ދަގެނތި ދާއިރާގެ މެމްބަރު އިލްހާމް އަހުމަދު ވެސް މިއަދު ޕީޕީއެމުން ވަކިވެއްޖެ އެވެ.
އިލްހާމްގެ އިތުރުން ދިއްދޫ ދާއިރާގެ މެމްބަރު އަބްދުއްލަތީފް މުހައްމަދާއި ހަނިމާދޫ ދާއިރާގެ މެމްބަރު ހުސެއިން ޝަހުދީ ވެސް ވަނީ، މިހާރު އުފެދިފައިވާ ސިޔާސީ ނުތަނަވަސްކަމުގެ ތެރޭގައި މިދިޔަ ހަފުތާގައި ޕީޕީއެމުން ވަކިވެފަ އެވެ. މި ތިން ބޭފުޅުންނަކީ ވެސް ރައްޔިތުންގެ މަޖިލީހުގެ ރައީސް އަބްދުﷲ މަސީހްގެ އިތުބާރު ނެތްކަމުގެ މައްސަލާގައި ޕީޕީއެމުން ސޮއިކުރެއްވި 10 މެމްބަރުންގެ ތެރޭގައި ހިމެނިވަޑައިގަންނަވާ ބޭފުޅުންނެވެ.
އިލްހާމް ވަނީ ޕީޕީއެމްގެ ޕާލަމެންޓްރީ ގުރޫޕުގެ ޑެޕިއުޓީ ލީޑަރުކަމުންނާއި ރައްޔިތުންގެ މަޖިލީހުގެ އިގުތިސޯދީ ކޮމެޓީގެ މުގައްރިރު ކަމުން ވެސް މިދިޔަ ހަފުތާގެ ބުދަދުވަހު އިސްތިއުފާ ދެއްވައިފަ އެވެ.
ވެރިކަން ކުރާ ޕީޕީއެމަށް އިލްހާމް ފޮނުއްވި ސިޓީގައި ވިދާޅުވީ، ދިވެހި ރައްޔިތުންނަށް ޚިދުމަތް ކުރައްވަން ބޭނުންވާތީ، މިއަދުން ފެށިގެން އެ ޕާޓީން ވަކިވުމަށް ނިންމަވާފައިވާ ކަމަށެވެ.
"ޕީޕީއެމަކީ ދިވެހި ރައްޔިތުންގެ އިހުސާސްތައް ދަންނަ، ދިވެހި ރައްޔިތުންނަށް ގާނޫނުއަސާސީން ލިބިދޭ ހައްގުތަކާއި މިނިވަންކަން ޔަގީންކޮށްދޭ ޕާޓީއަކަށް ވުމަކީ އަޅުގަނޑު އަބަދުވެސް ދެކެން ބޭނުންވާ ދުވަހެކެވެ. އަޅުގަނޑުމެން މި ޕާޓީ އުފެއްދީ މި ދެންނެވި އަސާސްތަކުގެ މައްޗަށެވެ،" މިވަގުތު ރާއްޖެ އިން ބޭރުގައި އުޅުއްވާ އިލްހާމް ވިދާޅުވި އެވެ.
އިލްހާމަކީ ޕީޕީއެމް އުފެއްދުމަށް ފަހު، ވަކި ހިސާބަކުން ޖުމްހޫރީ ޕާޓީއަށް ބަދަލުވި ބޭފުޅެކެވެ. އޭނާ އަލުން ޕީޕީއެމާ ގުޅިވަޑައިގަތީ އޮކްޓޯބަރު 20، 2016ގަ އެވެ.
އިލްހާމް ޕީޕީއެމުން ވަކިވުމާ އެކު އެ ޕާޓީގެ މަޖިލިސް މެމްބަރުންގެ އަދަދު 41 އަށް ވަނީ ވެއްޓިފަ އެވެ. ޕީޕީއެމާ އެކު ކޯލިޝަން ހަދާފައިވާ އެމްޑީއޭގެ ފަސް މެމްބަރުންނާ އެކު އެ ކޯލިޝަނަށް ނިސްބަތްވާ މަޖިލިސް މެމްބަރުންގެ އަދަދަކީ މިހާރު 46 އެވެ.
ސިޔާސީ މަސްރަހަށް އައި ބޮޑު ބަދަލާއެކު، ތަފާތު ސަބަބުތަކާ ގުޅިގެން މީގެ ކުރިން އެކި މެމްބަރުން ވަނީ ޕީޕީއެމުން ވަކިކޮށްފަ އެވެ. އެއީ ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާއި ތުލުސްދޫ ދާއިރާގެ މުހައްމަދު ވަހީދު އިބްރާހީމް (ލޯޔަރު ވައްޑެ) އާއި މަޑުއްވަރީ ދާއިރާގެ މެމްބަރު މުހައްމަދު އަމީތު އަދި ވިލިނގިލީ ދާއިރާގެ ސައުދު ހުސެއިން އެވެ. ތިމަރަފުށީ ދާއިރާގެ މެމްބަރު މުހައްމަދު މުސްތަފާ ޕީޕީއެމުން އަދި ވަކި ނުކުރި ނަމަވެސް، ފަހަކަށް އައިސް އޭނާ މަޖިލީހުގައި ވޯޓު ދެއްވަނީ އެ ޕާޓީގެ ފިކުރާ ދެކޮޅަށެވެ. އަދި މުސްތަފާ ގެންދަވަނީ ޕީޕީއެމަށާއި ސަރުކާރަށް ތަފާތު ކަންކަމުގައި ފާޅުގައި ފާޑުވިދާޅުވަމުންނެވެ.