ރާއްޖޭގެ ހާލަތު ބެލުމަށް މިހާރު އައިސްގެން އުޅޭ ޔޫރަޕިއަން ޔޫނިއަން (އީޔޫ) ޕާލަމެންޓްރީ ގްރޫޕްގެ ވަފްދުގެ ބޭފުޅުން ރައީސް އަބްދުﷲ ޔާމީނާ މިއަދު ބައްދަލުކޮށްފި އެވެ.
ރައީސް އޮފީހުން ބުނި ގޮތުގައި އީޔޫ ވަފުދުގެ ބޭފުޅުންނާއެކު ބޭއްވި ބައްދަލުކުރެއްވުމުގައި ރައީސް ޔާމީން ދެއްކެވި ވާހަކަފުޅުގައި ރާއްޖެ އާއި އީޔޫއާ ދެމެދު ގާތް ގުޅުމެއް އޮންނަތާ 34 އަހަރަަށްވުރެ ގިނަ ދުވަސްފައިވާ ކަން ފާހަގަކުރައްވައި، އީޔޫގެ ވަފުދަށް މަރުހަބާ ދެންނެވި އެވެ.
މީގެއިތުރުން އީޔޫން ރާއްޖެއަށް އެކި ގޮތްގޮތުން އެހީތެރިވަމުން އަންނަ ކަމަށް ރައީސް ވިދާޅުވި އެވެ. އެގޮތުން ތިމާވެށީގެ ގޮތުން ރާއްޖެއަށް ލިބިދާނެ ގެއްލުންތައް ކުޑަކުރުމަށް އީޔޫން ފޯރުކޮށްދޭ އެހީތެރިކަން ބަލައިގަނެ، ރައީސް ޝުކުރުއަދާކުރެއްވި ކަމަށް ރައީސް އޮފީހުން ބުންޏެވެ.
ރައީސް އޮފީހުގައި ބޭއްވި ބައްދަލުވުމުގައި ރާއްޖޭގެ ސިޔާސީ މަސްރަހާއި އިގްތިސާދީ ހާލަތާ ގުޅޭ ގޮތުންނާއި އީޔޫއަށް އެހީތެރިވެވޭނެ ދާއިރާތަކާ ގުޅޭގޮތުން އީޔޫގެ ބޭފުޅުންނާ ރައީސް ޔާމީން މަޝްވަރާ ކުރެއްވި ކަމަށް ރައީސް އޮފީހުން ބުންޏެވެ.
ހަމައެއާއެކު، ރާއްޖޭގެ ޝަރުއީ ދާއިރާގެ މިނިވަންކަން ދަމަހައްޓައި، ގާނޫނާއި ގަވާއިދުތައް ނެގެހެއްޓުމަށާއި އިންސާނީ ހައްގުތައް ހިމާޔަތް ކުރުމަށާއި ބައިނަލްއަގުވާމީ ދުނިޔެއާ ރަނގަޅު ގުޅުމެއް އުފައްދައިގެން ކުރިއަށް ދިއުމާ ގުޅޭގޮތުން ރައީސް ޔާމީން މަޝްވަރާ ކުރެއްވި ކަމަށް ރައީސް އޮފީހުން ބުންޏެވެ.
ޅަފަތުގައި އޮތް ޑިމޮކްރަސީ ހަރުދަނާ ކުރުމަށް ހުރި ގޮންޖެހުންތަކާއި އެފަދަ ގޮންޖެހުންތަކާ އެކު ވެސް ރާއްޖެއިން ކުރިއަށް ދިއުމަށް ކުރާ މަސައްކަތްތަކާއި އަދި ދިމިގްރާތީ ނިޒާމު އޮމާންކަމާއެކު ކުރިއަށް ގެންގޮސް ބަދަހިކުރުމަށް ކުރައްވާ މަސައްކަތްތައް ރައީސް ޔާމީން ހިއްސާކުރެއްވި ކަމަށް ރައީސް އޮފީހުން ބުންޏެވެ.
ރައީސް އޮފީހުން ބުނީ ސަރުކާރާއި އީޔޫން ގުޅިގެން މަސައްކަތް ކުރާނެ ކަމުގެ ޔަގީންކަން މި ބައްދަލުވުމުގައި ދީފައިވާ ކަމަށެވެ. އީޔޫ ޕާލަމެންޓްގެ ވަފުދުން ވަނީ ފޮރިން މިނިސްޓަރު ޑރ. މުހައްމަދު އާސިމް އާއި އިދިކޮޅު ފަރާތްތަކާ މަޝްވަރާކޮށްފަ އެވެ.
ރާއްޖޭގެ ސިޔާސީ ހާލަތު ބެލުމަށް ރޭ އައި ވަފުދުގައި ހިމެނިވަޑައިގަންނަވަނީ އީޔޫ ޕާލަމެންޓުގެ ތިން މެމްބަރަކާއި އީޔޫ ޕާލަމެންޓްރީ ސެކްރެޓޭރިއޭޓުގެ އޮފިޝަލަކާއި ރާއްޖެ އާއި ލަންކާ އަށް ކަނޑައަޅާފައިވާ އީޔޫގެ އޮފިޝަލުންނެވެ.
