ކުރީގެ ނައިބު ރައީސް އަހުމަދު އަދީބު ވެސް ގޭ ބަންދަށް ބަދަލުކޮށްދިނުމަށް އާއިލާއިން މިިއަދު އެދިއްޖެ އެވެ.
އަދީބުގެ ވަކީލު މޫސާ ސިރާޖު ޕޮލިސް ކޮމިޝަނަރު އަހުމަދު އަރީފަށާއި ކޮމިޝަނަރު އޮފް ޕްރިޒަންސް އަހުމަދު ޝިހާނަށް ފޮނުއްވި ސިޓީއެއްގައި ފާހަގަ ކުރައްވާފައިވާ ގޮތުގައި މި ރޯދަމަހާ ދިމާކޮށް ސަރުކާރުން އަންނަނީ ގައިދީންނަށް ލުއިތަކެއް ދެއްވަމުންނެވެ. އޭގެ ތެރޭގައި ޓެރަރިޒަމްގެ ކުށް ސާބިތުވެފައިވާ ގައިދީން ވެސް ހިމެނޭ ކަން އެ ދެ ސިޓީގައި ސިރާޖު ފާހަގަ ކުރެއްވި އެވެ.
އޭނާ އެހެން ވިދާޅުވިއިރު، ޓެރަރިޒަމްގެ ކުށް ސާބިތުވެފައިވާ އަދާލަތު ޕާޓީގެ ރައީސް އިމްރާން އަބްދުﷲ އަދި ކުރީގެ ޑިފެންސް މިނިސްޓަރު މުހައްމަދު ނާޒިމް ވެސް ވަނީ މިދިޔަ ހުކުރުދުވަހުު، ރޯދަ މަހަށް ގޭ ބަންދަށް ބަދަލުކޮށްފަ އެވެެ.
ސިރާޖު ފޮނުއްވި ސިޓީގައި ވިދާޅުވީ އަދީބަށް ސިއްހީ އެކި މައްސަލަތައް ކުރިމަތިވަމުން ދާ ކަމަށާއި އޭގެ ތެރޭގައި ލޮލުގެ ނުރައްކާތެރި ބައްޔެއް ކަމުގައިވާ "ގްލޮކޮމާ" ވެސް ޖެހިފައިވުމާއި އެތެރެ ހަށީގައި ސިސްޓެއް އުފެދިފައިވުމާއި ކިޑްނީގައި ހިލަ ވެސް އުފެދިފައިވުން ހިމެނޭ ކަމަށެވެ. އެހެންކަމުން އަދީބުގެ އާއިލާއިން ވަނީ ބޭސްފަރުވާ އަށް ރާއްޖެއިން ބޭރަށް ދިއުމުގެ ހުއްދަ އަށް އެދިފަ އެވެ.
"ކުރިއަށް ހިނގަމުން މިދަނީ ބަރަކާތްތެރި ރަމަޟާން މަސް ކަމުގައި ވާތީ ހުކުމް ކުރެވިފައިވާ ފަރާތްތަކަށް ސަރުކާރުން ގެންދަވަނީ ރަމަޟާން މަހަށް ލުއި ދެއްވަމުންނެވެ. މީގެ ތެރޭގައި ޓެރަރިޒަމްގެ ކުށް ސާބިތުވެފައިވާ ގައިދީން ވެސް ހިމެނެ އެވެ. އަޅުގަނޑުގެ މުވައްކިލްގެ ސިއްހީ ހާލަތު ކަންވޮޑުވާ ދަރަޖަ އަށް ގޮސްފައިވާތީ، ސަރުކާރުން ރަމަޟާން މަހަށް މަހަށް ގައިދީންނަށް ދެއްވަމުން ގެންދަވާ ލުއި އަޅުގަނޑުގެ މުވައްކިލަށް ވެސް ހަމަޖައްސަވާ ދެއްވެން އެދެމެވެ،" ވަކީލު ފޮނުއްވި ސިޓީގައި ވިދާޅުވެފައި ވެ އެވެ.
"ވީމާ އަޅުގަނޑުގެ މުވައްކިލް ބަންދަށް ލުއެއް ދެއްވާ ރަމަޟާން މަހުގެ ނިޔަލަށް ގޭބަންދަށް ބަދަލުކޮށްދެއްވުން އެދެމެެވެ. އަދި އާއިލާގެ ފަރާތުން އެދިފައިވާ ގޮތަށް ބޭސްފަރުވާގެ އިންތިޒާމް ހަމަޖައްސަވައި ދެއްވުން އެދެމެވެ،"
އަދީބުު ގެންދަވަނީ ޓެރަރިޒަމާއި ކޮރަޕްޝަންގެ ތިން މައްސަލައެއްގައި 33 އަހަރުގެ ހުކުމެއް ތަންފީޒުކުރައްވަމުންނެވެ. އަދި ވެސް އެމަނިކުފާނަށް ތުހުމަތުކުރެވޭ ކޮރަޕްޝަންގެ މައްސަލަތައް ދަނީ ތަހުގީގުކުރަމުންނެވެ. ބައެއް މައްސަލަތަކުގެ އަޑުއެހުންތައް ވެސް ކްރިމިނަލް ކޯޓުގައި ކުރިއަށް އެބަ ގެންދެ އެވެ.