އެމެރިކާ އާއި އިޒްރޭލުން އިސްވެ އިރާނަށް ދިން ވަރުގަދަ ހަމަލާތަކާ ގުޅިގެން މެދުއިރުމަތީގައި ފަށާފައިވާ ހަނގުރާމައާ ހެދި ރާއްޖެއިން ނުފުރި ތިބި ފަތުރުވެރިންނަށް ދޫކޮށްފައިވާ ވިސާގެ މުއްދަތު މޯލްޑިވްސް އިމިގްރޭޝަނުން އިތުރުކޮށްދޭން ނިންމައިފި އެވެ.
އިމިގްރޭޝަނުން އެކްސްގައި ބުނީ މެދުއިރުމަތީގައި ފަށާފައިވާ ހަނގުރާމައިގެ ސަބަބުން ދަތުރުފަތުރުގެ ނިޒާމަށް ބުރޫއަރައި، ރާއްޖެއަށް ދަތުރުކުރާ ބައެއް ފްލައިޓުތައް ކެންސަލްވުމާ ގުޅިގެން ރާއްޖޭގައި މިވަގުތު ތިބި ބައެއް ފަތުރުވެރިންނަށް ވިސާގެ މުއްދަތު ހަމަވުމުގެ ކުރިން އެ މީހުންނަށް ފުރޭނެ އިންތިޒާމެއް ނެތް ކަަމަށެވެ. އެހެންވެ، އެމީހުންގެ ޓޫރިސްޓް ވިސާގެ މުއްދަތު އިތުރުކޮށް ދިނުމަށް ނިންމާފައިވާ ކަމަށް ބުންޏެވެ.
މިހާރު އޮންނަ ގޮތުން ރާއްޖެއިން ޓޫރިސްޓުންނަށް އޮންއެރައިވަލް ވިސާ ދެނީ 30 ދުވަހަށެވެ. ނަމަވެސް އެ މުއްދަތު ހަމަވާ ޓޫރިސްޓުންނަށް އިމިގްރޭޝަން ވެބްސައިޓް މެދުވެރިކޮށް ވިސާ އިތުރުކުރަން ހުށަހެޅޭނެ އެވެ.
ހޮނިހިރު ދުވަހު ފެށި މެދުއިރުމަތީގެ ހަނގުރާމައާ ގުޅިގެން ރާއްޖެ އަށް އަންނަން އޮތް 19 ފްލައިޓެއް އިއްޔެ ކެންސަލްވެ، 3،530 ފަސިންޖަރުންނަށް ދަތިތަކާ ކުރިމަތިވި އެވެ.
ވައިގެ ދަތުރުފަތުރުތައް ކެންސަލް ކުރަނީ ހަނގުރާމައާ ހެދި މެދުއިރުމަތީގެ ގައުމުތަކުގެ ވައިގެ ސަރަހައްދު ބަންދުކުރުމުންނެެވެ. އޭގެ ތެރޭގައި އެރައިވަލް އަދި ޑިޕާޗާ ހިމެނޭހެން ފްލައިޓް ހިމެނެ އެވެ.
ފްލައިޓުތައް ކެންސަލް ކުރުމުން ފަސިންޖަރުންނަށް ކުރިމަތިވާ ދަތިތައް ހައްލު ކުރުމަށް އެމްއޭސީއެލުން ވަނީ ވެލާނާ އިންޓަނޭޝަނަލް އެއާޕޯޓުގައި "ޑިސްރަޕްޝަން މެނޭޖުމަންޓު ސެންޓަރެއް" ވަނީ ގާއިމުކޮށްފަ އެވެ.
ޓޫރިޒަމް މިނިސްޓަރު ތޯރިގް އިބްރާހިމް ވިދާޅުވެފައިވާ ގޮތުގައި މެދުއިރުމަތީގައި ހިނގަމުންދާ ހަނގުރާމައާ އެކު، ރާއްޖެ އަށް އަންނަން ތިބި 30-35 ޕަސެންޓު އައުން ހުއްޓިދާނެ އެވެ.