ޕެޓްރޯލާއި ޑީސަލުން މިހާރު ނަގަމުން އަންނަ ޑިއުޓީ އެކުގައި ކަނޑައިލުމަށް އެމްޑީޕީން ރައްޔިތުންގެ މަޖިލީހުގައި މިއަދު ގޮވާލައިފި އެވެ.
އެމްޑީޕީން މި ކަމަށް ގޮވައިލި އިރު، ސަރުކާރުން ވަނީ ޕެޓްރޯލާއި ޑީސަލުން މިހާރު ޑިއުޓީ ގޮތުގައި ނަގަމުން އަންނަ 10 ޕަސަންޓުގެ ބަދަލުގައި ފަސް ޕަސެންޓަށް ކުޑަކުރަން މަޖިލިހަށް ހުށަހަޅައިފަ އެވެ. އިދިކޮޅު ބައެއް މެމްބަރުން ވިދާޅުވި ގޮތުގައި ޑިއުޓީ ކަނޑާލައިފިއްޔާ، ހިދުމަތްތަކުގެ އަގު ހެޔޮވާން ޖެހޭނެ އެވެ.
އެކްސްޕޯޓް އިމްޕޯޓް ގާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުން ހިންނަވަރު ދާއިރާގެ މެމްބަރު އަދި އެމްޑީޕީ ޕާލަމެންޓްރީ ގްރޫޕްގެ ލީޑަރު، އިބްރާހިމް މުހައްމަދު ސޯލިހު (އިބޫ) ވިދާޅުވީ ބިލު ފާސްވުމުން ތެލުގެ އަގު ހެޔޮވެ، ރައްޔިތުންނާ ހަމައަށް އެ ބަދަލު ފޯރަން ޖެހޭނެ ކަމަށެވެ. ހާއްސަކޮށް، ކަރަންޓުގެ އަގާއި ދަތުރުފަތުރުގެ އަގާއި މަސްވެރިންނަށް ވިއްކާ ތެލުގެ އަގު ހެޔޮވާން ޖެހޭނެ ކަމަށް އޭނާ ވިދާޅުވި އެވެ.
"(ހިދުމަތްތަކުގެ އަގަށް) މި ބަދަލު ނާންނަނަމަ، މި ގެނެވޭ ބަދަލަކީ އެއްވެސް ކަހަލަ ފައިދާ ކުރަނިވި ބަދަލެއް ކަމަކަށް ގަބޫލެއް ނުކުރަން،" އިބޫ ވިދާޅުވި އެވެ.
އޭނާ ވިދާޅުވި ގޮތުގައި ޕެޓްރޯލާއި ޑީސަލުން މިހާރު ނަގަމުން އަންނަ ޑިއުޓީ ފަސް ޕަސެންޓަށް ކުޑަކޮށްފިނަމަ، ދައުލަތަށް މި އަހަރު ލިބޭ އާމްދަނީ ކުޑަވެގެންދާނެ ކަމަށެވެ.
އިބޫ ވިދާޅުވި ގޮތުގައި ދައުލަތުގެ ބަޖެޓު ފާސް ކުރި އިރު، ތެލުގެ ބާވަތްތަކުން ޑިއުޓީގެ ގޮތުގައި 10 ޕަސަންޓު ނެގުމަށް ވަނީ ނިންމައިފަ އެވެ. އެކަމަކު، އަހަރުގެ މެދު ތެރެއިން ފަސް ޕަސަންޓަށް ބަދަލު ކުރަން ނިންމުމުގެ ނަތީޖާއަކަށް ވެގެންދާނީ ލިބޭ އާމްދަނީ މަދުވުން ކަމަށް އޭނާ ވިދާޅުވި އެވެ.
"މިސާލަކަށް ކުރިއަށް އޮތް ހަ މަސް ދުވަހުގެ ތެރޭގައި 100 މިލިއަން ރުފިޔާ ލިބެން އޮތް ކަމަށް ވާނަމަ، އޭގެ ބަދަލުގައި ލިބޭނީ 50 މިލިއަން ރުފިޔާ. އަޅުގަނޑު ސާފުކޮށްލަން ބޭނުންވަނީ ހަގީގަތުގައި ދައުލަތުގެ ބަޖެޓަށް މިއިން ކުރަނީ ކޮން އަސަރެއްތޯ؟" އިބޫ ވިދާޅުވި އެވެ.
އެމްޑީޕީގެ މާލީ އަދި އިގްތިސާދީ ސިޔާސަތު ބިނާވެފައި ވަނީ ތެލުގެ ބާވަތްތަކަށް ކަމަށާއި އެމްޑީޕީގެ ސިޔާސަތަކީ ޕެޓްރޯލާއި ޑީސަލުން ޑިއުޓީ ނުނެގުން ކަމަށް އޭނާ ވިދާޅުވި އެވެ. އެމްޑީޕީ ސަރުކާރުގައި ޕެޓްރޯލާއި ޑީސަލުން ޑިއުޓީ ނުނަގަން ނިންމާފައި އޮތް އޮތުން ނިމުމަކަށް ގެނެސް، ތެލުގެ ބާވަތްތަކުން ޑިއުޓީ ގޮތުގައި 10 ޕަސަންޓް ނަގަން ފެށީ މި ސަރުކާރުން ކަމަށް ވެސް އިބޫ ވިދާޅުވި އެވެ.
އެހެންވެ، އިބޫ ވަނީ ސަރުކާރުން ހުށަހެޅި ބިލު ކޮމެޓީ މަރުހަލާގައި ދިރާސާ ކުރަމުން އަންނައިރު، ޕެޓްރޯލާއި ޑީސަލުން ޑިއުޓީ ނުނަގާ ގޮތަށް އެމްޑީޕީން ހުށަހަޅާނެ ކަމަށް ވިދާޅުވެފަ އެވެ.
މި ބިލަށް ބަހުސް ކުރެއްވި އިދިކޮޅު މެމްބަރުން ވަނީ މިއީ ކުރިއަށް އޮތް ރިޔާސީ އިންތިހާބާ ދިމާކޮށް މަކަރުވެރި، ހީލަތްތެރިކަމުގައި ކުރަން އުޅޭ ކަމެއް ކަމަށް ވިދާޅުވެފަ އެވެ. އަދި އާ ދައުރަކަށް ރައީސް ޔާމީން ވެރިކަމަށް ވަޑައިގެންފިނަމަ، އަލުން އަނެއްކާ ހުރިހާ އެއްޗެއްގެ އަގު ބޮޑުކުރާނެ ކަމަށް އޭނާ ވިދާޅުވި އެވެ.
ކުޅުދުއްފުށީ އުތުރު ދާއިރާގެ މެމްބަރު އަބްދުލްގަފޫރު މޫސާ ވިދާޅުވީ ކުރިއަށް އޮތް ދުވަސްތަކުގައި ކާޑުގެ އަގާއި ތެލުގެ އަގު ވެސް ހެޔޮ ކުރާނެ ކަމަށެވެ. ނަމަވެސް އެއީ ސަރުކާރުގެ ވަގުތީ ނިންމުމެއް ކަމަށާއި ސަރުކާރުން އުޅެނީ ރައްޔިތުންނަށް އޮޅުވާލަން ކަމަށް ވެސް އޭނާ ވިދާޅުވި އެވެ. އަދި ސަރުކާރުގެ އިހްލާސްތެރި ކަމެއް ހުރިނަމަ، ތެލުން ޑިއުޓީ ނުނެގުމަށް އޭނާ ގޮވާލެއްވި އެވެ.
"3ރ. އަށް ހުރި ހަނޑޫ ކިލޯ 9ރ. އަށް ހަދާފައި އަނެއްކާ 8ރ. އަށް ހަދާފައި ބުނަނީ ކުޑަކުޑަކޮށް ހެޔޮކޮށްލަ ދީފައޭ. ވޯޓާ ދިމާކޮށް ކޮންމެ ކަމެއް ކުރަނީ."
ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވީ އެސްޓީއޯ އަށް އެންމެ ބޮޑު އާމްދަނީއެއް ލިބެނީ ތެލުން ވިޔަފާރިކޮށްގެން ކަމަށެވެ. އެސްޓީއޯގެ ތެލުން ކުރާ ވިޔަފާރީގައި ކޮރަޕްޝަންގެ އަމަލުތަކެއް ހިނގަމުން އަންނަ ކަމަށާއި އެކަން ހުއްޓާލާނަމަ، ތެލުގެ އަގު ބޮޑުތަން ކުޑަވާނެ ކަމަށް އޭނާ ވިދާޅުވި އެވެ.