މި ސަރުކާރުގެ ބޯހިޔާވަހިކަމުގެ ފުރަތަމަ މަޝްރޫއުން ފްލެޓް ދިނީ ކިތައް ޕޮއިންޓް ލިބުނު މީހުންނަށް ކަމެއް ތަކުރާރުކޮށް ނޫސްވެރިން ސުވާލުކުރުމުން ވެސް ހައުސިން މިނިސްޓަރު ޑރ. މުހައްމަދު މުއިއްޒު މިއަދު ވިދާޅެއް ނުވި އެވެ.
ފްލެޓަށް އެދި ފޯމު ހުށަހެޅި 15،000 އަށް ވުރެ ގިނަ މީހުންގެ ދިގު އިންތިޒާރަށް ހަތަރު އަހަރު ފަހުން މިދިޔަ ހަފުތާގައި ނިމުން އައިއިރު، ލިސްޓް އާއްމުކޮށްފައި އޮތީ ފްލެޓް ލިބުނު މީހުން ސިއްރުކޮށް، ހަމައެކަނި ފޯމު ނަމްބަރާ އެކުގަ އެވެ. މި މައްސަލާގައި އެތައް ބަޔަކު ދަނީ ޝަކުވާ ކުރަމުންނެވެ. ފްލެޓް ލިބުނު ޕޮއިންޓް އިއުލާންނުކުރީ ސަރުކާރުން ބޭނުންވާ ވަކި ބަޔަކަށް ފްލެޓް ދީފައިވާތީ ކަމަށް ވެސް ދަނީ ތުހުމަތުކުރަމުންނެވެ.
މި ހިތްހަމަނުޖެހުންތައް ހުއްޓަސް އެތައް ބަޔަކު އުންމީދުކޮށްގެން ތިބީ ފްލެޓް ލިސްޓާ ގުޅޭގޮތުން އުފެދިފައިވާ ސުވާލުތަކަށް ހައުސިން މިނިސްޓްރީގެ ޕްރެސް ކޮންފަރެންސުން މިއަދު ޖަވާބު ލިބޭނެ ކަމަށެވެ. ނޫސްވެރިން ވެސް އުއްމީދުކުރީ 661 މީހުންނަށް ފްލެޓް ލިބުނު ގޮތުގެ ތަފްސީލު މިނިސްޓަރު ވިދާޅުވެދެއްވާނެ ކަމަށެވެ. ފްލެޓް ދިނީ އިންސާފުވެރިކަމާ އެކު އެންމެ ހައްގުވެރިންނަށް ކަމުގެ ޔަގީންކަން ދެއްވަން މިނިސްޓަރު 30 މިނެޓަށް ވުރެ ދިގުކޮށް ވާހަކަ ދެއްކެވިއިރު ވެސް އެންމެ މުހިއްމު ސުވާލަށް ޖަވާބެއް ނުދެއްވަ އެވެ.
ފްލެޓަށް ކުރިމަތިލީ މީހުން ވެސް އެނގެން ބޭނުންވާ އެންމެ މުހިއްމު ސުވާލަކީ ޕޮއިންޓް ދިން އުސޫލު ކަމަށްވާއިރު، އެއަށް ޖަވާބު ނުދެއްވީ ކީއްވެތޯ "މިހާރު" ތަކުރާރުކޮށް ދެންނެވުމުން ވެސް ޖަވާބެއް ނުދެއްވި އެވެ. އޭގެ ބަދަލުގައި ރައްޔިތުންނަށް ކަށަވަރުކަން ދެއްވީ ހައްގު ނޫން އެއްވެސް މީހަކަށް ފްލެޓް ދީފައި ނޯންނާނެ ކަމަށެވެ.
ފްލެޓް ލިބުނީ ކިތައް ޕޮއިންޓް ލިބުނު މީހުންނަށްތޯ ދެ ވަނަ ފަހަރަށް އެހުމުން ޖަވާބު ނުދެއްވުމުން، ތިން ވަނަ ފަހަރަށް ސުވާލުކުރުމުން ވެސް މިނިސްޓަރު ސީދާ ޖަވާބެއް ނުދެއްވައި ވިދާޅުވީ ޒާތީ މައުލޫމާތު އާއްމުނުކުރީ ހައްގުތައް ހިމާޔަތްކުރަން ކަމަށެވެ.
"އެންމެ ތަހުޒީބީ ގޮތަކީ، އެ މީހާގެ އަމިއްލަ ހައްގެއް އެއީ، އެ މީހާ އަށް ފްލެޓް ލިބުނުތޯ އެހެން މީހުންނަކަށް އެނގޭކަށް ނުޖެހޭ. އެގޮތުން އެކަން ޕްރޮޓެކްޓްކޮށްފައި އެ އޮތީ،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވި ގޮތުގައި ކުރިއަށް އޮތް ތަނުގައި ވެސް ފްލެޓަށް ހޮވުނު މީހުންނަށް ޕޮއިންޓް ލިބުނު ގޮތުގެ ތަފްސީލު އާއްމުކުރަން ހަމަޖެހިފައެއް ނުވެ އެވެ. ޕޮއިންޓުގެ އަދަދާއެކު މިނިސްޓްރީން ލިސްޓު އާއްމުނުކުރާނެ ކަމަށް މިނިސްޓަރު ތަކުރާރުކޮށް ވިދާޅުވި އެވެ.
ތަފްސީލުތަކާ އެކު ލިސްޓު އާއްމު ނުކުރުމަކީ ކަމެއް ސިއްރުކުރާ ކަމަށް ތުހުމަތު ކުރާނެ ޖާގަ ލިބޭނެ ކަމެއް ނޫންތޯ އަދި 80-90 ޕޮއިންޓް ލިބިފައި ތިބި މީހުންނަށް ފްލެޓް ނުލިބި އެއަށްވުރެން ދަށުން 30 މާކްސް ލިބިފައި ތިބި މީހުންނަށް ފްލެޓް ލިބުނު ކަމަށް ވާހަކަ ދައްކަމުންދާ ކަަމަށް ވިދާޅުވުމުން މިނިސްޓަރު ހިތްހަމަޖެހިވަޑައިނުގެން ވިދާޅުވީ ރައްޔތުންނަށް ގޯސް މައުލޫމާތު ފަތުރަމުންދާތީ ހިތާމަކުރައްވާ ކަމަށެވެ.
މުއިއްޒު ވިދާޅުވި ގޮތުގައި އެހެން ސަރުކާރުން ކުރިއަށް ގެންދިޔަ ގޮތާ ޚިލާފަށް މި ސަރުކާރުން ފްލެޓަށް މީހުން ހޮވާފައި ވަނީ ތިން ފަހަރަށް ފޯމުތައް ޗެކްކުރުމަށް ފަހު އެވެ. އަދި މިނިސްޓްރީގެ ޓީމުތައް ގޭގެއަށް ގޮސްގެން ވެސް މައުލޫމާތު އެއްކޮށްފައިވާނެ ކަމަށާއި ނުދެވޭ ގެއެއް ހުރި ނަމަ އެގޮތަށް ދިމާވެފައި ވާނީ، މިނިސްޓްރީން ތަކުރާރުކޮށް ގުޅައިގެން ނުވަތަ މައުލޫމާތު ސާފުކުރަން އެދިގެން ވެސް ޖަވާބު ނުލިބުމުން ކަމަށް ވިދާޅުވި އެވެ.
މިނިސްޓަރު ވިދާޅުވީ ފޯމު ހުށަހެޅުމުން ލިބޭ ސްލިޕްގައިވާ ޕޮއިންޓުގެ އަދަދަކީ ފައިނަލް މާކްސް ނޫން ކަމަށާއި ދިރިއުޅޭ ހާލަތާއި ހުށަހެޅި މައުލޫމާތަށް ބަލައި ޕޮއިންޓަށް އުނި އިތުރު އަތުވެދާނެ ކަން ސްލިޕުގައި ވެސް އޮންނާނީ ލިއެފަ އެވެ. ދިރިއުޅުމުގެ ހާލަތު ބަލަން ކުރި ސާވޭގައި ބައެއް މީހުން ފޯމުގައި ދޮގު މައުލޫމާތު ހިމަނާފައިވާ ކަން ފަޅާއަރާފައިވާ ކަމަށް ވެސް މިނިސްޓަރު ވިދާޅުވި އެވެ.
އޭގެތެރޭގައި، ދެ ކޮޓަރީގެ އެޕާޓްމަންޓުތަކުގައި ދިރިއުޅޭ މީހުން އެއް ކޮޓަރީގައި ދިރިއުޅޭ ކަމަށް ފޯމުގައި ޖަހާފައިވުމާއި މަންމަ ނުވަތަ ބައްޕައާ އެކު ދިރިނޫޅޭ މީހުން ވެސް މައިންބަފައިންނާ އެކު އެއް ކޮޓަރީގައި ދިރިއުޅޭ ކަމަށް ލިއެފައިވުމުގެ އިތުރުން ދޮންދަރީން ވެސް ދަރީންގެ ގޮތުގައި ހިމަނައިގެން ގިނަ މާކްސް ހޯދާފައިވާ ކަމަށް މިނިސްޓަރު ވިދާޅުވި އެވެ.
ފްލެޓަށް އެންމެ ހައްގުވެރިން ހޮވީ މި ހުރިހާ ކަމަކަށް ވެސް ބަލާފައި ކަމަށާއި ފްލެޓް ދިނުމުގައި ވަކި ބަޔަކަށް ދޭންވެގެން ކުރި އެއްވެސް ކަމެއް ނޯންނާނެ ކަަމަށް މިނިސްޓަރު ވިދާޅުވި އެވެ. އަދި ވިދާޅުވީ ފްލެޓް ދީފައިވާ ގޮތް އެންޓި ކޮރަޕްޝަން ކޮމިޝަނުން ތަހުގީގުކުރަމުންދާތީ އުފާކުރައްވާ ކަމަށެވެ.
މިނިސްޓަރު ވިދާޅުވި ގޮތުގައި މި ސަރުކާރުން ފްލެޓް ދީފައިވާ އިންސާފުވެރި އުސޫލަކީ، ނޫސްވެރިން ވެސް އެކަން ފާހަގަކޮށް ރަންއަކުރުން ލިއަން ޖެހޭ ފަދަ ބޮޑު މަސައްކަތެކެވެ.
