ދިރިއުޅުމުގެ ހުރިހާ ވަގުތެއް ދަރިފުޅު ދޮންކަލޯއަށް ހުސްކޮށްގެން ހުރި ފަޔާޒް ހަސަންގެ ޓިކްޓޮކުން ފެންނަނީ އޯޓިޒަމާއި އޭޑީއެޗްޑީ ހުންނަ ކުއްޖަކު ބެލުމުގައި އުފުލަން ޖެހޭ ތަކުލީފެވެ. ކެތްތެރިކަން އިސްކުރަންޖެހޭ ވަރެވެ. އޭނާގެ 24 ގަޑިއިރުގެ ވަޒީފާއަކީ ދަރިފުޅު ބެލުމެވެ. އެކަނިމާއެކަނި ދަރިފުޅުގެ ހުރިހާ ކަމެއް ކުރާ އެ ބައްޕަގެ ދިރިއުޅުމުގައި ވަރުބަލިވުމެއް، ޝަކުވާއެއް ނެތެވެ. އެ މަންޒަރުތަކުން ފެންނަ ގޮތުގައި އޭނާގެ އެ ގުރުބާނީ ކޮންމެ މީހަކަށް އުފުލުން ކުޅަދާނައެއް ވެސް ނޫނެވެ.
މުހައްމަދު ފައްޔާހް ހަސަން (ދޮންކަލޯ) އެ ވަގުތަކު ހިތް އެދޭ ކަމެއް ނުކޮށް ދޫކޮށްލެވޭކަށް ނޯވެ އެވެ. އެހެން މީހުންގެ ވިސްނުމާއި ހިތަށް އަރާ ކަންކަމާއި ދޮންކަލޯ ކުރަން ބޭނުންވާ ކަންކަން ހާސްބައި ތަފާތެވެ. އެ ކަމެއް ނުވެއްޖެ ނަމަ ދެން ވެދާނެ ގޮތަކީ ވެސް ވިސްނާލަން ފަސޭހަ ކަމެއް ނޫނެވެ.
އެ ދިރިއުޅުމުގެ ދަތި ހާލަތާ ހެދި ދޮންކަލޯ އުޅެން ޖެހިފައި ވަނީ ވެސް ވަރަށް ބަންދު މާހައުލެއްގަ އެވެ. ވަށާފާރު ނެތް ގެއިން ނުކުމެވެން އޮންނަނީ މަގުމައްޗަށެވެ. ކޮޓަރިން ދުވެފައި އެކަނި މަގުމައްޗަށް ނުކުތުމަކީ ހިތާމަވެރި ހާދިސާއަކަށް ދޮންކަލޯ ހުށަހެޅުމެވެ. ވަޒީފާއަކަށް ނުގޮސް ދަރިފުޅުގެ ގާތުުގައި އަބަދު ހުންނަނީ އެ ރިސްކު ނަގަން ފަޔާޒް ބޭނުން ނުވާތީ އެވެ.
ފަޔާޒް "މިހާރު" އަށް ކިޔައިދިން ގޮތުގައި ދަރިފުޅު އުފަންވި އިރު އެއީ އޭޑީއެޗްޑީ ހުންނަ ކުއްޖެއް ކަން އެއްގޮތަކަށް ވެސް ނޭނގެ އެވެ. ދަރިފުޅުގެ ލޮލަށް ފެންނަކަން އެނގުނަސް ކަޅި އާއި ކަޅި ހަމައެއް ނުކުރެ އެވެ. ދެން ފާހަގަވީ ފަޔާޒާއި އޭނާގެ އަންހެނުންގެ ވާހަކަތަކަށް ދަރިފުޅު ސަމާލުކަން ނުދޭ މައްސަލަ އެވެ. އެކަމަކު ޓީވީން އިވޭ އަޑުތަކަށް ބަރާބަރަށް ސަމާލުކަން ދޭތީ އެއީ ވެސް މާބޮޑު މައްސަލައެއްކަމެއް އޭރަކު ނޭނގެ އެވެ.
ދަރިފުޅު ވާހަކަ ދައްކާ އުމުރަށް ދިޔައިރު ވެސް ވާހަކަ ނުދައްކާތީ ހާސްވި އެވެ. އެކަމަކު ބައެއް ކުދިން، އުމުރުން ހަތަރު ފަސް އަހަރުގައި ވެސް ވާހަކަ ދައްކާ ކަމަށް މީހުން ބުނެ އުޅުނަސް އެ މީހުން އެންމެ ފަހުން ނިންމީ ދޮންކަލޯ އެކަމަށް ހާއްސަ ޑޮކްޓަރަށް ދައްކާށެވެ.
ފަޔާޒް ކިޔައިދިން ގޮތުގައި އާންމުކޮށް ކުދިން ވާހަކަ ދައްކާ އުމުރުގައި ދޮންކަލޯ ވާހަކަ ނުދައްކައިގެން އެ މީހުން ޑޮކްޓަރަށް ދެއްކުމުން އެނގުނީ ދަރިފުޅަކީ އޯޓިޒަމް އާއި އޭޑީއެޗްޑީ ހުންނަ ކުއްޖެއް ކަމެވެ.
"މިއީ އަހަރެންގެ އެންމެ ފުރަތަމަ އަދި ހަމައެކަނި ދަރިފުޅު. 2007 ގައި އޭނާ އުފަންވީ. ފުރަތަމަ ފާހަގަވީ ކަމަކީ ނުއެއް ރޯނެ. އެކަމަކު އޭރު އަހަރެމެންނަކަށް ނޭނގޭ އެއީ މައްސަލައެއް ކަމެއް ނުރުއިމަކީ. އަނެއްހެން ބައްޔެއް ނޫން ހަމަ ރަނގަޅު. ދެން އެއަށް ވުރެ ބޮޑުވާން ފެށިފަހުން ލޮލަށް ފެންނަކަން އެނގޭ އެކަމަކު އައި ކޮންޓެކްޓެއް ނާދޭ. ދެން އެއަށް ވުރެ ބޮޑުވީމަ އަޑުއިވޭކަން އެނގޭ އެކަމަކު އަހަރެމެން ގޮވިޔަސް އަޑުއިވޭކަން އެނގޭ އެކަމަކު ސަމާލުކަމެއް ނުދޭ. އެކަމަކު ޓީވީން މިއަންނަ އިޝްތިހާރުތަކަށް ސަމާލުކަން ހުއްޓޭނެ،" އުމުރުން 42 އަހަރުގެ ފަޔާޒު ބުންޏެވެ.
"އަހަރެމެން ގޮވިޔަސް އެއްވެސް ވަރަކަށް ނުބަލާނެ. ހީވަނީ ބީރު މީހެއްހެން. އެއަށް ވުރެ ދެން ތަންކޮޅެއް ބޮޑުވީމަ މަންމަ ބައްޕައެއް ނުކިޔާ. ދެން އޭރު އަހަރެމެންގެ ވެސް ފުރަތަމަ ދަރިވީމަ ނޭނގޭ އެހާ ކަންކަމެއް. ދެން އެ ހިސާބުން ޑޮކްޓަރަށް ދެއްކީމަ ޑޮކްޓަރު މި އެނގުނީ އޯޓިޒަމް އަދި އޭޑީއެޗްޑީ ކަން،"
އުމުރުން މިހާރު 19 އަހަރުގެ ދޮންކަލޯއަކަށް ވާހަކައެއް ނުދެއްކެ އެވެ. އެކަމަކު މަންމަ، ބައްޕަ ހިމެނޭ ގޮތަށް ވަރަށް ގިނަ ބަސްތައް އޭނާ ކިޔަ އެވެ.
"މަންމަ ބައްޕަ ކިޔަސް މަންމަ ފެނިގެން މަންމާއޭ ކިޔާފައި ނޫނީ ބައްޕަ ފެނިގެން ބައްޕާއޭ ނުކިޔާނެ. އަނެއްކާ ބައްޕަ ނުފެނިގެން ބައްޕަ ހޯދާކަށް ވެސް ނޫޅޭނެ. އޭނާ އަމިއްލަ ދުނިޔެއެއްގައި އޭނާ އުޅޭނީ،"
ދޮންކަލޯގެ މަންމަ އާއި ބައްޕަ ވަކިވިތާ މިހާރު 11 އަހަރުވެއްޖެ އެވެ. ކޮވިޑުގެ ކުރިން ދޮންކަލޯ ދިރިއުޅެމުން އައީ މަންމައާ އެކު ނަމަވެސް މިހާރު ބައްޕައާ އެކު ދިރިއުޅޭތާ ހަ އަހަރުވެއްޖެ އެވެ. އެކަމަކު ތުލުސްދުއަށް ނިސްބަތްވާ ދޮންކަލޯގެ މަންމަ، ދޮންކަލޯއަށް ގުޅާ ހަދަ އެވެ. ދޮންކަލޯއަށް ވާހަކަ ނުދެއްކޭތީ ގިނަ ފަހަރަށް އިންނަން ޖެހެނީ ވީޑިއޯ ކޯލުގައި ބަލާށެވެ. އަދި ފަޔާޒުގެ ޓިކްޓޮކް ލައިވްތަކުގައި ވެސް ދޮންކަލޯގެ މަންމަ ގިނަ ފަހަރަަށް ވަދެ އިނދެ އެވެ.
"އަހަރެމެން ދެ މީހުން ވަރިވީ އަނެއްހެން ބޮޑު މައްސަލަތަކެއް ޖެހިގެނެއް ނޫން. އޭނާ ވެސް ދަރިފުޅުގެ ކަންކަން ބަލާނެ. ބަލިވެގެން ދޮންކަލޯ ގޮވައިގެން މާލެއަށް އަޔަސް ތުލުސްދޫ ދަން،"
ދޮންކަލޯ ބެލުމުގެ ޒިންމާތަކާ ފަޔާޒު ހަވާލުވާން ޖެހުނީ ވެސް ކޮވިޑުގެ ތެރޭގައި ދޮންކަލޯގެ ތެރަޕީ ހުއްޓި ގޭގައި ބަންދުވެފައި އިން ދަނޑިވަޅުގައި ވަރަށް ބޮޑަށް ރުޅިގަދަވެ، މަންމަގެ ގައިގައި ތަޅައި ވަކި އަޅުވާ ހަދަން ފެށުމުން މަންމައަށް ބަލަން އުނދަގޫވެގެންނެވެ.
އެހެެންވެ، އޭރު ފަޔާޒު ދިރިއުޅެމުން އައީ ވިލިމާލޭގައި ކަމަށް ވާތީ ފުލުހުންގެ އެހީތެރިކަމާ އެކު ކޮވިޑުގެ ލޮކްޑައުންގެ ތެރޭގައި ދޮންކަލޯ ވިލިމާލެއަށް ބަދަލުކުރީ އެވެ.
"އަސްލު މަންމަ މާލޭ އަތޮޅުވީމަ ހަތްފާއަކު އެއް ފަހަރު ގެންނާނެ ތެރަޕީއަށް މާލޭ ލޮކްޑައުންކުރީމަ މީނައަކަށް ތެރަޕީއަކަށް ނާދެވުނު. މާލެ އަންނަ ދުވަސްތަކުގައި ތެރަޕީ ނިންމާލާފައި މީނާ އަންނާނެ އަހަންނާ އެކީގައި ސައިކަލު ދުވެލާއި މޫދަށް އެރިލާ ކަންކަން ކުރަން. އެކަމަކު ލޮކްޑައުންކުރީމަ މާލެ ނާދެވުނީމަ މީނަ ވަރަށް ރުޅިގަދަވެއްޖެ. މީނާ މަންމަ ގައިގައި ތަޅާ ވަކި އަޅުވާ ވަރަށް އުނދަގޫވީމަ ލޮކްޑައުން ތެރޭގައި މީނަ ފޮނުވީ އަހަރެން ކައިރިއަށް،" 17 އަހަރުވަންދެން ވިލިމާލޭގައި ދިރިއުޅުނު ފަޔާޒު ބުންޏެވެ.
ފަޔާޒު ބުނި ގޮތުގައި ދޮންކަލޯ ގެނައިއިރު އޭނާއަށް ވެސް ބަލަން އުނދަގޫވާހާ ރުޅިގަދަ އެވެ. އެކަމަކު މިހާރު ރުޅިގަނޑު ވަރަށް ބޮޑަށް މައިތިރިކުރެވިފައިވާ ކަމަށާއި އެކަމަކު އަދިވެސް އޭނާ ބޭނުންވާ ކަމެއް ނުވެއްޖެ ހާލަތެއްގައި ވަރަށް ރުޅި އަންނަ ކަމަށް ބުންޏެވެެ.
ދޮންކަލޯގެ ޒިންމާތަކާ ހަވާލުވިއިރު ފަޔާޒު މަސައްކަތްކުރަމުން އައީ އެމްޕީއެލްގެ ކޮންޓެއިނަރު ހުސްކުރާ ބައިގަ އެވެ. އެކަމަކު ދޮންކަލޯއާ ހަވާލުވެ، އިތުރަށް ވަޒީފާއަށް ދެވޭނެ ގޮތެއް ނެތެވެ. ގޭގެ އެހެން މީހަކަށް ދޮންކަލޯ ހަވާލުކޮށްފައި މަސައްކަތަށް ދިއުމަކީ އޭނާގެ ހިތަށް ކުޅަދާނަ ކަމަކަށް ނުވި އެވެ. އެހެންވެ ވަޒީފާ ދޫކޮށްލާފައި ދަރިފުޅަށް ހުސްވީ އެވެ.
ފަޔާޒު ބުނީ ވަޒީފާ ދޫކޮށްލާފައި މާލޭގައި އުޅެވޭނެ ތަނަވަސްކަން ނެތުމުން 2020 ވަނަ އަހަރުގެ ޑިސެމްބަރުގައި އޭނާ ރަށަށް ބަދަލުވީ އޭނާއާ އެކު މާލޭގައި އުޅެމުން އައި މަންމަ އާއި ބައްޕަ އަދި ކޮއްކޮއަކާ ވެސް އެކު ކަމަށެވެ.
"އެ ދަނޑިވަޅުގައި ބައްޕަ ވެސް ބްރިޖު އެކްސިޑެންޓުވެގެން ވަރަށް ބަލިކޮށް އުޅުނީ. އެހެންވެ، ވަޒީފާ ދޫކޮށްލާފައި ދެން އަހަރެމެން ރަށަށް ބަދަލުވާން ނިންމީ ވަޒީފާއަކަށް ނުގޮސް މިތަނުގައި ނޫޅެވޭނެތީ،"
އެ ނިންމުމުގެ ކުރިން ފަޔާޒުގެ ވިސްނުން ހުރީ މާލޭގައި ފްލެޓުތަކަށް ކުރިމަތިލައިގެން މިތަނުން ބޯހިޔާވަހިކަމެއް ހޯދައިގެން މިތާ އުޅޭށެވެ. އެހެންވެ އެކި މަޝްރޫއުތަކަށް އޭރު ކުރިމަތިލިޔަސް ދުވަހަކު ވެސް ޝަރުތު ހަމައެއް ނުވެ އެެވެ.
ފަޔާޒު ރަށަށް ބަދަލުވިއިރު އެތަނުގައި ވެސް އެ މީހުންގެ އަމިއްލަ ބޯހިޔާވަހިކަމެއް ނެތެވެ. މިހާރު ރަށުގައި އެމީހުން އުޅެމުން އަންނަނީ ފަޔާޒުގެ މަންމައާ އެއްބަނޑު މީހެއްގެ ގެއެއްގަ އެވެ. ވަރަށް ބޮޑަށް ބާވެފައިވާ އެ ގެއަކީ ފަޔާޒުމެން އެންމެ ކުޑައިރުގައި ދިރިއުޅުނު ގެއެކެވެ.
"17 އަހަރު މާލޭގައި އުޅުނީ. އެމްޕީއެލްގައި ކޮންޓެއިނަރު ހުސްކުރުމުގެ ވަޒީފާގައި. ރަށުން 2000 ވަނަ އަހަރު ދިޔައީ ސަފާރީއަކަށް. ދެން 2003 ގައި މަންމަމެން މާލެއަށް ބަދަލުވީ. 2004 ގައި އަހަރެން ސަފާރީން ފޭބި ގޮތަށް ވިލިމާލޭގައި ދިރިއުޅުނީ. އޭރު މަންމަ ވެސް މާލޭގައި އުޅޭތީ މަންމަ ކައިރީގައި ހުންނަންވެގެން،"
ފަޔާޒު ބުނީ ކޮވިޑު ތެރޭގައި ރަށަށް ބަދަލުވެ އާންމު ހާލަތަށް ބަދަލުވި ފަހުން ދަރިފުޅު ތެރަޕީއަށް ނުގެންދާ ކަަމަށެވެ. އެކަމަކީ ބޮޑު ހަރަދެއް ހިނގާ ކަމެއް ކަމަށާއި އެކަމަކު މިވަގުތު އެމީހުންގެ ފޯކަސް ހުރީ އަމިއްލަ ބޯހިޔާވަހިކަމެއް ހޯދުމަށް ކަމަށް ބުންޏެވެ.
"މިހާރު އަހަރެމެން ރަށުގައި އުޅޭނެ އަމިއްލަ ތަނެއް ނެތީމަ ގެއެއް ހަދަން އެބަޖެހޭ. ގޮވައިގެން ތެރަޕީއަށް ދަތުރުކުރަންޏާ ވެސް ބޮޑު ހަރަދެއް އެބަ ހިނގާ. ފުރަތަމަ ބަލާނީ ގެ ހެދޭތޯތާ. އެމްޕީއެލްގައި އުޅުނުއިރު ލިބުނު ފައިސާ އެއްކޮށް އެކަން މިކުރަނީ،" އޭނާ ބުންޏެވެ.
މިހާރު ދޮންކަލޯ ދިރިއުޅެމުންދާ މާހައުލަކީ ވަރަށް ބަންދު މާހައުލެކެވެ. ފަޔާޒު ބުނީ އެ ގޭގެ ވަށާފާރެއް ނުހުންނަ ކަމަށާއި ހަމަ ގެއިން ބޭރަށް ނުކުންނަ ގޮތަށް މަގުމައްޗަށް ނިކުމެވޭއިރު އޭގެ ސަބަބުން ދޮންކަލޯ ގޭތެރެއަށް ދޫކޮށްލާފައި ބަހައްޓަން ވެސް ނުކެރޭ ކަމަށެވެ.
"މިއީ މުސްކުޅި ގެއެއް ވީމަ ނުހުންނާނެ ވަށާ ފާރެއް ވެސް. ވަރަށް ބަންދުވެފައި ހުންނަނީ. އެހެންވެ އަހަރަމެންނަކަށް ނޯންނާނެ ދޮންކަލޯ ދޫކޮށްލާފައި ބެހެއްޓޭކަށް ވެސް. ވަރަށް ބޮޑަށް ބަލަންޖެހޭ. ވަރަށް ބާރަށް ދުވެފައި ނިކުންނާނީ ހަމަ ސީދާ މަގަށް. އަތުކުރަން ވެސް އުނދަގޫވާނެ،"
ފަޔާޒުގެ ގެއަކީ އިތުރު ކުއްޖަކު ވެސް ހުންނަ ގެއަކަށް ނުވާތީ ދޮންކަލޯ އާންމުކޮށް އުޅެނީ ހަމަ ގޭތެރޭގައި ފަޔާޒުގެ އާއިލާއާ އެކުގަ އެވެ. އެހެންވިޔަސް މޫދަށް ދިއުމާއި ރަށުގެ ތެރެއަށް ވެސް ކުއްޖާ ގޮވައިގެން ފަޔާޒު ނިކުމެ ހަދަ އެވެ.
"ރަށު ކުދިންނާ އެކު ނޫޅޭނެ މީނާގެ މި ހުންނަ ކަމަކާ ހެދީ އަަހަންނަކަށް ނުކުރޭ ދޫކޮށްލާކަށް. މީނާ ހިފާލާއިރު ވެސް ހިފާލާނެ ވަރަށް ބާރަށް. މިއީ އަހަރެންގެ މަންމަގެ ހަމައެކަނި މާމަ ދަރި. އަހަރެން ތިމާގެ ކުޑަކުދިން ވެސް ނޫޅޭނެ. ދެން އެހެން މީސް މީހުންގެ ކުދިން ކައިިރިއަށް ނުކެރޭނެތާ ގެންދާކަށް،"
މިހާރު ހަދަމުން އަންނަ ގެއަކީ ފަޔާޒުގެ މަންމަގެ މަންމައަށް ގެއިން އޭނާގެ މަންމައަށް ބަހައިގެން ލިބިފައިވާ ތަނެކެވެ.
ފަޔާޒު ބުނީ އެގެއަކީ ކުރިން ވެސް ހަދާފައި ހުންނަ ގެއެއް ކަމަށާއި އެކަމަކު ގިނަދުވަސްވުމުގެ ސަބަބުން ފުރާޅާއި މަތިވަޑާންގަނޑު ބާވެފައިވާ ކަމަށެވެ. އެހެންވެ ފުރާޅު ބަދަލުކޮށް، މަތިވަޑާން ނަގައި އެ ގެ ބޮޑުކޮށް އަލުން ހިޔާކޮށްފައިވާ ކަމަށެވެ. މިހާރު ދެން އޮތީ ތަޅުން އެޅުމާއި މުށި ޖެހުން ފަދަ ކަންކަން ކުރުން ކަމަށް އޭނާ ބުންޏެވެެ.
މިހާރު ފަޔާޒުމެން ދިރިއުޅެމުން އަންނަނީ ދޮންކަލޯއަށް ލިބޭ ނުކުޅެދުންތެރިކަން ހުންނަ މީހުންގެ އެލަވަންސް އާއި ފަޔާޒު ގޭގެގެ ރުއްކަނޑައިދީގެން ލިބޭ ފައިސާ އިންނެވެ. އޭނާ ބުނީ ރަށުން ވަޒީފާއެއް ލިބުނަސް ދަރިފުޅުގެ ކަންކަން ބަލަންޖެހޭތީ އެހާ ގިނައިރަށް އޭނާ ދޫކޮށްލާފައި ދެވެން ނޯންނަ ކަމަށެވެ. އޭނާގެ މަންމަމެނަށް ވެސް ދޮންކަލޯ ރުޅިގަދަވެއްޖެ ނަމަ، ހިފަހައްޓާ ނުލެވެ އެވެ.
ފަޔާޒުގެ އެ ދިރިއުޅުމުގެ ތެރެއިން އޭނާ ޓިކްޓޮކަށް ދަރިފުޅާ އެކު ނަގާފައި ހުންނަ ވީޑިއޯ ލާން ފެށީ 2024 ވަނަ އަހަރުގެ ތެރޭގަ އެވެ. އޭގެ ސަބަބުން ގިނަ ބަޔަކަށް އޭނާ އެނގި އެ އެކައުންޓު 33،000 އަށް ވުރެ ގިނަ މީހުން ފޮލޯކުރަމުން އެބަދެ އެވެ.
ދޮންކަލޯ ގޮވައިގެން، އެކަނިވެރި ބައްޕައަކު އުޅެމުން އަންނަ ގޮތް ފެނި ބައެއް މީހުން ހަމްދަރުދީވެގެން ވެސް އެ އާއިލާއަށް އެހީތެރިވެ އެވެ.
"ޓިކްޓޮކް ލައިވްތަކުގައި މީހުން އެހީވާނެ. އެކަމަކު އަހަރެން އުޅެނީ އެއަށް ބަރޯސާވެގެނެއް ނޫން. ދޮންކަލޯއަށް ލިބޭ އެލަވަންސް އާއި އަހަރެން ރުއް ކަނޑައިގެން ލިބޭ އެއްޗަކުން އުޅެނީ. އެކަމަކު ދެން ގެއެއްކޮށް އަވަހަށް ނުނިންމޭނެތާ އެއަކުން،"
ދޮންކަލޯއަށް ވީއެންމެ އަވަހަކަށް ގެ ހަދައިދިނުމަށް ވަރަށް އަވަހަށް ޓިކްޓޮކްގައި އިވެންޓެއް ބޭއްވުމަށް ދަނީ ތައްޔާރުވަމުންނެވެ. އެ ޕްލެޓްފޯމްގައި މަޝްހޫރު އެމްޓީޕީ އާއި މަރިޔަމް ސަމާ އިސްވެ ހިންގާ އެ ހަރަކާތް އޮންނާނީ އޮކްޓޫބަރު މަހުގެ އެއްވަނަ ދުވަހުގެ ރޭގަނޑު 9:00 ގައި ފަޔާޒުގެ ޓިކްޓޮކް ލައިވްގަ އެވެ.
"ދޮންކަލޯ" ގެ ނަމުގައި ބާއްވާ އެ ހަރަކާތަށް މިހާރުން ފެށިގެން ޓިކްޓޮކުގައި ދަނީ ކެމްޕެއިން ހިންގަމުންނެވެ.
ފަޔާޒު ބުނީ ގެއަށް ބޭނުންވާ ސާމާނު ހޯދައި އެ ހުރިހާ ކަމެއް ކުރަނީ އެމްޓީޕީގެ ޓީމުން މާލެގެ ފިހާރަތަކަށް ގޮސްގެން އެމީހުން ބަލައިގެން ކަމަށެވެ. އެހެންވެ އެކަމަށް ސީދާ ދާނެ ހަރަދުތައް އަދި އޭނާއަށް ވެސް ނޭނގެ އެވެ.
ފަޔާޒުގެ އުއްމީދަކީ ހާއްސަ އެހީއަށް ބޭނުންވާ މީހުންނަށް އިސްކަންދީގެން ސަރުކާރުން ހިންގާ ބޯހިޔާވަހިކަމުގެ މަޝްރޫއުތައް ހަރުދަނާވެ، އެފަދަ ކުދިން ބަލައި އާއިލާތަކަށް ވެސް ޒުވާން އުމުރުގައި ހަމަޖެހޭ ދިރިއުޅުމެއް ހޯދައިދިނުމެވެ.
"މިހާރު އެފަދަ ކުދިން ގެންގުޅޭ މީހަކަށް ވެސް އޭނާގެ ޒުވާން އުމުރުގައި މަސައްކަތްކޮށްގެން ތަނަކަށް ކުލި ދެއްކޭނީ ވެސް ދޯ. އަހަރެމެން މުސްކުޅިވާ ފަހުން ތަނެއް ލިބުނީމަ ކިހިނެއް ކުލި ދައްކާނީ. އެކުދިންނަކީ ވަޒީފާއަކަށް ދެވޭނެ ކުދިންނެއް ނޫން."
ޒުވާން އެކަނިވެރި މި ބައްޕަގެ އާދޭހަކީ ސަރުކާރުން މަޝްރޫއުތަކުން އެފަދަ އާއިލާތަކަށް މިހާރަށް ވުރެ ބޮޑަށް އިސްކަންދިނުމެވެ.