މި އަހަރުގެ މިހާތަނަށް ރިލީޒް ކުރި އެންމެ ކާމިޔާބު ފިލްމު ކަމަށްވާ "ސަންޖޫ" އަކީ އެކްޓަރު ސަންޖޭ ދަތުގެ މޫނުމަތި ރީތި ކުރަން އަދި އޭނާ އަށް ހަމްދަރުދީ ހޯދައި ދޭ ގޮތަށް ހެދި ފިލްމެއް ކަމަށް ޑައިރެކްޓަރު ރާޖްކުމާރް ހިރާނީ އެންމެ ފަހުން އެއްބަސްވެއްޖެ އެވެ.
ޖޫން މަހުގެ 29 ގައި ރިލީޒް ކުރި މި ފިލްމަށް ކްރިޓިކުން ވަރަށް ބޮޑަށް ތައުރީފު ކުރި ނަމަވެސް ސަންޖޭގެ އެންމެ މައްސަލަ ބޮޑު ކަންކަމަށް ފިލްމްގައި އެކަށީގެންވާ ވަރަށް އަލިއަޅުވައިލައިފައި ނެތުމާއި އޭނާގެ ހަޔާތުގެ މުހިއްމު ބައެއް ހާދިސާތަކުން "ސަންޖޫ" ފުރާނާލައިފައިވާތީ ބައެއް ކްރިޓިކުންނާއި ފިލްމް ބެލި ވަރަށް ގިނަ ބަޔަކު ފިލްމަށް ފާޑު ކިޔާފައިވެ އެވެ.
ރަންބީރް ކަޕޫރް ސަންޖޭގެ ރޯލް ކުޅުނު ފިލްމް ކްރިޓިކުން ވަނީ ވަރަށް ސީދަލަށް މިއީ ހަމަ ސަންޖޭގެ މޫނުމަތި ރީތިކޮށް ދޭން ހެދި ފިލްމެއް ކަމަށް ބުނެފަ އެވެ. ނަމަވެސް ފިލްމް ރިލީޒް ކުރި ދުވަސްކޮޅު އެ ފާޑު ކިޔުންތައް އަމާޒުވުމުން، ހިރާނީ ވަނީ އެކަމާ އިންކާރުކޮށް އެވެ.
އިންޑިއާގެ އެންމެ ކުޅަދާނަ ޑައިރެކްޓަރުންގެ ތެރޭގައި ހިމެނޭ "ސަންޖޫ" އާ ބެހޭ ގޮތުން އިންޑިއަން ފިލްމް އެންޑް ޓީވީ ޑިރެކްޓާސް އެސޯސިއޭޝަން (އައިއެފްޓީޑީއޭ) ގެ މާސްޓަ ކްލާހެއްގައި ހިރާނީ ބުނީ "ސަންޖޭ" ގައި ގޯސްތަކެއް ހެދިފައިވާ ކަމަށް މިހާރު ގަބޫލުކުރާ ކަމަށެވެ.
އޭނާ ބުނި ގޮތުގައި ފިލްމްގެ ސްކްރިޕްޓަށް ބަދަލުތަކެއް ގެންނަން ނިންމީ ބައެއް މީހުން ދިން ހިޔާލުތަކަކާ ގުޅިގެންނެވެ.
"ސަންޖޫގެ މަސައްކަތް އަހަރެން ފެށީ ވަރަށް ބޮޑަށް ރިސާޗްކޮށްގެން ލިޔުނު ސްކްރިޕްޓަކަށް،" އަބިޖާތު ޖޯޝީއާ ގުޅިގެން ލިޔުނު ސްކްރީންޕްލޭއާ ބެހޭ ގޮތުން ހިރާނީ ބުންޏެވެ.
އޭނާ ބުނީ ފިލްމްގެ ފުރަތަމަ އެޑިޓިން ނިންމާފައި ފިލްމް ހޮވައިލެވުނު ބަޔަކަށް ދައްކައިލި ކަމަށެވެ. އަދި ފިލްމްގެ އެ ޕްރިވިއު ބަލާފައި އެ މީހުން ފިލްމާ ދޭތެރޭ ހިތްހަމަނުޖެހުނު ކަމަށް ބުންޏެވެ.
"އޭގެ ތެރެއިން ގިނަ ބަޔަކު ބުނި މި ފިލްމް ބަލާފައި އޯޑިއަންސް ސަންޖޭ ދެކެ އިތުރަށް ނަފުރަތު ކުރަން ފަށާނެ ކަމަށް. އަދި އެކަލަހަ ފިލްމަކަށް ތާއީދު ނުކުރާނެ ކަމަށް. ބަލަން ވެސް ބޭނުން ނުވާ ކަމަށް،" ސަންޖޭއާ އެކު "މުންނާބާއީ" ސިރީޒް ވެސް ގެނެސްދޭ ހިރާނީ ބުންޏެވެ. "އެކަމަކު އަހަރެން ގަބޫލު ކުރީ ކިޔައި ދޭން ބޭނުން ވަނީ ހަގީގީ ހާދިސާތަކެއް، އޭގެ އަސްލާ އެއްގޮތަށް ކަމަށް."
އޭނާ ބުނީ "ސަންޖޫ" އަށް ބަދަކުތަކެއް ގެންނަން ނިންމީ ފުރަތަމަ ޕްރިވިއު އަށް ލިބުނު ނެގަޓިވް ކޮމެންޓްތަކާ އެކު ފަހުން އަމިއްލަ އަށް ވެސް ގަބޫލު ކުރެވުނު ކަންތައްތަކެއްގެ މައްޗަށް ބިނާކޮށްފަ އެވެ.
އެގޮތުން ސަންޖޭއަކީ އެތައް ބައެއްގެ ލޯބި ހޯދި އެކްޓަރަކަށްވާތީ، އޭނާ އަށް ކޮންމެވެސް ވަރެއްގެ ހަމްދަރުދީއެއް އޮންނަން ވާނެ ކަމަށް ގަބޫލު ކުރެވުނު ކަމަށް "ޕީކޭ" އާއި "3 އިޑިއަޓްސް" ފަދަ ފިލްމްތައް އާމިރް ހާނާއެކު ގެނެސް ދިން ޑައިރެކްޓަރު ބުންޏެވެ.
"އެހެންވެ ފިލްމަށް އަހަރެން އިތުރު ކުރިން ސަންޖޭ އަށް އާންމުންގެ ހަމްދަރުދީ ލިބޭނެ ކަހަލަ ބައެއް މަންޒަރުތައް." އޭނާ ބުންޏެވެ.
ހިރާނީ ބުނި ގޮތުގައި މަނާ ހަތިޔާރު ގެންގުޅުމާއި ޓެރަރިޒަމްގެ ދައުވާ ސަންޖޭގެ މައްޗަށް ސާބިތުވުމުން އޭނާ އަމިއްލަ އަށް މަރުވާން އުޅުނު ކަމަށް "ސަންޖޭ" ދެއްކި މަންޒަރަކީ ބެލުންތެރިންގެ ހަމްދަރުދީ ހޯދަންވެގެން ފިލްމްގައި ހިމެނި މަންޒަރެކެވެ. އަދި އެއީ އޮރިޖިނަލް ސްކްރިޕްޓްގައި ނެތް މަންޒަރެއް ކަމަށް ވެސް ބުންޏެވެ.
"އަހަރެން ގަބޫލުކުރަން ފިލްމްގައި އަހަނަށް ގޯސްތަކެއް ހެދިފައި ހުރި ކަމަށް. އެކަމަކު ކޮންމެ ފިލްމަކީ ވެސް ދަތުރެއް. މި ދަތުރު މިގޮތަށް ދިމާވުމަކީ ތަޖުރިބާއެއް ކަމަށް އަހަރެން ގަބޫލު ކުރަނީ،" ހިރާނީ ބުންޏެވެ. "އަހަހެރެން ކުރިއަށް އޮތް ތަނުގައި ބަލާނަން ވާހަކައެއް ކިޔައިދޭ ކަމަށް ވަންޏާ އެއަށް އިހުލާސްތެރިވާން."
"ސަންޖޫ" އަކީ ބޮކްސް އޮފީހުގައި ޖުމްލަ 579 ކްރޯޑް ރުޕީސްގެ އާމްދަނީއެއް ލިބުނު ފިލްމެކެވެ.