ރިޔާސީ އިންތިހާބު ބޭއްވޭނެ މާހައުލެއް ގާއިމުކޮށްދިނުމުގެ މުހިންމުކަމާ ބެހޭ ގޮތުން ރައީސް އަބްދުﷲ ޔާމީނާ އެކު ވާހަކަ ދެކެވުނު ކަމަށް، ރާއްޖޭގެ ހާލަތު ބަލަން މިހާރު އައިސްގެން އުޅޭ ޔޫރަޕިއަން ޔޫނިއަން (އީޔޫ) ޕާލަމެންޓްރީ ގްރޫޕްގެ ވަފުދުން މިއަދު ބުނެފި އެވެ.
އީޔޫގެ ވަފުދުން ނެރުނު ބަޔާނެއްގައި ބުނީ އަންނަ އަހަރުގެ ރިޔާސީ އިންތިހާބު މިނިވަން އިންސާފުވެރިކަމާއެކު ކުރިއަށްދާނީ އިންތިހާބު ބޭއްވޭނެ މާހައުލެއް ގާއިމުކޮށްދީގެން ކަމަށެވެ. އަދި ރައީސް އަބްދުﷲ ޔާމީނާއެކު ބޭއްވި ބައްދަލުވުމުގައި އެކަން ފާހަގަކޮށްފައި ވާނެ ކަމަށާއި އިންސާފުވެރި އިންތިހާބެއް ބޭއްވުމަށް މަގުފަހިކޮށް ދިނުމަށް ރައީސް ޔާމީނަށް ހުށަހެޅި ކަމަށް ބަޔާނުގައިވެ އެވެ.
މީގެއިތުރުން މީޑީއާގެ މިނިވަންކަމާއި މުޖުތަމައުގެ ތެރޭގައި ހަރަކާތްތެރިވުމުގެ ފުރުސަތު ވަރަށް ބޮޑަށް ހަނިވެފައިވާތީ އެކަމުގެ ކަންބޮޑުވުން ރައީސް ޔާމީނާ ހިއްސާކުރެއްވި ކަމަށް އެ ބަޔާނުގައިވެ އެވެ.
އީޔޫގެ ބަޔާނުގައި ބުނީ މި ދަތުރުގެ ސަބަބުން ރާއްޖޭގެ ސިޔާސީ މަސްރަހުގައި މިހާރު ހިނގަމުން ދާ ކަންކަން ދެނެގަނެ، އެ ކަންކަމާ ގުޅޭ ގޮތުން އީޔޫން ދެކޭ ގޮތް ކަމާ ބެހޭ ފަރާތްތަކާ ހިއްސާ ކުރެވުނު ކަމަށެވެ. ހާއްސަކޮށް، ޑިމޮކްރަސީ އާއި އިންސާނީ ހައްގުތަކާ ގުޅޭގޮތުން ދެވެން އޮތް އެހީތެރިކަމެއް ކުރިއަށް އޮތް ތަނުގައި ވެސް އީޔޫން ދޭނެ ކަމުގެ ޔަގީންކަން އެ ބަޔާނުގައިވެ ދީފައިވެ އެވެ.
އީޔޫގެ ވަފުދުން ވަނީ ރައީސް ޔާމީންގެ އިތުރުން ފޮރިން މިނިސްޓަރު ޑރ. މުހައްމަދު އާސިމާއި ރައްޔިތުންގެ މަޖިލީހުގެ ރައީސް އަބްދުﷲ މަސީހާއި އެޓާނީ ޖެނެރަލް މުހައްމަދު އަނިލް އާއި ޕްރޮސެކިއުޓާ ޖެނެރަލް އައިޝަތު ބިސާމާއި އިދިކޮޅު ފަރާތްތަކާ ބައްދަލުކޮށްފަ އެވެ.
އައްޑޫގައި އީޔޫން ހިންގާ ކްލައިމެޓް ޗޭންޖް އެޑަޕްޓޭޝަން ޕްރޮޖެކްޓް (ސީސީއޭޕީ)ގެ ކަންކަން ކުރިއަށް ގެންދާ ގޮތް ބަލައިލުމަށް އެ ސިޓީ އަށް ވެސް އީޔޫގެ ވަފުދު ޒިޔާރަތް ކުރި އެވެ.
އީޔޫ ޕާލަމެންޓްރީ ގުރޫޕުގެ އިސް ވަފުދެއް ރާއްޖެ އައިސްފައިވާއިރު، ފްރާންސްގެ ސްޓްރަސްބާގްގައި މި މަހުގެ ފަސްވަނަ ދުވަހު ބޭއްވި އެ ޕާލަމަންޓުގެ ބައްދަލުވުމުގައި ވަނީ ރާއްޖެއަށް ފިޔަވަޅު އެޅުމަށް ގަރާރެއް ފާސްކޮށްފަ އެވެ. ދިވެހި ސަރުކާރުން ބުނެފައި ވަނީ ރާއްޖެއާ ދެކޮޅަށް ފިޔަވަޅު އަޅާނެ ކަމަށް ގަބޫލު ނުކުރާ ކަމަށެވެ.
ރާއްޖޭގެ ސިޔާސީ ހާލަތު ބެލުމަށް ރޭ އައި ވަފުދުގައި ހިމެނިވަޑައިގަންނަވަނީ އީޔޫ ޕާލަމެންޓުގެ ތިން މެމްބަރަކާއި އީޔޫ ޕާލަމެންޓްރީ ސެކްރެޓޭރިއޭޓުގެ އޮފިޝަލަކާއި ރާއްޖެ އާއި ލަންކާ އަށް ކަނޑައަޅާފައިވާ އީޔޫގެ އޮފިޝަލުންނެވެ. މި ވަފްދު މާދަމާގެ ވަގުތެއްގައި ރާއްޖެ އިން ފުރާނެ އެވެ.
