ރާއްޖޭގެ ދައުރު ބޮޑު، ކަނޑުގެ ލޮނުގަނޑު އުފުލުމާ ބެހޭ ތާރީހީ ގަރާރެއް އދ. އިން ފާސްކޮށްފި

ކަނޑުގެ ލޮނުގަނޑު މައްޗަށް ދިއުމުގެ ސަބަބުން ކުދި ޖަޒީރާ ގައުމުތަކާއި އައްސޭރިފަށުގެ ގައުމުތަކަށް ކުރިމަތިވަމުންދާ ނުރައްކާތަކުން ރައްކާތެރިވުމަށާއި އެފަދަ ގައުމުތަކުގެ ގާނޫނީ ސިޔާދަތު ދެމެހެއްޓުމަށް ބާރުއަޅައި "އދ. ގެ ކަނޑުގެ ލޮނުގަނޑު އުފުލުމާ ބެހޭ ގަރާރު" އދ. ގެ އާންމު މަޖިލީހުގެ އިއްތިފާގުން ފާސްކޮށްފި އެވެ.

މިއީ ކަނޑުގެ ލޮނުގަނޑު އުފުލުމުގެ މައްސަލައިގައި ބައިނަލްއަގުވާމީ ފެންވަރެއްގައި މިފަދަ ފުރިހަމަ ގަރާރެއް އދ. އިން ފާސްކުރި ފުރަތަމަ ފަހަރެވެ. އެ ގަރާރު ފާސްކުރީ މިދިޔަ މަހު 24 ގަ އެވެ. 

ރާއްޖެއަކީ މޫސުމީ ބަދަލުތަކާއި ކަނޑުގެ ލޮނުގަނޑު އުފުލުމުގެ މައްސަލައިގައި ބައިނަލްއަގުވާމީ މައިދާނުގައި އެންމެ އިސްވެ، ވަކާލާތުކުރަމުން އަންނަ އެއް ގައުމެވެ. މީގެ 37 އަހަރު ކުރިން، 1989 ވަނަ އަހަރު މާލޭގައި ބޭއްވި ކުދި ޖަޒީރާ ގައުމުތަކުގެ ބައްދަލުވުމުގައި އެކުލަވާލި "މާލެ ޑިކްލަރޭޝަން"އަކީ މި މަސައްކަތުގެ ފެށުމެވެ.

އދ. ގެ އާންމު މަޖިލީހުން މިދިޔަ މަހު ބޭއްވި ބައްދަލުވުމުގައި ރާއްޖޭގެ ނައިބު ރައީސް ހުސައިން މުހައްމަދު ލަތީފް ދެއްވި ތަގުރީރުގައި ވިދާޅުވެފައި ވަނީ ކަނޑުގެ ލޮނުގަނޑު އުފުލުމުގެ ނުރައްކަލުން ސަލާމަތްވުމަށް އޮތް ހައްލަކީ "ފަސްޖެހުން ނޫން" ކަމަށާއި އޭގެ ބަދަލުގައި ސާބިތުކަމާ އެކު ސަލާމަތާއި ރައްކާތެރިކަން ކަށަވަރުކުރުން ކަމަށެވެ.

ނައިބު ރައީސް ވަނީ ކުދި ޖަޒީރާ ގައުމުތަކަށް ބޭނުންވާ މާލީ އެހީތެރިކަން އަވަސްކުރުމަށާއި ބައިނަލްއަގުވާމީ ގާނޫނުތަކުގެ ދަށުން ކުދި ގައުމުތަކުގެ ހައްގުއް ފުރިހަމައަށް ކަށަވަރުކޮށްދިނުމަށް ގޮވާލައްވައިފަ އެވެ.