ކުރީގެ ރައީސް މައުމޫން އަބްދުލްގައްޔޫމް ޕާސަނަލް އެސިސްޓެންޓް އަހުމަދު ސޮފްވާން ހޯދުމަށް އިންޓަޕޯލްގެ އެހީތެރިކަމަށް ފުލުހުން އެދިއްޖެ އެވެ.
ސޮފްވާން ހޯދުމަށް، ބައިނަލްއަގްވާމީ ފުލުހުންގެ ޖަމިއްޔާ އިންޓަޕޯލްގެ އެހީތެރިކަމަށް ފުލުހުން އެދުނީ ބަލަމުންދާ މައްސަލައަކާ ގުޅިގެން އޭނާ ހޯދަން ފުލުހުން ކުރި އިއުލާނަކަށް ފަހު އެވެ. އެކަމަކު ފުލުހުން ބަލަނީ އޭނާއާ ގުޅޭ ކޮން މައްސަލައެއް ކަމެއް ނުބުނެ އެވެ.
ފުލުހުން މިއަދު ކުރި ޓްވީޓެއްގައި ވަނީ ސޮފްވާންގެ ޕާސްޕޯޓް ކެންސަލްކޮށް، އޭނާ ހޯދުމުގައި އެހީތެރިވުމަށް، އިންޓަޕޯލްގެ އެހީ އަށް އެދިފައިވާ ކަމަށެވެ.
ފުލުހުން ހޯދަން ބޭނުންވާ މީހަކު ހޯދުމުގައި އިންޓަޕޯލުން އެހީތެރިވާ ނަމަ އެ މީހެއްގެ ފޮޓޯ އާއި މައުލޫމާތާ އެކު އިންޓަޕޯލުން ރެޑް ނޯޓިސް ނެރޭނެ އެވެ. އޭރުން އެ މީހަކު ހޯދުމުގައި އިންޓަޕޯލްގެ މެމްބަރު ހުރިހާ ގައުމަކުން އެހީތެެރިވާނެ އެވެ.