އޯޓިޒަމާއި އޭޑީއެޗްޑީ ހުންނަ މުހައްމަދު ފައްޔާހް ހަސަން (ދޮންކަލޯ) އާއި އޭނާގެ ބައްޕަ ހަސަން ފަޔާޒު ދިރިއުޅޭނެ ގެއެއް އަޅައިދިނުމަށް ޓިކްޓޮކް ކޮމިއުނިޓީން ކުރިއަށް ގެންދިޔަ ލައިވްގައި މިލިއަނަކަށްވުރެ ގިނަ ރުފިޔާގެ އެހީ ލިބިއްޖެ އެވެ.
އެކި މީސްމީހުންނަށް އެކި ބޭނުންތަކުގައި ފައިސާ ހޯދައިދިނުމަށް މީގެ ކުރިން ވެސް ޓިކްޓޮކްގައި ލައިވްތައް ބާއްވާފައި ވާއިރު މިއީ އެއް އިވެންޓަކުން އެންމެ ގިނަ ފައިސާ އެއްކުރެވުނު ފަހަރު ކަމަށް ވަނީ ބެލެވިފަ އެވެ.
"ހިޔާ ފޯ ދޮންކަލޯ" ނަމުގައި ރޭ 9:00 ގައި ފެށި ލައިވް އިވެންޓް ކުރިއަށް ގެންގޮސްފައިވަނީ ދޮންކަލޯގެ ބައްޕަ ފަޔާގެ ރަސްމީ ޓިކްޓޮކް އެކައުންޓުންނެވެ.
ދިވެހި ޓިކްޓޮކް ކޮމިއުނިޓީގެ މަޝްހޫރު އެމްޓީޕީ އާއި މަރިޔަމް ސަމާ އިސްނަގައިގެން ކުރިއަށްގެންދިޔަ އެ ހަރަކާތުގައި، ރާއްޖޭގެ ޓިކްޓޮކްގައި މަޝްހޫރު އެތައް ހޯސްޓުންނެއް ބައިވެރިވެ، ފައިސާ ހޯދުމުގެ މަސައްކަތުގައި ހަރަކާތްތެރިވި އެވެ.
އެ ލައިވް ފެށުނުތާ 30 ބައިގަޑިއިރު ތެރޭ، 14،000 އަށްވުރެ ގިނަ މީހުން ލައިވް ބަލަމުން ދިޔަ އެވެ. އަދި ނިމުނު އިރު 12،000 މީހުން ބަލަމުން ދިޔަ އެވެ.
ރޭ ދަންވަރު 1:00 އާ ހަމައަށް ކުރިއަށް ގެންދިޔަ ލައިވްގައި 1.2 މިލިއަނަށް ވުރެ ގިނަ ރުފިޔާ ފަޔާޒްގެ ބީއެމްއެލް އަދި އެމްއައިބީ އެކައުންޓުތަކަށް ޖަމާވެފައިވާ ކަމަށް އޭނާ ވަނީ ބުނެފަ އެވެ.
އުމުރުން 19 އަހަރުގެ ދޮންކަލޯ އާއި އޭނާގެ ބައްޕަ ފަޔާޒު ދިރިއުޅެމުން އަންނަނީ ބ. ހިތާދޫގަ އެވެ.
ދޮންކަލޯގެ އުމުރުން 13 އަހަރުވަންދެން ބެލެހެއްޓީ މަންމަ އެވެ. އޭގެ ފަހުން ފަޔާޒްއާ ހަވާލުކުރި އެވެ.
އޭރު ކަސްޓަމްސްގައި ކޮންޓެއިނަރު ކްލިއާ ކުރުމުގެ ވަޒީފާގައި އުޅުނު ފަޔާޒް ދޮންކަލޯއަށް ވަގުތު ހުސްކުރުމަށް ވަޒީފާއިން ވަކިވެ، އުފަން ރަށަށް ބަދަލުވި އެވެ.
މިހާރު ފަޔާޒް ރަށުގައި ރުއް ކެނޑުން ފަދަ މަސައްކަތްތައް ކޮށްގެން އާމްދަނީ ހޯދަމުން އަންނައިރު ހަރަދުތައް ހަމަޖައްސަނީ އެ މަސައްކަތުންނާއި ނުކުޅެދުންތެރިކަން ހުންނަ ކުދިންނަށް ސަރުކާރުންދޭ އެލަވަންސުންނެވެ.
ކޮވިޑްގެ ކުރިން ދޮންކަލޯއަށް ތެރަޕީ ދިން ނަމަވެސް އޭގެ ފަހުން އަތްމަތި ދަތިވެ ފަރުވާތައް ވެސް ހުއްޓާލީ ކަމަށް ފަޔާޒް ވަނީ ބުނެފަ އެވެ.
ފަޔާޒް ކިޔައިދީފައިވާ ގޮތުގައި އޭނާގެ އެންމެ ބޮޑު އުންމީދަކީ ހަދަން ފަށައި ގިނަ އަހަރުތަކެއް ވަންދެން މަސައްކަތް ހުއްޓިފައިވާ ގެ ހަދައި ދޮންކަލޯ އެތަނަށް ގެންދިއުމެވެ. މިހާރު އެތަނުގައި އޮތީ ތަޅުން އެޅުމާއި، މުށި ޖެހުމުގެ މަސައްކަތާއި ވަށައިފާރު ރޭނުމުގެ މަސައްކަތެވެ.
ފަޔާޒު ބުނީ ރޭ އެ އަދަދަށް ފައިސާ ލިބޭނެ ކަމަށް އުއްމީދު ނުކުރާ ކަމަށެވެ. އެ ލައިވް އިންތިޒާމް ކުރި މީހުންނާއި ފައިސާ ހަދިޔާކުރި އެންމެންނަށް އޭނާ ވަނީ ޝުކުރު އަދާކޮށްފަ އެވެ.
އެ ލައިވްގައި ބައެއް މީހުން ވަނީ ފަޔާޒުގެ ގޭގައި ބޭނުންކުރާނެ ފަރުނީޗަރާއި ގޭގައި ބޭނުންކުރާނެ ބައެއް ތަކެތި ހަދިޔާކުރާނެ ކަމަށް ވެސް ބުނެފަ އެވެ.