ބަންޑާރަ މިސްކިތް ނުވަތަ މަސްޖިދުއްސުލްތާން މުހައްމަދު ޝަމްސުއްދީން ހުރި ބިމުގައި ޒަމާނީ ބޮޑު މިސްކިތެއް އެޅުމަށް ނިންމާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
ޝަހީމް ވިދާޅުވީ އެ ތަނުގައި އާ މިސްކިތެއް އެޅުމުގެ މަސައްކަތް ކުރުމަށް ނިންމާފައި ވަނީ ރޯދަމަސް ފަހުން ކަމަށެވެ.
އެކަމަށް ބޭނުންވާ އެހީތެރިކަން ދީލަތި ފަރާތަކުން ހަމަޖެހިފައިވާ ކަމަށް ވެސް މިނިސްޓަރު ވިދާޅުވި އެވެ.
އެސްޓީއޯ ސުޕަމާޓާ ޖެހިގެން ހުންނަ ބަންޑާރަ މިސްކިތަކީ މާލޭގެ އެންމެ ކާރޫބާރު ބޮޑު އެއް ސަރަހައްދުގައި ހުންނަ މިސްކިތެވެ.
މާލޭގެ އުތުރު ފަރާތުގައި ހުންނަ އެ މިސްކިތަކީ ރާއްޖެއަށް އަތްގަދަ ކުރަން އައި ޝީއީންގެ ގަބޫލުކުރުންތަކަށް ހެއްލިފައި ތިބި ވޯރާ ވިޔަފާރިވެރިން ބިނާކުރި މިސްކިތެކެވެ. އޭރު އެ މިސްކިތަށް ކިޔަނީ ބުމްބާ މިސްކިތެވެ. ނަމަވެސް ފަހުން އެ މިސްކިތުގެ ނަން ބަންޑާރަ މިސްކިތަށް ވަނީ ބަދަލުކޮށްފަ އެވެ.
ކުރީގެ ރައީސް އިބްރާހިމް ނާސިރާއި ރައީސް މައުމޫން އަބްދުލްގައްޔޫމްގެ ސަރުކާރުގައި އެ މިސްކިތަށް ވަރަށް ބޮޑެތި ބަދަލުތަކެއް ގެނަ އެވެ. ވޯރާއިން އޭރު އެ މިސްކިތް ހަދާފައިވާ ގޮތުގެ ޑިޒައިނަށް ބަދަލު ގެނެސް އެ މީހުންގެ އަސަރު އެ މިސްކިތުން ވަނީ ކަނޑުވާލައިފަ އެވެ.