ރާއްޖޭގައި ހިންގާ ބޮޑެތި އިންވެސްޓްމެންޓްތަކާ ގުޅޭ ކަންކަމުގައި އުފެދޭ މައްސަލަތައް ބަލަން ހާއްސަ ކޯޓުތަކެއް ހަދައި، ބޭރުގެ ތަޖުރިބާކާރު ފަނޑިޔާރުން ގެނައުމަކީ ވިސްނާލަން ރަނގަޅު ކަމެއް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފުން އައްޑޫގައި ބޭއްވި ޖަލްސާގައި ޔާމީން ވިދާޅުވީ ފޮރިން އިންވެސްޓްމެންޓްތައް ގެންނަން ކިތަންމެ ބޭނުންވިޔަސް، އެކަމަށް ގޮންޖެހުންތަކެއް އެބަހުރި ކަމަށެވެ. އެފަދަ އެއް ކަމަކީ، ޔާމީން ވިދާޅުވި ގޮތުގައި ރާއްޖޭގެ އަދުލުގެ ނިޒާމަށް އިތުބާރު ނެތުމެވެ.
ބޮޑެތި ވިފަރާރިތަކުގައި ޖެހޭ މައްސަލަތައް ކޯޓުތަކުގައި ތާށިވެ، އެތައް އަހަރެއް ހޭދަވެ އިންވެސްޓަރުންގެ އިތުބާރު ވެސް ގެއްލޭ ކަމަށް ފާހަގަކުރައްވަމުން ޔާމީން ހިޔާލު ހުށަހެޅުއްވީ އެފަދަ މައްސަލަތަކަށް ހާއްސަ ކޯޓުތަކެއް ގާއިމުކޮށް ބޭރުގެ ތަޖުރިބާކާރު ފަނޑިޔާރުން ގެނައުމަށެވެ.
"ކިހިނެއްތޯ ވާނީ ހިޔާލަކަށް، ފޮރިން އިންވެސްޓްމެންޓަށް، ދިވެހި ބޮޑެތި ވިޔަފާރިތަކަށް ވެސް މި ޖެހޭ މައްސަލަތަކާއި ނުކުންނަ ޑިސްޕިއުޓްތަކަށް ކިހިނެއްތޯ ވާނީ މާކެންޓައިލް ކޯޓުތަކެއް ހަދާފައި އެ ކޯޓުތަކަށް ސިންގަޕޫރްގައި ޕްރެކްޓިސްކޮށްފައި ތިބި ޖަޖުން ލިއްޔާ ކީއްތޯ ވާނީ،" ޔާމީން ވިދާޅުވި އެވެ.
ޔާމީން އިޝާރަތް ކުރެއްވި ގޮތުން އެކަމަކީ އެމަނިކުފާނު 2028 ވަނަ އަހަރުގެ ރިޔާސީ އިންތިހާބަށް ނެރޭ މެނިފެސްޓޯގައި ހިމެނޭ ކަމެކެވެ.
ޔާމީން ވިދާޅުވީ މިފަދަ ކޯޓުތައް ގާއިމުކޮށް އެ ތަންތަނަށް މައްސަލަތައް ހުށަހެޅުމުން ތަޖުރިބާކާރު ބޭރުގެ ފަނޑިޔާރުން އެ މައްސަލައެއް 15 ވަރަކަށް ދުވަހުން ނިންމާނެ ކަމަށެވެ. އެ ނިންމުން އަންނަ ފުރިހަމަކަމުގެ ސަބަބުން މައްސަލައިގައި ނާކާމިޔާބުވާ މީހާ ވެސް ދެން ދާން ބޭނުންވާ ކޯޓެއް ނުހުންނާނެ ކަމަށް ޔާމީން ވިދާޅުވި އެވެ.
"އެހެން ގެންނަ ފަނޑިޔާރަކަށް މައްސަލައިގެ ހަސްމަކަށް ނޫނީ ދައުލަތަށް ފޯރުވޭނެ ނުފޫޒެއް ވެސް ނޯންނާނެ،" ޔާމީން ވިދާޅުވި އެވެ.
އެހެންކަމުން، ބޭރުގެ ބޮޑެތި އިންވެސްޓަރުންގެ އިތުބާރު ދަމަހައްޓަން އެންމެ މުހިންމު ކަމަކީ ވަރުގަދަ ގާނޫނުތައް ހެދުމާ އެކު، ނުފޫޒު ނުފޯރުވޭ، ނުގަނެވޭ ވަރުގެ ނަޒާހަތްތެރި، ގާބިލް ފަނޑިޔާރުން ހޯދުން ކަމަށް ޔާމީން ވިދާޅުވި އެވެ.
ރާއްޖޭގެ ޓޫރިޒަމް އިންޑަސްޓްރީއަކީ މަލްޓި-މިލިއަން އިންޑަސްޓްރިއެއް ކަމަށާއި އޭގެ ދިފާއުގައި މިވަރުގެ ކަމެއް ނުކުރަންވީ ސަބަބެއް ނެތް ކަމަށް ޔާމީން ވިދާޅުވި އެވެ. އެ ފަނޑިޔާރުންނަށް މަހަކު 60،000 ޑޮލަރު ދޭން ޖެހުނަސް އެއީ ރާއްޖެއަށް ކުރެވޭނެ ކަމެއް ކަމަށް ވިދާޅުވި އެވެ.