އަންނަ މަހުގެ ހަތަރުވަނަ ދުވަހު ބާއްވާ ލޯކަލް ކައުންސިލްތަކުގެ އިންތިހާބުގައި އައްޑޫ ސިޓީ ކައުންސިލްގެ މެޖޯރިޓީ ޕީއެންސީ ނުވަތަ ސަރުކާރަށް ދީފި ނަމަ ތަފާތު ފެންނާނެ ކަމަށް އެ ޕާޓީގެ ނައިބު ރައީސް އަދި ފިޝަރީޒް މިނިސްޓަރު އަހުމަދު ޝިޔާމް ރޭ ވިދާޅުވެއްޖެ އެވެ.
އޭނާ އެހެން ވިދާޅުވީ، ސަރުކާރު ހިންގާ ޕާޓީ ޕީއެންސީގެ ޓިކެޓުގައި ލޯކަލް ކައުންސިލްތަކާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ އިންތިހާބުގައި ވާދަކުރާ ކެންޑިޑޭޓުންގެ މާލޭގެ ކެމްޕެއިން ޖަގަހަ ހުޅުވުމަށް ބޭއްވި ރަސްމިއްޔާތުގަ އެވެ.
"ތަފާތު އިރާދަކުރެއްވިއްޔާ ފެނިވަޑައިގަންނަވާނެ. އަޅުގަނޑުމެންނަށް އެނގޭ ރައީސް ޑރ. މުހައްމަދު މުއިއްޒުގެ އެބައޮތްކަން ތަސައްވުރެއް، މުޅި ގައުމުގެ ތަރައްގީ އަށް، މުޅި ގައުމުގެ ކުރިމަގަށް، ރައްޔިތުންގެ ލާބަ އާއި މަންފާ އަށް. ވަރަށް ބޮޑު ތަސައްވުރެއް އެބައޮތް،" ޝިޔާމް ވިދާޅުވި އެވެ.
އޭނާ ވިދާޅުވި ގޮތުގައި ރައީސް މުއިއްޒުގެ އެ ތަސައްވުރުގައި އެންމެ ބޮޑު އިސްކަމެއް ދެއްވާފައިވާ އެއް ސިޓީއަކީ އައްޑޫ އެވެ. އައްޑޫގައި ހުރި ޒަމާންވީ ބޮޑެތި މައްސަލަތައް ހައްލު ކުރަން ރާވާފައިވާ ކަންކަން ރައީސްގެ މެނިފެސްޓޯގައި އެބަހުރި ކަމަށާއި އެކަމަކު އެމްޑީޕީގެ ސަރުކާރު ނިންމާލާފައި ދިޔައީ "ވަތްގަނޑު" ހުސްކޮށްލާފައި ކަމަށް ވާތީ ދަތިތައް އެބަހުރި ކަމަށް ޝިޔާމް ވިދާޅުވި އެވެ.
"މިއީ ޖެހިގެން މި އުޅޭ އުނދަގުލަކީ. އައްޑޫ ސިޓީގައި މާލިއްޔާ އިން ބޮޑު ހޭދައެއް ކޮށްގެން ކުރަން ހުރި މަސައްކަތްތައް ކުރުމަށް އަންނާނެހާ ގޮންޖެހުމެއް އަންނާނެ ގޮތަށް އެ މީހުން [އެމްޑީޕީ] ވެރިކަންކުރީ،" މިހާރު އިދިކޮޅުގައި އޮތް އެމްޑީޕީ އަށް އަމާޒު ކުރައްވައި އޭނާ ވިދާޅުވި އެވެ.
"ވަތްގަނޑު ހުސްކޮށްލާފައި ދިޔައީ. ދިޔައީމާ ރައީސަށް މި ޖެހިވަޑައިގަތީ ގައުމު ސަލާމަތްކުރަން. އެ ވަތްގަނޑަށް ފައިސާ އިތުރު ކުރައްވާފައި ގައުމު ސަލާމަތް ކުރައްވަން ފުރަތަމަ ޖެހިވަޑައިގަތީ."
ޝިޔާމް ފާހަގަކުރެއްވި ގޮތުގައި، މިއީ ރާއްޖޭގެ ހުރިހާ ސަރަހައްދެއްގައި ހިންގާ ތަރައްގީގެ މަޝްރޫއުތަކުގައި ކުލަޖެހޭނެ އަހަރެއް ކަން ރައީސް މުއިއްޒު ވަނީ ވިދާޅުވެފަ އެވެ. ނޮވެމްބަރު 17، 2023 ގައި ވެރިކަމާ ހަވާލުވެވަޑައިގެން ފުރަތަމަ ވެސް ކަންކަން ތަރުތީބު ކުރެއްވީ އެ ގޮތަށް ކަމަށް ޝިޔާމް ވިދާޅުވި އެވެ. އޭގެ ތެރޭގައި އައްޑޫގެ ތަރައްގީއާ ގުޅޭ ކަންކަމަށް ބޭނުންވާ މާލީ އިންތިޒާމުތައް ހަމަޖެއްސުން ހިމެނޭ ކަން ޝިޔާމް ފާހަގަކުރެއްވި އެވެ.
"ފައިސާ އެއްކުރެއްވީ. މިއަދު އިރާދަކުރެއްވިއްޔާ އަޅުގަނޑުމެން މިދަނީ އެ މަސައްކަތްތައް ކުރަމުން. އިރާދަކުރެއްވިއްޔާ އެ މަނިކުފާނު އައްޑޫ ސިޓީ އަށް ވެވަޑައިގެންފައިވާ ވައުދުފުޅުތައް އަޅުގަނޑުމެންނަށް އެނގޭ އެއްޗަކީ ރަނުންރަނަށް ފުއްދަވާނެކަން. ފުއްދަވާނެތީ ރައްޔިތުންނާ ގާތުން އެ މަސައްކަތްޕުޅު ކުރައްވަނީ،" ރައީސަށް އިތުބާރު އޮތް ކަން ހާމަކުރައްވަމުން ޝިޔާމް ވިދާޅުވި އެވެ.
އޭނާ ވިދާޅުވި ގޮތުގައި ރައީސް މުއިއްޒުގެ ތަފާތު ކަމަކީ އެއްވެސް ރަށެއް ތަފާތު ކުރުމެއް ނެތި، މީހުން ދިރިއުޅޭ ހުރިހާ ރަށަކަށް ވެރިކަމުގެ ފުރަތަމަ ދެ އަހަރުގެ ތެރޭގައި ވަޑައިގަތުމެވެ. އެމްޑީޕީގެ އަޣުލަބިއްޔަތު އޮަތް ކަމަށް ވިދާޅުވެ، އެއްވެސް ކައުންސިލެއް ބާކީ ނުކުރައްވައި އެ ދަތުރުފުޅުތަކުގައި ބައްދަުކުރެއްވި ކަމަށް ޝިޔާމް ވިދާޅުވި އެވެ.
ރައީސް ވަނީ އެމްޑީޕީގެ ފުރިހަމަ އަޣުލަބިއްޔަތެއް އޮތް އައްޑޫ ސިޓީ ކައުންސިލާ ވެސް ބައްދަކުރައްވައި އެ ސިޓީގެ ތަރައްގީ އަށް މި ސަރުކާރުން ކޮށްދޭނެ ކަންތައްތަކުގެ ލިސްޓެއް ލިޔުމުން އެ ކައުންސިލާ ހަވާލު ކުރައްވާފައި ކަން ޝިޔާމް ފާހަގަކުރެއްވި އެވެ.
އެކަމަކު، ފެންނަނީ އައްޑޫ މޭޔަރު އަލީ ނިޒާރު މި ސަރުކާރަށް "ޖެއްސުނުހާ އުނދަގުލެއް" ޖައްސަމުންދާ ތަން ކަމަށް ޝިޔާމް ވިދާޅުވި އެވެ.
އޭނާ ވިދާޅުވީ، އައްޑޫގެ ރައްޔިތުންނަކީ ވަރަށް ތައުލީމީ އަދި ކަންކަން ހިނގާ ގޮތް އެނގޭ ބައެއް ކަމަށާއި ހާއްސަކޮށް އެމްޑީޕީން ދައްކާނީ "ފެންނުހިފޭ" ވާހަކަތައް ކަން އެ މީހުންނަށް އެނގޭނެ ކަމަށެވެ.
ޝިޔާމް ވިދާޅުވި ގޮތުގައި އެންމެ ފަހުގެ ރައްޔިތުންގެ މަޖިލިހުގެ އިންތިހާބާ ހަމައަށް އައްޑޫގެ ރައްޔިތުން އެމްޑީޕީގެ ފަރާތުން އުންމީދުތަކެއް ކުރި އެވެ. އެކަމަކު، މިހާރު އެ އުންމީދުތައް ގެއްލުވާލައި އެ މީހުން ތިބީ ރައީސް މުއިއްޒާ އެކު ކަމަށް ޝިޔާމް ވިދާޅުވި އެވެ.