ވ. އާރަށް ކުއްޔަށް ދޫކުރި މައްސަލާގައި ކުރީގެ ރައީސް އަބްދުﷲ ޔާމީންގެ މައްޗަށް ދައުވާކުރާ މައްސަލާގެ ޝަރީއަތުގައި އެމަނިކުފާނުގެ ދިފާއީ ހެއްކަށް ފުރުސަތު ނުދޭން ދައުލަތުން ކްރިމިނަލް ކޯޓުގައި މިއަދު އެދިއްޖެ އެވެ.
ޔާމީންގެ މައްޗަށް ދައުވާ ކުރަނީ އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލުކޮށް، އެ ފައިސާ ލޯންޑާކުރި ކަމަށް ބުނެ އެވެ. އެ މައްސަލާގައި ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ މައްޗަށް ވެސް ދައުވާކުރެ އެވެ.
ކްރިމިނަލް ކޯޓުގައި މިއަދު ބޭއްވި އެ މައްސަލާގެ ޝަރީއަތުގެ އަޑުއެހުމުގައި ދައުލަތުންގެ ފަރާތުން ވަނީ ޔާމީންގެ ފަރާތުން ހުށަހަޅާފައިވާ ބައެއް ހެކިތައް ބަލައިނުގަތުމަށް އެދި ހުށަހެޅުމެއް ހުށަހަޅައިފަ އެވެ.
އެގޮތަށް އެދުނީ ދައުލަތުގެ ވަކީލް ވިދާޅުވި ގޮތުގައި އެ މައްސަލައިގެ ތަހުގީގު މަރުހަލާގައި ޔާމީން ހަނު ހުންނެވުމަށްފަހު އެ މަރުހަލާގައި ހާމަނުކުރާ ހެކިތަކަށް ޝަރީއަތުގައި ފުރުސަތު ދެވިގެންނުވާނެތީ ކަމަށް ބުނެ އެވެ.
ދައުލަތުން ބަލައިނުގަތުމަށް އެދުނު ހެކިތަކަކީ މާލޭގެ ކުރީގެ ޑެޕިއުޓީ މޭޔަރު އަހުމަދު ނަރީޝް އާއި އަބްދުﷲ ރަޝީދު ކިޔާ މީހަކާއި ވިލިމާލެ ދާއިރާގެ މަޖިލިސް މެންބަރު މުހައްމަދު އިސްމާއީލް އަދި ހުޅުދޫ ދާއިރާގެ މަޖިލިސް މެންބަރު މުހައްމަދު ޝާހިދެވެ. އަދި ޑޮލަރު މާރުކުރިކަން ބަޔާންކޮށްދޭ ލިޔުމެއް ވެސް ހެކީގެ ގޮތުގައި ބަލައިނުގަތުމަށް އެދިފައިވެ އެވެ.
ޔާމީނާއި ޔޫސުފް ނައީމް ވެސް އެ މައްސަލާގައި ދިފާއުއެއްގެ ގޮތުގައި ނަގަނީ ޔާމީންގެ އެކައުންޓަށް ޖަމާވި އެއް މިލިއަން ޑޮލަރަކީ ޑޮލަރު މާރުކުރުމުގެ މުއާމަލާތަކުން ލިބުނު ފައިސާ ކަމަށާއި އަދި އެ ޑޮލަރަށްވާ ދިވެހި ފައިސާ ޔޫސުފް ނައީމްއާ ހަވާލުކުރީ ނަގުދު ފައިސާގެ ގޮތުގައި ކަމަށެވެ. އަދި އެ ފައިސާ ގުނައިގެން ހަވާލުކުރި ކަމަށް ބުނެ މީގެކުރިން ނަރީޝް ހެކިބަސް ދީފައިވެ އެވެ.
އެކަމަކު، އޭނާގެ އެ ހެކިބަހާ މެދު ބޮޑެތި ސުވާލުތައް އުފެދިފައިވާއިރު، ޔާމީންގެ މައްޗަށް ދައުވާކުރާ ރ. ފުއްގިރި މައްސަލައިގައި ދިފާއީ ހެއްކެއްގެ ގޮތުގައި ހެކިބަސް ދޭން އޭނާ ވަނީ ދެކޮޅު ހަދައިފަ އެވެ.
އެ މައްސަލާގައި ރިޝްވަތު ގަބޫލުކޮށް މަނީ ލޯންޑާ ކުރެއްވި ކަމަށް ބުނެ ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވާފައި ވަނިކޮށް، އެ ހުކުމް ބާތިލް ކުރުމަށްފަހު، ހައި ކޯޓުން ވަނީ އެ މައްސަލަ ކްރިމިނަލް ކޯޓުގައި އަލުން ބަލަން އަމުރުކޮށްފަ އެވެ. ނަމަވެސް ހައި ކޯޓުގެ ހުކުމުގައި އާ ހެކިތަކެއް ބަލައިނުގަނެވޭނެ ކަމަށް ނިންމާފައިވާތީ އެ ބައި ދައުލަތުން އޮތީ ސުޕްރީމް ކޯޓުގައި އިސްތިއުނާފް ކުރުމުން ކްރިމިނަލް ކޯޓުގެ ޝަރީއަތް މަޑުޖައްސާލި އެވެ.
ސުޕްރީމް ކޯޓުން މައްސަލައިގައި ކަނޑައަޅާފައިވަނީ ޔާމީނާ އެއްކޮޅަށް ހައި ކޯޓުން ވެސް ނިންމި ގޮތަށް އާ ހެކިތައް ބަލައިނުގަނެވޭނެ ކަމަށެވެ.
ރ. ފުއްގިރި ކުއްޔަށް ދިނުމުގެ މުއާމަލާތާ ގުޅިގެން ރިޝްވަތު ގަބޫލުކޮށް އަދި އެ ފައިސާ ލޯންޑާކުރި ކަމަށް ބުނާ މައްސަލާގައި ޔާމީންގެ މައްޗަށް ކުރާ ދައުވާގެ ޝަރީއަތް ވެސް ކްރިމިނަލް ކޯޓުގައި ކުރިއަށް ގެންދެ އެވެ. އެ މައްސަލައިގެ އަޑުއެހުމެއް މިދިޔަ ހަފުތާއަށް ތަވާލުކުރި ނަމަވެސް ކެންސަލްކުރި އެވެ.
ފުއްގިރި ކުއްޔަށް ދިނުމުގެ މުއާމަލާތާ ގުޅިގެން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލު ކުރައްވައި، އެ ފައިސާ ލޯންޑާ ކުރެއްވި ކަމަށް ބުނެ ޔާމީންގެ މައްޗަށް ދައުލަތުން ކުރާ ދައުވާ ގުޅިގެން ހެކިބަސް ނެގުމުގެ މަރުހަލާ ނިމި، މިހާރު އޮތީ ހެއްކާބެހޭ ގޮތުން ވާހަކަ ދެއްކުމުގެ މަރުހަލާގަ އެވެ. އަދި އެ ހިސާބުގައި މައްސަލަ އޮންނަތާ ވަނީ ގިނަ ދުވަސްތަކެއްވެފަ އެވެ.