މާލޭގެ ބޮޑުތަކުރުފާނުމަގުން ބާޒާރުމަތީ ސަރަހައްދުގައި ޕާކްކުރުން މަނާކޮށްފައި ވަނިކޮށް، އެ އެންގުމާ ހިލާފަށް ޕާކް ކޮށްފައިވާ ހުރިހާ ވެހިކަލެއް ފުުލުހުން މިރޭ ޓޯކޮށްފި އެވެ.
ބޮޑުތަކުރުފާނު ފުޅާކޮށް ތަރައްގީކޮށް، އެ ސަރަހައްދުގައި ޕާކްކުރުން ފުރަތަމަ ދުވަހުން ފެށިގެން ވެސް ފުލުހުން ވަނީ މަނާކޮށްފަ އެވެ.
ނަމަވެސް ބޮޑުތަކުރުފާނުމަގު ފުޅާކޮށް، ތާރު އަޅައިގެން އަލުން ހެދުމުން ލިބުނު ބޮޑު ލުއި ގަވާއިދާ ހިލާފަށް ޕާކްކުރާ ވެހިކަލްތަކުގެ ސަބަބުން ގެއްލެމުންދާ ކަމުގެ ކަންބޮޑުވުން އާންމުން ދިޔައީ ފާޅުކުރަމުންނެވެ. އަދި ބޯޓުފަހަރުތަކަށް މުދާ ގެންދާ ވެހިކަލްތައް ތޮށިގަނޑު ކައިރިއަށް ގާތް ނުކުރެވި، މަގު މެދަށް ޥެހިކަލްތައް ހުއްޓާލަން ޖެހުމުން ޓްރެފިކް ތޮއްޖެހޭ މައްސަލަ ވަކިން ބޮޑެވެ. އެހެން ދިމާވަނީ ތޮށިގަނޑު ކައިރީގައި ގިނަ އަދަދެއްގެ ވެހިކަލްތައް ޕާކްކޮށްފައި ހުންނާތީ އެވެ.
ބާޒާރުމަތީ ސަރަހައްދުގައި ޓެކްސީތަކާއި ޕްރައިވެޓް ކާރާއި ސައިކަލްތައް ވެސް ޕާކްކުރުން އާންމުވެ އެތައް ބަޔަކަށް ބޮޑެތި އުނަދަގޫތައް ކުރިމަވަމުންދާތީ މިދިޔަ ބުދަ ދުވަހު "މިހާރު" އިން ސޯޝަލް މީޑިއާގައި ޝާއިއުކުރި "ފޮޓޯ ސްޓޯރީ" އަށް ގިނަ ބައެއްގެ ސަމާލުކަން ލިބުނެވެ. އެ ފޮޓޯތަކުން މައިގަނޑު ގޮތެއްގައި ދައްކުވައިދިނީ ބާޒާރުމަތީގެ ސަރަހައްދުގައި ޕާކްކޮށްފައިވާ އުޅަނދުތަކާ ހެދި މުޅި އެ ސަރަހައްދު ތޮއްޖެހި އެތައް ބަޔަކަށް ތަކުލީފަކަށް ވަމުންދާ މަންޒަރެވެ.
ފުލުހުން މިރޭ ބުނީ ގަވާއިދާ ހިލާފަށް ޕާކުކޮށްފައިވާ އުޅަނދު ޓޯކުރަން ފަށާފައިވާ ކަމަށާއި އެ މަސައްކަތުގެ ތެރެއިން، ރެއިން ފެށިގެން މިހާތަނަށް ހަތަރު ފުރޮޅުލީ ނުވަ އުޅަނދު ޓޯކޮށްފައިވާ ކަމަށެވެ.
ގަވާއިދާ ހިލާފަށް ޕާކުކޮށްފައިވާ އުޅަނދުތައް މަގުމަތިން ނެގުމަށް ފުލުހުން ކުރަމުން އަންނަ މަސައްކަތް މިރޭ ވެސް ކުރިއަށްދާނެ ކަމަށް ބުންޏެވެ.
އެހެންކަމުން، މަގުމަތީގައި ގަވާއިދާ ހިލާފަށް އުޅަނދު ޕާކުނުކުރުމަށާއި އަދި އެގޮތަށް ޕާކުކޮށްފައިވާ އުޅަނދުތައް ނެގުމަށް ފުލުހުން ވަނީ އިލްތިމާސްކޮށްފަ އެވެ.
އިއްޔެ އަމަލުކުރަން ފަށާފައިވާ އެއްގަމު ދަތުރުފަތުރުގެ އާ ގާނޫނުގައި ގަވައިދާ ހިލާފަށް ޕާކްކުރާ ނަމަ ބޮޑެތި ޖޫރިމަނާތައް ކަނޑައަޅާފައިވެ އެވެ.
ގާނޫނާ ހިލާފަށް ޕާކްކުރާ ނަމަ އެ ގާނޫނުގައި ވަނީ ކޮންމެ ފަހަރަކު 500ރ. އިން ޖޫރިމަނާކުރާ ގޮތަށެވެ. އަދި ޑީމެރިޓް ޕޮއިންޓް އެ ފަރާތުގެ އެއްގަމު އުޅަނދުގެ ލައިސަންސްގައި ރެކޯޑްކުރަން ޖެހެ އެވެ. މީގެ އިތުރުން ވަކި ހާއްސަ ތަންތަނެއް ކަނޑައަޅައި އެ ތަންތަނުގައި ޕާކްކޮށްފި ނަމަ 1،500ރ. އިން ޖޫރިމަނާކުރެވެ އެވެ. އެ ތަންތަނަކީ؛
- ގޯޅި ނުވަތަ މަގެއްގެ ނިކުންނަ ކަންމަތި.
- ސްކޫލްތައް ކައިރީގައި ޕާކުކުރުމަށް ކަނޑައެޅިފައިވާ ޒޯންތައް ފިޔަވައި އެހެނިހެން ސަރަހައްދުތައް.
- ބަސް ހުއްޓުމަށް ކަނޑައެޅިފައިވާ ޒޯންތައް.
- ކަފިހިހުރަސް.