މިނިސްޓްރީތަކަށް ގެނައި ބަދަލާ އެކު، ހަ ޕީއެސްއެއްގެ މަގާމު ގެއްލޭނެ

ސަރުކާރުގެ 20 މިނިސްޓްރީގެ މެންޑޭޓަށް ބަދަލު ގެނެސް ޖުމްލަ 15 އަށް މަދުކޮށް، ބައެއް މިނިސްޓްރީތައް އެއްކޮށްލުމުން، ހަ މިނިސްޓްރީއެއްގެ ޕާމަނަންޓް ސެކްރެޓަރީ (ޕީއެސް) ގެ މަގާމު ގެއްލޭނެ ކަމަށް ސިވިލް ސާވިސް ކޮމިޝަން (ސީއެސްސީ) އިން މިއަދު ބުނެފި އެވެ. 

ކެބިނެޓުގެ 20 މިނިސްޓަރުންގެ ތެރެއިން 10 މިނިސްޓަރަކު އިއްޔެ ކުއްލި ގޮތަކަށް އިސްތިއުފާ ދެއްވުމުން ރޭ ވަނީ 20 މިނިސްޓްރީގެ މެންޑޭޓަށް ބަދަލު ގެނެސް 15 އަށް މަދުކޮށް، ކެބިނެޓް އަލުން އެކުލަވައިލައިފަ އެވެ. އެ ގެނައި ބަދަލުތަކުގެ ސަބަބުން ބައެއް މިނިސްޓްރީތަކުގެ މަސައްކަތްތައް ވަނީ އެއްކޮށްލައިފަ އެވެ. 

ޕީއެސް އިންގެ މުސާރައަކީ މަހަކު 20،500ރ. އެވެ. އަދި ލިވިން އެލަވަންސްގެ ގޮތުގައި މަހަކު 15،000ރ. ލިބެ އެވެ. 

ސަރުކާރުން ގެނައި ބަދަލުތަކާ އެކު ސިޓީސް، ލޯކަލް ގަވަމެންޓް އެންޑް ޕަބްލިކް ވޯކްސް މިނިސްޓްރީ ވަނީ އުވާލައިފަ އެވެ. އަދި މިނިސްޓްރީ އޮފް ހައުސިން އެންޑް އިންފްރާސްޓްރަކްޗާގެ ނަމުގައި ހިންގި މިނިސްޓްރީގެ ނަން އިންފްރާސްޓްރަކްޗާ، އާބަން އެންޑް ހައުސިން ޑިވެލޮޕްމަންޓް މިނިސްޓްރީއަށް ވަނީ ބަދަލުކޮށް، ސިޓީސް މިނިސްޓްރީގެ ޕަބްލިކް ވޯކްސްއާ ގުޅޭ މަސައްކަތްތައް ބަލަހައްޓާނީ ދެން އެ މިނިސްޓްރީންނެވެ. އަދި ފިޝަރީޒް އާއި އެގްރިކަލްޗާ މިނިސްޓްރީ އެއްކޮށްލާފައިވާއިރު ކުރިން އެގްރިކަލްޗާގެ ދަށުން ހިންގި އެނިމަލް ވެލްފެއާ ވަނީ އުވާލައިފަ އެެވެ. 

އިކޮނޮމިކް، ޓްރާންސްޕޯޓް އެންޑް ޓްރޭޑް މިނިސްޓްރީ އެއްކޮށްލާފައިވާއިރު ޓޫރިޒަމް ގެނެސްފައި ވަނީ ސިވިލް އޭވިއޭޝަނުގެ ދަށަށެވެ. އަދި އެޑިއުކޭޝަން މިނިސްޓްރީ އާއި ހަޔާ އެޑިއުކޭޝަން އެއްކޮށްލާފައިވާއިރު ޔޫތު މިނިސްޓްރީ އާއި ސްޕޯޓްސް ވެސް ވަނީ އެއް މިނިސްޓްރީއެއްގެ ގޮތަށް ބަދަލުކޮށްފަ އެވެ. ކުރިން ދިވެހި ލޭންގުއެޖް، ކަލްޗާ އެންޑް ހެރިޓޭޖުގެ ނަމުގައި ހިންގި މިނިސްޓްރީގެ ނަން ވެސް ވަނީ  އާޓްސް، ކަލްޗާ އެންޑް ހެރިޓޭޖަށް ބަދަލުކޮށްފަ އެވެ. 

ސީއެސްސީން މިއަދު ބުނީ، އެއްކޮށްލި މިނިސްޓްރީތަކުގެ މުވައްޒަފުންގެ ޓްރާންސްފާ ކަންކަން މިހާރު ފަށާފައިވާ ކަމަށެވެ.

ދިހަ މިނިސްޓަރަކު އިސްތިއުފާ ދެއްވީ ރައީސް އޮފީހުން ބުނި ގޮތުގައި ރައްޔިތުންގެ ވިންދާ އެއްގޮތަށް ސަރުކާރު ހިންގުމަށް ރައީސް ޑރ. މުހައްމަދު މުއިއްޒު ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުސަތު ދިނުމުގެ ގޮތުންނެވެ. 

ގިނަ އަދަދެއްގެ މިނިސްޓަރުން އެއްފަހަރާ އިސްތިއުފާ ދެއްވިއިރު ބައެއް ކުންފުނިތަކުގެ މެނޭޖިން ޑިރެކްޓަރުގެ މަގާމުން ބައެއް ބޭފުޅުން އިސްތިއުފާ ދެއްވައި އަދި ބައެއް ބޭފުޅުން މަގާމުން ވަކިކޮށްފައި ވަނީ ލޯކަލް ކައުންސިލްތަކުގެ އިންތިހާބުގައި ސަރުކާރަށް ލިބުނު ނާކާމިޔާބީއަށް ފަހުގަ އެވެ.