އަހަރުގެ އެންމެ މޮޅު އިންޖިނިއަރަކަށް ޑރ. ފުރުގާން، ލައިފްޓައިމް އެވޯޑު ތިން ބޭފުޅަކަށް

އަހަރުގެ އެންމެ މޮޅު އިންޖީނިއަރުގެ އެވޯޑު، ހަކަތައިގެ ދާއިރާއިން ޕީއެޗްޑީ ހާސިލްކޮށްފައިވާ ޑރ. ފުރުގާން އިބްރާހިމަށް މިރޭ އަރުވައިފި އެވެ.

ބާސެލޯ ނަސަންދުރާ ހޮޓެލްގައި ބޭއްވި އިންޖީނިއާސް އެވޯޑު ރަސްމިއްޔާތުގައި، އެމްޑަބްލިއުއެސްސީގެ ޖެނެރަލް މެނޭޖަރަކަށް މަސައްކަތްކުރައްވާ ފުރުގާނަށް އެވޯޑު ހަވާލުކޮށްދެއްވީ ރައީސް ޑރ. މުހައްމަދު މުއިއްޒެވެ. 

އެސިސްޓެންޓް މެކޭނިކެއްގެ ގޮތުގައި މީގެ 20 އަހަރު ކުރިން އެމްޑަބްލިއުއެސްސީއާ ގުޅިވަޑައިގެންނެވި ފުރުގާން ވަނީ ސިންގަޕޫރުގެ ގައުމީ ޔުނިވާސިޓީން މެކޭނިކަލް އިންޖީނިއަރިންގެ ރޮނގުން ޑިގްރީ އަދި އެނާޖީ ޓެކްނޮލޮޖީ އެންޑް މެނޭޖްމަންޓްގެ ދާއިރާއިން މާސްޓާސް ހާސިލްކުރައްވައިފަ އެވެ.

އޭނާ ވަނީ އެމްޑަބްލިއުއެސްސީގެ އޮޕަރޭޝަންސް ޑިވިޝަންގެ ގިނަ އަހަރުތަކެއް ވަންދެން މަސައްކަތްކުރައްވައިފަ އެވެ. 

އެނާޖީ ޓެކްނޮލޮޖީގެ ދާއިރާއިން ޕީއެޗްޑީ ފުރިހަމަކުރެއްވި ފުރުގާން މި ވަގުތު ހުންނެވީ ފެން ކުންފުނީގެ ރިސްކު އެންޑް ކޮމްޕްލަޔަންސްގެ ޖެނެރަލް މެނޭޖަރަކަށެވެ. 

އޭގެ އިތުރުން ލައިފްޓައިމް އެޗީވްމަންޓް އެވޯޑު، އިންޖީނިއަރިންގެ ދާއިރާގައި ގިނަ އަހަރުތަކެއް ވަންދެން މަސައްކަތްކުރެއްވި ތިން ބޭފުޅަކަށް ވަނީ އަރުވައިފަ އެވެ. އެއީ؛

އެވޯޑު ހާސިލްކުރި އިތުރު އިންޖީނިއަރުން؛

މިރޭގެ ރަސްމިއްޔާތުގައި ވާހަކަ ދައްކަވަމުން، އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު ވިދާޅުވީ، އިންޖީނިއަރުންނަކީ ގައުމު ބިނާކުރާ، މި ގައުމުގެ އާއްމު ދިރިއުޅުމާއި އިގުތިސޯދު، އެ ބައެއްގެ ބުރަ މަސައްކަތަށް ބިނާވެފައިވާ ފަހުލަވާނުން ކަމަށެވެ.

މުއްތަލިބު ވިދާޅުވީ އިންޖީނިއަރުންގެ ދުވަސް ފާހަގަކުރަން މި އަހަރު ބޭއްވި ހަރަކާތްތަކުން، އެފަދަ ފަންނުވެރި މަސައްކަތްތައް ދައްކައި، އެ ކަންތައް ކިޔައިދިނުމަކީ ދަރިވަރުން މަހުރޫމް ކޮށްފައިވާ ކަމެއް ކަން އެނގުނު ކަމަށެވެ.

މިގޮތުން، ކޮންމެ ރަށެއްގައި ވެސް ތަރައްގީގެ މަޝްރޫއުތައް ހިނގާއިރު އެކަންކަން އެ ކުދިންނަށް ކިޔައިދިނުމަށް އެއްވެސް ސަމާލުކަމެއް ދެވިފައިނުވާ ކަމަށާއި، މި އަހަރު އެކަން ފުޅާދާއިރާގައި ހިންގިފައިވާ ކަމަށް މުއްތަލިބު ވިދާޅުވި އެވެ.

މިދިޔަ މަހުގެ 30 ވަނަ ދުވަހު ފާހަގަކުރި އިންޖީނިއަރުންގެ ދުވަހާ ގުޅުވައި މާލެ ސަރަހައްދުގެ ސްކޫލުތަކުގެ ދަރިވަރުން ސިނަމާލެ ބްރިޖު ސައިޓަށް އަދި ރަށްރަށުގައި އިންޖީނުގެތަކާއި ފެން ޕްލާންޓު އަދި އެކި މަޝްރޫއުތައް ހިންގާ ސައިޓުތަކަށް ދަރިވަރުން ޒިޔާރަތްކުރި އެވެ.

މިނިސްޓަރު ވިދާޅުވީ އެ ކުދިން ބްރިޖު ސައިޓަށާއި ރަށްރަށުގައި ހިނގަމުންދާ މަޝްރޫއުތަކުގެ ސައިޓުތަކަށް ގެންގޮސް، މަސައްކަތް ގެންދާ ގޮތް ކިޔައިދީފައިވާ ކަމަށެވެ.

ރާއްޖޭގައި ފުރަތަމަ ފަހަރަށް ފާހަގަކުރާ އިންޖީނިއަރުންގެ އެވޯޑަށް 10 ކެޓަގަރީއަކުން ހުޅުވައިލި އެވެ. އެ ކެޓަގަރީތަކަށް 70 އަށްވުރެ ގިނަ ހުށަހެޅުން ލިބުނަސް މިރޭ އެވޯޑު ދީފައިވަނީ އޭގެ ތެރެއިން އަށް ކެޓަގަރީއަކުންނެވެ.