ހއ. އިހަވަންދޫގައި އުޅޭ ބިދޭސީންނާ މެދު ހަރުކަށި ފިޔަވަޅުތަކެއް އަޅައި އެ ރަށު ކައުންސިލުން ނިންމި ނިންމުން ލޯކަލް ގަވަމެންޓް އޮތޯރިޓީ (އެލްޖީއޭ) އިން މިއަދު ބާތިލްކޮށްފި އެވެ.
އިހަވަންދޫގައި ހިންގާ މިފްކޯގެ އައިސް ޕްލާންޓުގެ މެކޭނިކެއްގެ ވަޒީފާގައި އުޅުނު އިސްމާއިލް އުމަރު (އިއްސެ) މަރާލުމާ ގުޅިގެން އެ ރަށު ކައުންސިލުން ބިދޭސީންނާ ދެކޮޅަށް އެޅި ހަރުކަށި ފިޔަވަޅުގެ މައްސަލާގައި އެލްޖީއޭ އިން ބުނީ އެއީ ގާނޫނީ ގޮތުން ބާތިލު ނިންމުމެއް ކަމަށެވެ.
ކައުންސިލްތަކުގެ ބެލެނިވެރި ފަރާތުގެ ފޭސްބުކް ޕޭޖުގައި ބުނެފައި ވަނީ ފުލުހުންނާ ގުޅިގެން އާންމު ރައްކާތެރިކަމަށް މަސައްކަތް ކުރުމަށް ކައުންސިލަށް އަންގާފައިވާނެ ކަމަށެވެ.
އިއްސެ މަރާލި މައްސަލާގައި ބަންގްލަދޭޝްގެ ފަސް މީހަކު ވަނީ ހައްޔަރުކޮށްފަ އެވެ. އަދި އިއްސެ މަރާލި ކަމަށް، އައިސް ޕްލާންޓުގައި މަސައްކަތް ކުރަމުން ދިޔަ ޝުމޮން މިއާ ވަނީ އިއުތިރާފު ވެފައި ކަމަށް ފުލުހުން ވަނީ ބުނެފަ އެވެ. އިއްސެ އަށް ހަމަލާ ދޭން ޝުމޮން މިއާ ބޭނުންކުރި ވަޅި އާއި ހަމަލާ ދިންއިރު ލައިގެން ހުރި އަންނައުނު ވެސް މިހާރު ހޯދާފައިވާ ކަމަށް ފުލުހުން ބުންޏެވެ.
ކައުންސިލުން ބުނީ ބިދޭސިންނާ ދެކޮޅަށް ފިޔަވަޅުތަކެއް އެޅީ އިހަވަންދޫގައި ބިދޭސީންގެ ފަރާތުން ރަހުމް ކުޑަ ދެ މަރު ކުރިމަތިވުުމާ ގުޅިގެން ރައްޔިތުންގެ ކަންބޮޑުވުން އިންތިހާއަށް އޮތުމުންނެވެ.
އިހަވަންދޫގައި ބިދޭސީންނާ ދެކޮޅަށް އެޅި ފިޔަވަޅުތައް:
- ރޭގަނޑު 10 ގެ ފަހުން ބޭރުގައި އުޅުން މަނާ - ހުކުރު ދުވަހު 2:00-5:30 އާ ދެމެދު ފިޔަވައި ރަށުގެ އެއްވެސް ތަނެއްގައި ގްރޫޕް ހަދައިގެން ނުތިބެވުން - ކައުންސިލްގެ އިހްތިސާސް ތެރޭގައި ހިމެނޭ އެއްވެސް ސަރަހައްދަކުން މަސްވެރިކަން ކުރުން މަނާ - ރަށުގެ ވަލަށް ވަދެ ކާށި، ދަރު ފަދަ އެއްވެސް އެއްޗެއް ހޮވުން މަނާ - ކުނި އުކާލަން ނޫން ގޮތަކަށް ކުނި ގޮނޑު ސަރަހައްދަށް ނުދެވުން. - ރަށުގައި ބާއްވާ ހަފުލާތަކުގައި ދައުވަތު ލިބިގެން ނޫނީ ބައިވެރިނުވެވުން.
އިހަވަންދޫ ކައުންސިލްގެ ނިންމުމަށް ގިނަ ބަޔަކު އަންނަނީ ފާޑުކިޔަމުންނެވެ. އެގޮތުން އެންމެ ބިދޭސީއަކު ނުވަތަ ބިދޭސީންތަކެއް ކުރި ކަމެއްގެ އަދަބުު އެހެން ހުރިހާ ބިދޭސީންނަށް ދިނުމަކީ އިންސާފުތޯ ވެސް އެތައް ބަޔަކު ދަނީ ސޯޝަލް މީޑިއާގައި ސުވާލު ކުރަމުންނެވެ.