ރާއްޖޭގެ އުމްރާނީ ތަރައްގީ އަށް އެމްޕީއެލްގެ ސީއީއޯ އަބްދުއްރައްޒާގް ހަލީމް ކޮށްދެއްވާ މަސައްކަތް ފާހަގަކޮށް އޭނާ އަށް މިރޭ ބައިނަލްއަގްވާމީ އެވޯޑެއް ދީފި އެވެ.
ބަންގްލަދޭޝްގެ ޑާކާގެ މެރީޑިއަމް ހޮޓެލްގައި ބޭއްވި ސައުތު އޭޝިއަން ޕާޓްނާޝިޕް ސަމިޓް އެންޑް ބިޒްނަސް އެކްސެލެންސް އެވޯޑްސް ހަފުލާގައި، ހަލީމަށް ލިބިވަޑައިގަތީ ލީޑަޝިޕް ކެޓަގަރީގެ "އިންފްރާސްޓްރަކްޗާ އެންޑް ލޮޖިސްޓިކްސް އެވޯޑް" ކަމަށް އެމްޕީއެލް އިން ބުނެ އެވެ.
އެމްޕީއެލް އިން ބުނީ އެއީ ދެކުނު އޭޝިއާގައި ފާހަގަކުރެވޭ ވިޔަފާރި ކުންފުނިތަކާއި މެނޭޖްމަންޓުގައި ފާހަގަކުރެވޭ ވަކިވަކި މީހުންގެ އަގު ވަޒަން ކުރުމުގެ ގޮތުން ދޭ އެވޯޑެއް ކަމަށެވެ.
މި އެވޯޑަށް ހޮވޭ މީހުން ކަނޑައަޅާފައި ވަނީ ވޯލްޑް އެޗްއާރުޑީ ކޮންގްރެސް އާއި އޭޝިއަން ކޮންފެޑެރޭޝަން އޮފް ބިޒްނަސް އިން އެކުލަވާލާފައިވާ ފަނޑިޔާރުންގެ ޕެނަލަކުން ކަމަށް އެމްޕީއެލް އިން ބުނެ އެވެ. އެ ޕެނަލްގައި ތިއްބަވަނީ ބައިނަލްއަގްވާމީ ގޮތުން ފާހަގަކުރެވޭ ވިޔަފާރީގެ ތަޖުރިބާކާރުންނެވެ.
އެމްޕީއެލްގެ ސީއީއޯގެ މަގާމާ މި އަހަރުގެ މާޗް މަހު ހަލީމް ހަވާލުވެވަޑައިގެންފައިވާއިރު، އޭނާ ވަނީ އޭގެ ކުރިން އެމްޓީސީސީގެ ސީއީއޯގެ މަގާމާއި އެމްއާރުޑީސީގެ މެނޭޖިން ޑިރެކްޓަރުކަން ކުރައްވައިފަ އެވެ.
"އެ ދެ ކުންފުނީގައި މަސައްކަތް ކުރެއްވިއިރު ހަލީމް ވަނީ ސަރުކާރުގެ ސިޔާސަތުގެ ދަށުން، އަދި ރައީސް އަބްދުﷲ ޔާމީންގެ އިރުޝާދުގެ ދަށުން އެ ދެ ކުންފުނީގެ ހިންގުމަށް ބޮޑެތި ބަދަލުތަކެއް ގެންނަވައި، އެ ދެ ކުންފުނީގެ ރެކޯޑް ފައިދާއެއް ނެރުއްވައިފަ އެވެ،" އެމްޕީއެލް އިން ބުންޏެވެ.