ތުއްތު ކުއްޖަކަށް ޓެކްސީ ތެރެއަށް ހޮޑުލެވުމުން ކާރު ސާފުކުރުމުގެ އަގަށް 1،000ރ. ނެގީ ދެފަރާތުން އެއްބަސްވެގެން ކަމަށް އެ ޓެކްސީ އޮޕަރޭޓްކުރާ ނަލަ ޓެކްސީ ސެންޓަރުން މިއަދު ބުނެފި އެވެ.
އުމުރުން އެއް އަހަރުގެ އެ ކުއްޖާގެ މަންމަ ސޯޝަލް މީޑިއާގައި މި ވާހަކަތައް ހިއްސާކުރުމުން އާންމުންގެ ފާޑުކިޔުންތައް ބޮޑުވެފައި ވަނިކޮށް ނަލަ ޓެކްސީން ނެރުނު ބަޔާނެއްގައި ބުނީ ހުޅުމާލެ 2 އިން މާލެ ހަތް ނަމްބަރު ޖެޓީއަށް ކުރި އެ ދަތުރުގައި ބްރިޖު ލައިޓް ކައިރިން ތުއްތު ކުއްޖަކަށް ހޮޑުލެވުނު ވާހަކަ ކަސްޓަމަރު ޑްރައިވަރު ގާތުގައި ބުނި ކަމަށެވެ.
ކަސްޓަމަރު ކޮތަޅު ހުރިތޯ އެހުމުން ސީޓް ކައިރީ ކޮތަޅު ހުންނާނެ ކަމަށާއި ކާރުގެ ސީޓަށާއެކު ހޮޑުލެވިފައި ހުރުމުން އާންމުކޮށް ސީޓު ސާފުކުރުމަށް 1،500ރ. ވަރު ސާފުކޮށްދޭ ތަންތަނުން ނަގާ ކަމަށް ޑްރައިވަރު ކަސްޓަމަރު ގާތުގައި ބުނެފައިވާ ކަމަށް ނަލަ ޓެކްސީން ބުންޏެވެ.
ނަލަ ޓެކްސީން ބުނީ ޑްރައިވަރު އެހެން ބުނުމުން ކަސްޓަމަރު ފޯނުން މީހަކަށް ގުޅައި ޑްރައިވަރާ ވާހަކަދައްކައި، އޭނާ ބުނާ ތަނަކަށް ސާފުކުރުމަށް ދިއުމަށް ބުނުމުން، ކަސްޓަމަރު ދާން ބޭނުންވި ލޮކޭޝަނަށް ގަޑިއަށް ކަސްޓަމަރު ގެންގޮސްދިނުމަށް ފަހު، ފޯނުން ވާހަކަ ދެއްކި ފަރާތް ބުނި ތަނަށް ކާރުގެ ސީޓު ސާފުކުރުމަށް ޑްރައިވަރު ގޮސްފައިވާ ކަމަށެވެ.
އެވަގުތު އެތަނުން ސީޓު ސާފުކުރެވެން ނެތް ކަމަށް ބުނުމުން އެތަނާ ޖެހިގެންހުރި އެހެން ތަނަކަށް ގޮސް ސާފުކޮށްދޭ އަގު އެހުމުން 1،600ރ. ކަމަށް ބުމުން އެތަނުގެ މީހުންނާ ވާހަކަދައްކައިގެން 1،000ރ. އަށް އަޑު ކުޑަކޮށްދިން ކަމަށް ނަލަ ޓެކްސީން ބުންޏެވެ.
ނަލަ ޓެކްސީން ބުނީ ކާރު ސާފުކުރުމަށް ކަސްޓަމަރުގެ އަތުން 1،000ރ. ނަގާފައި ވަނީ އެވަގުތު ފޯނުން ގުޅައިގެން ކަސްޓަމަރުގެ ފަރާތުން ވާހަކަދެއްކި މީހާ (ކުއްޖާގެ ބައްޕަ) އާއި ދެ ފަރާތުން އެ އަގަށް އެއްބަސްވެގެން ކަމަށެވެ.
ކާރު ސާފުކުރުމުގެ މަސައްކަތް ކުރާ މަންޒަރު ފެންނަ ފޮޓޯ ވެސް ޑްރައިވަރާ ފޯނުން ވާހަކަދެއްކި މީހާއާ ހިއްސާކޮށްފައިވާ ކަމަށާއި ސީޓް ސާފުކުރުމުގެ ފައިސާ ލިބުނު ނަމަވެސް، ސާފުކުރުމަށް ދިޔަ ހަރަދު ފިޔަވާ ކަސްޓަމަރު ކުރި ދަތުރުގެ އަގުވެސް ޑްރައިވަރަށް ލިބިފައި ނުވާ ކަމަށް ނަލަ ޓެކްސީން ބުންޏެވެ.
ނަލަ ޓެކްސީން ބުނި ގޮތުގައި، މި މައްސަލައިގައި ދެ ފަރާތުން ވެސް ވާހަކަދައްކައިގެން ގޮތަކަށް އެއްބަސްވެ، ކަންކަން ކުރުމަށް ފަހު ޑްރައިވަރާއި ސެންޓަރުގެ އަގު ވެއްޓޭ ގޮތަށް ސޯޝަލް މީޑިއާގައި ހަގީގަތް އޮޅޭ ގޮތަށް ވާހަކަތައް ފެތުރުމަކީ ކަންބޮޑުވާ ކަމެކެވެ.
ކުއްޖާގެ މަންމަ، ހައްވާ މުހައްމަދު މިއަދު "މިހާރު" އަށް ބުނި ގޮތުގައި، ދަރިފުޅަށް ހޮޑުލެވުމުން އެ ވާހަކަ ޓެކްސީ ޑްރައިވަރުގެ ގާތުގައި ބުނުމާ އެކު، 1،500ރ. ދޭން ޖެހޭނެ ކަމަށް ވަގުތުން ބުނި ކަމަށެވެ.
"އެއްވެސް އެހީތެރިކަމެއް ނުދޭ. އޭނާ ބަލައިވެސް ނުލައި ބުނެފި 1،500ރ. އަށް ވުރެ ބޮޑުވާނެއޭ، ތި ސާފުކުރަން ވަރަށް ބޮޑު އެއްޗެއް ދާނެއޭ. ދެން އެ ގަޑީގައި އަޅުގަނޑު އިނީ ހާސްވެފައި، އެ ތަނުގައި ޓިޝޫ ވެސް ހުރި ޓިޝޫ ވެސް ނުދީ، އޭނާ ހަމަ ޑިމާންޑް ކުރީ 1،500ރ. އަށް،" އޭނާ ބުންޏެވެ.
ހައްވަ ބުނި ގޮތުގައި، ޓެކްސީ ދޮންނަން 1،500ރ. އަރާނެ ކަމަށް ބުނި ނަމަވެސް ކުއްޖާއަށް ލެވުނު ހޮޑު ހުރީ އެ ކުއްޖާގެ ގައިގަ އާއި ހައްވަގެ ގައިގަ އެވެ.
ހައްވަ ބުނީ ހޮޑުލަވާ ނަމަ ބޭނުންކުރާނެ ކޮތަޅު ޓެކްސީގައި ހުންނާނެ ކަމަށް ޑްރައިވަރު ބުނި ކަމަށެވެ. އެކަމަކު، އޭނާ ބުނީ ކުއްޖާއަކީ ވާހަކަ ދެއްކޭ ވަރަށް ވުރެ ކުޑަ ކުއްޖެއް ކަމަށާއި ހޮޑުލެވިޔަސް ބުނަން ނޭނގޭނެ ކަމަށެވެ.