ސްރީ ލަންކާއަށް ރާއްޖެ އިން އަލަށް ކަނޑައެޅި ސފީރު މުހައްމަދު ހުސެއިން ޝަރީފަށް އަދިވެސް އެ ގައުމުގެ ރައީސް މައިތުރިޕާލާ ސިރިސޭނާއަށް ފަތްކޮޅު އެރުވޭ ގޮތެއް ނުވެ އެވެ. އެކަމަކު އެ މަގުސަދުގައި އޭނާ މިހާރު ވެސް ހުންނެވީ ލަންކާގަ އެވެ. އަދި އޭނާގެ ހިތްޕުޅުގައި ލަންކާއަށް އޮތް ލޯތްބާއި ގުޅުން، ހާމަކުރެއްވުމުގެ މަސައްކަތް ވެސް އެބަ ކުރައްވަ އެވެ.
ސްރީ ލަންކާގެ ނޫހެއް ކަމަށް ވާ ކޮލަމްބޯ ގެޒެޓަށް ލިއުއްވި މަޒުމޫނެއްގައި، މުންދުގެ ނަމުން މަޝްހޫރުވެފައިވާ ސަފީރު ވަނީ ކިޔަވާ ވިދާޅުވާން ވަރަށް ކުޑައިރު ލަންކާއަށް ވަޑައިގެންނެވި ހަނދާންތަކާއި އެ ގައުމުގެ އެތެރޭގެ ހަނގުރާމައިގެ ބިރުވެރި ބައެއް ހާދިސާތަކުގެ ހަނދާންތައް އާކުރައްވައިފަ އެވެ.
އޭނާ ލިއުއްވި ގޮތުގައި 1983 ގައި ލަންކާގެ އެތެރޭގެ ނަސްލީ ހަމަނުޖެހުންތައް ވެރިރަށް ކޮލަމްބޯ ސަރަހައްދަށް ފެތުރުނު އިރު، އޭނާ އުޅުއްވި ގެއާ ކައިރީގައި ހުރި އެޕާޓްމަންޓެއްގައި ހިނގި އަލިފާނުގެ ބޮޑު ހާދިސާ އާއި އެއާ ގުޅިގެން އާއިލާގެ މެމްބަރުންނާ އެކު ބިރުން ދުވެވަޑައިގެންނެވި ހަނދާން އަދިވެސް ފިލައިގެންނެއް ނުދެ އެވެ.
ވަކި ދައުލަތެއް އުފައްދަން ހަނގުރާމަކުރި ތަމަޅައިންގެ ހަމަލާތައް ސްރީ ލަންކާގެ ސިޔާސީ ލީޑަރުންނަށް ކުރިމަތިވި އިރު އޭގެ ނުރައްކާތެރި ތަޖުރިބާއެއް ވެސް މުންދު ވަނީ ކުރައްވައިފަ އެވެ. އެގޮތުން 1991 ގައި އޭރުގެ ޑިފެންސް މިނިސްޓަރު ރަންޖަން ވިޖެރަތުނަ އަވަހާރަކޮށްލި ބޮމުގެ ހަމަލާގެ ބިރުވެރިކަމުގެ ތެރެއަށް އޭނާ ވެސް ވެންނެވި އެވެ. އެ ދުވަހު ހިނގި އާންމުންގެ ހަމަނުޖެހުންތަކުގައި ގޭގެ ބިއްލޫރިތައް ވެސް ތެޅުނެވެ. އަދި ފުޅިތޮށި ހެރި އޭނާގެ ބުރަކަށި ވެސް ޒަހަމްވި އެވެ.
ފުރާއުމުރުގެ ދުވަސްތައް މުންދު ހޭދަކުރެއްވީ ލަންކާގައި، އެ ގައުމުގެ އެތެރޭގެ ހަނގުރާމައިގެ އަސަރު ހުރި އެތައް ހާދިސާތަކެއް ލޮލުން ދެކެވަޑައިގެންނެވެ. ލަންކާގައި އެ ހަމަނުޖެހުންތައް ކުރިއަށް ދިޔަ އިރު ވެސް، މުންދު ގަބޫލުކުރައްވާ ގޮތުގައި، އުޖާލާ މުސްތަގުބަލެއް ހޯދަން އެ ގައުމުގެ ރައްޔިތުން ކުރީ ވަރަށް ބޮޑު މަސައްކަތެކެވެ.
"އަހަންނަށް ސްރީ ލަންކާ އަކީ އެ ގައުމުގެ ރައްޔިތުން ދައްކާ ހިނިތުންވުމެވެ،" މުންދު ލިއުއްވި އެވެ. އަދި އެއީ ތާރީހާއި ސަގާފަތުން މުއްސަނދި ގައުމެއް ކަމަށް ވެސް ވިދާޅުވި އެވެ.
އޯލެވެލް އާއި އޭލެވެލް ވެސް މުންދު ހެއްދެވީ ސްރީ ލަންކާގަ އެވެ. އޭގެ ފަހުން މަތީ ތައުލީމު ހާސިލްކުރެއްވީ އިނގިރޭސި ވިލާތުންނެވެ. އެކަމަކު އޭނާ ވިދާޅުވި ގޮތުގައި އޭނާ އަށް ދަސްވި އިންސާނިއްޔަތުކަމުގެ އަސާސީ ސިފަތައް ލިބިވަޑައިގަތީ ލަންކާ އިންނެވެ. އަދި މިއަދުވެސް އޭނާ މަސައްކަތްކުރައްވަނީ އެ ފިލާވަޅުތައް އެހެން މީހުންނަށް ފޯރުކޮށްދެއްވަން ކަމަށް ލިއުއްވި އެވެ.
"މިހާރު" އަށް މުންދު ވިދާޅުވި ގޮތުގައި އެ ލިޔުމުގައި ހާމަކޮށްދެއްވަން ބޭނުންވީ ލަންކާއަކީ ހަމަނުޖެހުން ބޮޑު ގައުމެއްގެ ވާހަކައެއް ނޫނެވެ. އެއީ އުންމީދެއް އޮތް، ހިތްހެޔޮ، މަސައްކަތްތެރި ބަޔަކު އުޅޭ ގައުމެއް ކަން އޭނާ ފާހަގަކުރެއްވި އެވެ.
ލަންކާގައި ހުންނަވާ ދިވެހި އާ ސަފީރަކަށް މުންދު ހަމަޖެއްސީ މިދިޔަ މަހު ހަ ވަނަ ދުވަހު އެވެ. ނަަމަވެސް ލަންކާގެ ރައީސް ސިރިސޭނާއާ މުންދުގެ މަގާމުގެ ފަތްކޮޅު ނާރުވައި ވަނީ ދިގުލައިފަ އެވެ. އޭނާގެ މަގާމުގެ ފަތްކޮޅު ލަންކާގެ ރައީސަށް އެރުވުމުގެ ރަސްމިއްޔާތު ނުބާއްވައި ލަސްކުރަމުން ދަނީ ދިވެހި ސަރުކާރަށް ދަތިކުރުމުގެ ގޮތުން ކަމަށް ބުނެ އިދިކޮޅު ބައެއް ފަރާތްތަކުން އަންނަނީ ވާހަކަ ދައްކަމުންނެވެ.
އިދިކޮޅު ހަރަކާތްތައް ލަންކާގައި ވަރުގަދަ ކުރިއިރު، އެންމެ ބޮޑު އިދިކޮޅު ޕާޓީ އެމްޑީޕީގެ އެއް ބާނީ އަދި ކުރީގެ ރައީސް މުހައްމަދު ނަޝީދު ވެސް މިހާރު ލަންކާގައި އުޅުއްވާއިރު، އިދިކޮޅު ހަރަކާތުގެ މުހިންމު ބައްދަލުވުންތައް ވެސް ދޭތެރެދޭތެރެއިން އެ ގައުމުގައި އަންނަނީ ބާއްވަމުންނެވެ.
މުންދުއާ ދޭތެރޭ އިދިކޮޅު މީހުން ހިތްހަމަނުޖެހުނީ ނަޝީދު ހައްޔަރުކުރަން ސަރުކާރުން އަންގައިފި ނަމަ މަގުމައްޗަށް ނުކުންނަވައިގެން ނަމަވެސް އެކަން ކުރައްވާނެ ކަމަށް އިންޓަވިއުއެއްގައި ވިދާޅުވުމުންނެވެ.
