ރަންބީރު ކަޕޫރަކީ އާމިރް ހާން ފަދައިން، ފަރުވާ ބަހައްޓައިގެން ވަރަށް ރަނގަޅަށް މަސައްކަތް ކުރާ އެކްޓަރެއް ކަމަށާއި އޭނާއަކީ އެއްގޮތަކަށް ވެސް ސެޓްގައި ޝަކުވާކުރާ އެކްޓަރެއް ނޫން ކަމަށް ބުނެ ޑައިރެކްޓަރު ރާޖް ކުމާރު ހިރާނީ ރަންބީރަށް ވަރަށް ބޮޑަށް ތައުރީފުކޮށްފި އެވެ.
އާމިރް އޭލިއަނެއްގެ ރޯލުން ފެނިގެން ދިޔަ 2014 ގެ ފިލްމް "ޕީކޭ" ގެ ހާއްސަ ފެނިލުމަކަށް ފަހު ހިރާނީ، ސަންޖޭ ދަތުގެ ހަޔާތުގެ މައްޗަށް ބިނާކޮށް ހަދާ ފިލްމުގައި ރަންބީރު އަންނަނީ ސަންޖޭގެ ރޯލް ކުޅެމުންނެވެ.
އެ ފިލްމަށް ރަންބީރު ވަނީ ވަރަށް ބޮޑެތި ބަދަލުތަކެއް ހަށިގަނޑަށް ވެސް ގެނެސްފަ އެވެ. އެ ފިލްމުގެ 60 ޕަސަންޓް ޝޫޓިން މިހާރު ވަނީ ނިންމާލައިފަ އެވެ.
ރަންބީރް، 34، އާ ބެހޭ ގޮތުން ހިރާނީ ބުނީ އޭނާއަކީ ކަމަށްކަމޭ ހިތައިގެން ވަރަށް ފަރުވާތެރިކަމާ އެކު މަސައްކަތް ކުރާ އެކްޓަރެއް ކަމަށެވެ.
"މިހާތަނަކަށް އޭނާ ޝޫޓިންއަކަށް ގަޑިޖެހިފައެއް ނެތް. ޝޫޓިންގައި ބުރަވެގެން ޝަކުވާކޮށްފައެއް ނެތް. އަދި ޝޫޓިން އަށް ނާންނަން މިހާތަނަކަށް ބަހަނާއެއް ދައްކާފައް ނެތް،" 3 އިޑިއަޓްސް ފަދަ މޮޅު ފިލްމްތައް ހަދާފައިވާ ޑައިރެކްޓަރު ބުންޏެވެ. "އެހެންވެ ރަންބީރާ އެކު މި ކަހަލަ ޕްރޮޖެކްޓެއްގައި މަސައްކަތްކޮށްލުމަކީ ލިބޭ ވަރަށް ބޮޑު ހިތްހަމަޖެހުމެއް."
އަދި ވަކި ނަމެއް ހަމަޖައްސައިފައި ނުވާ ސަންޖޭގެ ބައޮޕިކްގައި 20-55 އަހަރާއި ދެމެދުގެ އުމުރުފުރާއެއް ރަންބީރު ދައްކުވައި ދޭނެ އެވެ. އެގޮތުން އޭނާ ދައްކުވައި ދޭން ޖެހޭ ކޮންމެ ލުކަކަށް ވަރަށް ރަނގަޅަށް ތައްޔާރުވެފައިވެ އެވެ.
އެހެންވެ ރަންބީރު ކުރި މަސައްކަތް ސްކްރީނުން ވަރަށް ފުރިހަމަ އަށް ފެނިގެން ދާނެ ކަމަށް ހިރާނީ ބުންޏެވެ.
"ރަންބީރު ކަހަލަ އެކްޓަރުން މި އި އިންޑަސްޓްރީގައި ތިބި ކަމަށް ވަންޏާ މިކަހަލަ ފިލްމްތައް ހަދާކަށް ޑައިރެކްޓަރުންނަށް މާ ބޮޑު ކަމަކަށް ނުވާނެ. ބޭނުން ވަނީ ޑެޑިކޭޓެޑް އެކްޓަރުން،" މުންބާއީ ސީރީޒް ވެސް ގެނެސްދޭ ޑައިރެކްޓަރު ބުންޏެވެ.
އޭނާ ބުނީ ސަންޖޭގެ ބައޮޕިކްގެ ގޮތުން ރަންބީރަށް، ވަރަށް ބުރަކޮށް، ވަރަށް ގިނަ ވަގުތު ފިލްމަށް ހުސް ކުރަން ޖެހޭ ކަމަށެވެ.
"މެންދަމު ތިނެއްގައި ހޭލާފައި ފަސް ގަޑި އިރުގެ މޭކަޕަކަށް އެބަ ތައްޔާރު ވާން ޖެހޭ. އަނެއްކޮޅުން ޝޫޓިން ދިގުލައިގެން އެބަދޭ ބައެއް ފަހަރު ބާރަ ގަޑި އިރަށް ވެސް،" ރަންބީރު ފިލްމަށް ހުސްވެފައިވާ ވަރު ހާމަކޮށް ދިނުމުގެ ގޮތުން ހިރާނީ ބުންޏެވެ.
މި އަހަރުގެ ފަހުކޮޅު ރިލީޒް ކުރާ ސަންޖޭ ބައޮޕިކުން ރަންބީރާ އެކު ސޯނަމް ކަޕޫރު، އަނުޝްކާ ޝަރްމާ، ވިކީ ކޯޝަލް، ދިއާ މިރްޒާ، މަނީޝާ ކޮއިރަލާ އަދި ޕަރޭޝް ރާވަލް ފަދަ އެކްޓަރުން ފެނިގެން ދާނެ އެވެ.