދެއްކޭނެ އެވެ.