ކުރިން ވެސް ލަފާ ކުރެވުނު ގޮތަށް ރަންބީރު ކަޕޫރްގެ "ސަންޖޫ" ހުކުރު ދުވަހު ރިލީޒް ކުރުމާ އެކު، ބެލުންތެރިންގެ ހިތްތައް ފަތަހަކޮށް، މި އަހަރުގެ މިހާތަނަށް ރިލީޒް ކުރި ފިލްމްތަކުގެ ތެރެއިން ރިލީޒް ކުރި ދުވަހު އެންމެ ރަނގަޅު ފެށުމެއް ލިބުނު ފިލްމްގެ މަގާމު ހޯދައިފި އެވެ.
ކުރިން އެ މަގާމު އޮތީ މިދިޔަ މަހުގެ 15 ގައި ރިލީޒް ކުރި ސަލްމާން ހާންގެ ސަސްޕެންސް ތުރިލާ "ރޭސް 3" ގެ އަތުގަ އެވެ. އެއީ 29.17 ކްރޯޑް ރުޕީސްއާ އެކުގަ އެވެ. ނަމަވެސް "ސަންޖޫ" ވަނީ ހުކުރު ދުވަހު އިންޑިއާ އިން އެކަނި ވެސް 34.75 ކްރޯޑް ރުޕީސް ހޯދައިފަ އެވެ.
މި ލިސްޓްގެ ގަދަ 5 ގައި ދެން ހިމެނެނީ ޓައިގާ ޝްރޮފްގެ "ބާގީ 2" އާއި ދީޕިކާ ޕަދްކޯންގެ "ޕަދްމާވަތު" އާއި ކަރީނާ ކަޕޫރްގެ "ވީރޭ ދީ ވެޑިން" އެވެ.
"ސަންޖޫ" އަށް ހިފަހެއްޓުމެއް ނެތި، އިންޑިއާ އާއި އިންޑިއާ އިން ބޭރު ބޮޑު ތަރުހީބެއް ލިބެމުން އަންނަ އިރު، އާދީއްތަ ދުވަހާ ހަމައަށް އިންޑިއާ އިން ފިލްމަށް ލިބުނު އާމްދަނީއާ އެކު ވަނީ 100 ކްރޯޑުން ކުލަބުން ވެސް ޖާގަ ހޯދައިފަ އެވެ. މިއީ މި އަހަރު 100 ކްރޯޑްގެ އާމްދަނީއެއް ހޯދި 7 ވަނަ ފިލްމް އެވެ. އަދި އެ އަދަދު "ސަންޖޫ" ހަމަ ކުރީ ތިން ދުވަހުގެ ތެރޭގަ އެވެ.
"ރޭސް 3" އަށް ވެސް 100 ކްރޯޑްގެ އާމްދަނީއެއް ލިބުނީ ތިން ދުވަހުގެ ތެރޭގަ އެވެ.
މަޝްހޫރުު ފިލްމް ކްރިޓިކް ތަރަން އަދާޝް ވަނީ ރާޖްކުމާރް ހިރާނީ ޑައިރެކްޓްކޮށް، ރަންބީރުގެ އާދަޔާހިލާފު މޮޅު އެކްޓިންއެއް ފެނިގެންދާ ފިލްމަށް ވަރަށް ބޮޑަށް ތައުރީފުކޮށްފަ އެވެ. އޭނާ ލަފާކުރާ ގޮތުގައި "ސަންޖޫ" ވެގެން ދާނީ އަހަރުގެ އެންމެ ބޮޑު އެއް ބްލޮކްބަސްޓާއަށެވެ.
މި ފިލްމް ރިވިއުކޮށް އޭނާ ދީފައި ވަނީ ވެސް ފަސް ތަރިން ހަތަރެއް ބައި ތަރި އެވެ.
ތަރަން ބުނި ގޮތުގައި "ސަންޖޫ" އަކީ ރަންބީރު މިހާތަނަށް ކުޅުނު ފިލްމްތަކުގެ ތެރެއިން އޭނާގެ އެކްޓިން އެންމެ ފުރިހަމަ ފިލްމެވެ. އަދި މި ފިލްމަކީ މި ފަހުން ގިނަ ފްލޮޕްތަކެއް ގެނެސް ދިން އެކްޓަރުގެ ފިލްމްތަކުގެ ތެރެއިން ރިލީޒް ކުރި ދުވަހު އެންމެ ބޮޑު ފެށުމެއް ވެސް ލިބުނު ފިލްމެވެ.
ތަރުން ބުނީ "ސަންޖޫ" އަކީ ނުބަލައި ދޫކޮށްލާ ވަރުގެ ފިލްމެއް ނޫން ކަމަށާއި ފިލްމްގެ ސްކްރީންޕްލޭ ވެސް ވަރަށް މޮޅުވެފައި، ޝައުގުވެރި ކަމަށެވެ. އަދި އޭނާ ވަނީ ހިރާނީ އާއި އަބިޖާތު ޖޯޝީގެ މަސައްކަތަށް ތައުރީފުކޮށް މިއީ ޕާސްޓަޕީސްއެއް ކަމަށް ބުނެފަ އެވެ.
"ސަންޖޫ" ގައި ކިޔައި ދެނީ އެކްޓަރު ސަންޖޭ ދަތުގެ ހަޔާތުގެ ވާހަކަ އެވެ. އެގޮތުން އޭނާގެ ފުރަތަމަ ފިލްމް ރޮކީ (1981) އިން ފެށިގެން ދާދި ފަހަކުން ތަންފީޒުކޮށް ނިންމައިލި ޖަލު ހުކުމާ ހަމައަށް، އޭނާގެ ހަޔާތުގެ މުހިއްމު ސޮފުހާތައް ކިޔައި ދީފައިވެ އެވެ. ވަކިން ހާއްސަކޮށް ކްރިޓިކުން ބުނީ "ސަންޖޫ" އަކީ ދަރިއަކާއި ބައްޕައަކާ އޮންނަ ގުޅުން ވަރަށް ފުރިހަމަ އަށް ދައްކުވައިދޭ ފިލްމެއް ކަމަށެވެ.
އެކަމަކު މި ފިލްމަށް ފާޑު ކިޔާފައިވާ ބައެއް ކްރިޓިކުން ފިލްމް ސިފަ ކުރީ ހަރާބުވެފައި އޮތް ސަންޖޭގެ މޫނުމަތި ރީތިކޮށް ދޭން ހަދާފައި އޮތް ފިލްމެއްގެ ގޮތުގަ އެވެ.
"ސަންޖޫ" ގެ ކާސްޓުންގެ ތެރޭގައި ޕަރޭޝް ރާވަލް، މަނީޝާ ކޮއިރަލާ، ސޯނަމް ކަޕޫރް، ވިކީ ކޯޝަލް، އަނުޝްކާ ޝަރްމާ، ޖިމް ސަރްބް، ދިއާ މިރްޒާ އަދި ޖިމް ސަރަބް ފަދަ ތަރިން ހިމެނެ އެވެ.