މާލެ އާއި ހުޅުމާލެއާ ދެމެދު ދަތުރުކުރާ "ސްކޫލް ފްރެންޑްލީ" ބަސްތަކެއް ތައާރަފުކުރުމުގެ މަސައްކަތް ކުރަމުން އަންނަ ކަމަށް ޓްރާންސްޕޯޓް މިނިސްޓަރު މުހައްމަދު ސައީދު މިރޭ ވިދާޅުވެއްޖެ އެވެ.
ރައީސް އޮފީހާއި ދައުލަތުގެ މީޑިއާ ޕީއެސްއެމް ގުޅިގެން ސަރުކާރުގެ މިނިސްޓަރުންނާ އެކު ބާއްވާ "އަހާ" ފޯރަމް 8 ވަނަ އެޕިސޯޑުގައި ސައީދު ވިދާޅުވީ މާލެ ސަރަހައްދުގެ ޓްރެފިކް ބާރުބޮޑުވާ ވަގުތުތަކަށް ހާއްސަ ކޮށްގެން ދަތުރުކުރާނެ ބަސްތަކާއި ސްކޫލް ކުދިންނަށް ހާއްސަ "ސްކޫލް ފްރެންޑްލީ" ބަސްތަކެއް ތައާރަފްކުރުމުގެ މަސައްކަތް ކުރަމުން އަންނަ ކަމަށެވެ.
ސައީދު ވިދާޅުވީ ހުޅުމާލެ 1 އާއި 2 އިން މާލެއަށް މަސައްކަތަށް އަންނަ މީހުންނަށާއި ބާރު ބޮޑު ގަޑިތަކުގައި އެކިއެކި ބޭނުންތަކަށް މާލެއިން ހުޅުމާލެއަށް ދާ މީހުންނަށް ހާއްސަ ކޮށްގެން ބަހުގެ ހިދުމަތް ކުރިއަށް އޮތް ތަނުގައި ދޭނެ ކަމަށެވެ. ހުޅުމާލެއިން ވެލާނާގެ ސަރަހައްދަށް އަދި ގްރީން ޒޯނަށް ވަކި ގަޑިތަކެއް ދަތުރުކުރާ ބަސްތަކެއް ތައާރަފުކުރާނެ ކަމަށް އޭނާ ވިދާޅުވި އެވެ.
މީގެ އިތުރުން، ސްކޫލްތަކުގެ މެނޭޖުމަންޓާއި ބެލެނިވެރިންނާ މަޝްވަރާކުރުމަށް ފަހު، ދަރިވަރުންނަށް ހާއްސަ ކޮށްގެން މާލެ އާއި ހުޅުމާލެއާ ދެމެދު ސްކޫލްތަކަށް އެކަނި ދަތުރުކުރާ "ސްކޫލް ފްރެންޑްލީ" ބަސްތަކެއް ވެސް ތައާރަފުކުރާ ކަމަށް ސައީދު ވިދާޅުވި އެވެ.
ސައީދު ވިދާޅުވި ގޮތުގައި، އެގޮތަށް ބަސް ދަތުރުތައް ފަށަނީ ސައިކަލާއި ކާރުގައި އޮފީސްތަކާއި ސްކޫލުތަކަށް މީހުން ދާ ވަރު މަދުކުރުމުގެ ބޭނުމުގަ އެވެ.
"ބްރިޖާއި ހައިވޭގައި އޮންނަ ލިމިޓޭޝަންއާ އެއްކޮށް ޖާގަ ބޮޑުކުރެވެން އިތުރަށް ނޯންނާތީ އާއި މާލެ ސަރަހައްދަށް މީހުން އިތުރުވެފައި އޮތް ނިސްބަތަށް ބަލާއިރުގައި މިހާރު ފެންނަ އެންމެ އެކަށީގެންވާ އެއް ހައްލަކީ މާސް ޓްރާންސްޕޯޓް، މިހާރަށް ވުރެ ބޮޑަށް މޮބިލިޓީގެ ތެރެއަށް ގެނެވޭނެ އެއްޗަކަށް ހަދައި އެއަށް ބޭނުންވާ ސެކިއުރިޓީ އާއި ކޮމްފޯޓް ގެނެސްދިނުން،" ސައީދު ވިދާޅުވި އެވެ.
މާލޭގެ ޓްރެފިކްގެ ތޮއްޖެހުން ކުޑަކުރުމަށް ހެވީ ވެހިކަލްތަކާއި މުދާ އުފުލާ ވެހިކަލް ދުއްވޭނެ ވަކި ގަޑިތަކެއް ކަނޑައެޅުމަށް ކަމާ ބެހޭ ފަރާތްތަކާ އެކު މަޝްވަރާތައް ކުރަމުން އަންނަ ކަމަށް ވެސް ސައީދު މިރޭ ވިދާޅުވި އެވެ.