ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ މެމްބަރުކަމަށް އެ ކޮމިޝަނުގައި ކުރިން ވެސް އިސްމަގާމުތައް އަދާކުރެއްވި ޝަމްއޫން ހަމީދު މިއަދު އައްޔަންކުރައްވައިފި އެވެ.
ރައީސް އޮފީހުން ބުނީ އެ އޮފީހުގައި ހެނދުނު ބޭއްވި ހާއްސަ ރަސްމިއްޔާތެއްގައި ރައީސް ޑރ. މުހައްމަދު މުއިއްޒު، އެޗްއާރުސީއެމްގެ މެމްބަރުކަމުގެ މަގާމަށް ހ. މީނާޒް، ޝަމްއޫން ހަމީދު އައްޔަން ކުރައްވާފައިވާ ކަމަށެވެ.
ޝަމްއޫނަށް މެމްބަރު ކަމުގެ ހުވާ ލައިދެއްވީ ސުޕްރީމް ކޯޓުގެ ފަނޑިޔާރު ޑރ. މުހައްމަދު އިބްރާހީމެވެ.
ޝަމްއޫން ވަނީ 2010 އިން 2012 އަށް އެޗްއާރުސީއެމްގެ އިންވެސްޓިގޭޝަން ޑިޕާޓްމަންޓުގެ ޑިރެކްޓަރުގެ މަގާމުގެ އިތުރުން 2012 އިން 2016 އަށް އެ ކޮމިޝަނުގެ ސެކްރެޓަރީ ޖެނެރަލްގެ މަގާމު އަދާކުރައްވައިފަ އެވެ.
ޔުނިވާސަލް ޕީރިއަޑިކް ރިވިއު (ޔޫޕީއާރު) ރިޕޯޓު ކުރުމުގައި އެ ކޮމިޝަނުގެ ފޯކަލް ޕޮއިންޓެއްގެ ގޮތުގައި މަސައްކަތް ކުރެއްވުމުގެ އިތުރުން، ނުކުޅެދުންތެރިކަން ހުންނަ ކުދިންނަށް ތައުލީމު ހާސިލުކުރުމަށް ހުރި ފުރުސަތުތަކާއި ކުޑަކުދިންގެ ހައްގުތައް ރައްކާތެރިކުރުމާ ގުޅޭ ގޮތުން ކުރިއަށް ގެންދިޔަ ގައުމީ ފެންވަރުގެ ދިރާސާތަކުގައި ޝަމްއޫން މުހިންމު ދައުރެއް އަދާކުރައްވާފައިވެ އެވެ.
ޝަމްއޫން އެންމެފަހުން ހުންނެވީ ދިވެހިބަހާއި ސަގާފަތާ ބެހޭ މިނިސްޓްރީގެ ޕާމެނެންޓް ސެކްރެޓަރީގެ މަގާމުގަ އެވެ.