މާލޭގައި ފުޅާ ދާއިރާއެއްގައި ރީޓެއިލް ވިޔަފާރިކުރާ ރެޑް ވޭވްގެ ހަތް ވަނަ ފިހާރަ މާފަންނުގައި މިރޭ ހުޅުވައިފި އެވެ.
އެ ފިހާރައިގައި ބޭއްވި ކުޑަ ހަފުލާއެއްގައި ރަސްމީކޮށް އެތަން ހުޅުއްވައި ދެއްވީ ރެޑް ވޭވްގެ ޖެނެރަލް މެނޭޖަރު އަދި ބާރަށު ދާއިރާގެ ޕީޕީއެމްގެ މެމްބަރު އިބްރާހިމް ޝުޖާއު އެވެ.
މަޝްހޫރު ވިޔަފާރިވެރިޔާ އަދި އޭދަފުށީ ދާއިރާގެ ޕީޕީއެމްގެ މެމްބަރު އަހުމަދު ސަލީމްގެ ރެޑް ވޭވްގެ އާ ފިހާރަ ހުޅުއްވައި ދެއްވުމަށް ފަހު، ޝުޖާއު "މިހާރު" އަށް ވިދާޅުވީ، އެތަނުން ވެސް ރެޑް ވޭވްގެ އެހެން ފިހާރަތަކުން ލިބޭ ހުރިހާ މުދަލެއް އެއް އަގެއްގައި ލިބެން ހުންނާނެ ކަމަށެވެ.
"ރެޑް ވޭވްގެ މާލޭގައި ހުންނަ ފިހާރައެކޭ ހުޅުމާލޭގައި ހުންނަ ފިހާރައެކޭ އަގުގެ އެއްވެސް ތަފާތެއް ނުހުންނާނެ. އަދި ރެޑް ވޭވް ފިހާރަ އަކީ އާއްމު އެހެން ފިހާރަތަކަށް ވުރެ އެތައް ގުނައެއް އަގުހެޔޮވާނެ،" ދުނބުރި މިސްކިތް ހުންނަ ކާނޭޝަން މަގުގައި ހުޅުވި ފިހާރައާ ގުޅޭ ގޮތުން އޭނާ ވިދާޅުވި އެވެ.
ޝުޖާއު ވިދާޅުވި ގޮތުގައި ރެޑް ވޭވުން މަސައްކަތް ކުރަނީ ބާޒާރުގައި އަގު އުފުލޭ ބާވަތްތަކުގެ މުދާ އާއްމުންގެ އަތްފޯރާ ހިސާބަށް ގެނެސް ދިނުމަށެވެ. އަދި ކާބޯތަކެތީގެ އިތުރުން އާއްމުކޮށް ގޭގެ އަށް ބޭނުންވާ ހުރިހާ ސާމާނެއް ވެސް ވީހާ ވެސް ހެޔޮ އަގެއްގައި ފޯރުކޮށްދިނުމަށް މަސައްކަތް ކުރާ ކަމަށް އޭނާ ވިދާޅުވި އެވެ.
ޝުޖާއު ވިދާޅުވީ ފަރުނީޗަރު ފިހާރަ އަކާއި މޮބައިލް ފޯނު ވިއްކާ ފިހާރައެއް ވެސް ރެޑް ވޭވުން ހުޅުވަން ނިންމާފައިވާ ކަމަށެވެ. ފަރުނީޗަރު ފިހާރަ ހުޅުވަން މަސައްކަތް ކުރަނީ އަންނަ ޖެނުއަރީ މަހު ހެންވޭރުގަ އެވެ. މޮބައިލް ފޯނު ވިއްކާ ފިހާރަ ހުޅުވަން މަސައްކަތް ކުރަނީ އަންނަ އަހަރުގެ މާޗް މަހު އެވެ.
ރެޑް ވޭވުން ވަނީ ހުޅުމާލޭގެ ނެއިބާ ހުޑް އެކެއްގައި ބޮޑު ސުޕަ މާކެޓެއް ހެދުމުގެ މަސައްކަތް ވެސް މިހާރު ފަށައިފަ އެވެ.
ޝުޖާއު ވިދާޅުވީ ހުޅުމާލޭގައި ހަދާ ރެޑް ވޭވްގެ މެގަ މޯލް އަންނަ އަހަރުގެ ރޯދަ މަހަށް ހުޅުވުމަށް މަސައްކަތް ކުރަމުން އަންނަ ކަމަށެވެ.
"މި ފިހާރަ ވެގެން ދާނީ ރާއްޖޭގެ އެންމެ ބޮޑު ސުޕަ މާކެޓަށް. އެ ފިހާރަ އިން ވެސް ކާބޯތަކެއްޗާއި ގޭތެރެ އަށް ބޭނުންވާ ސާމާނު ލިބެން ހުންނާނެ،" އޭނާ ވިދާޅުވި އެވެ.
ރެޑް ވޭވުން މާލޭގައި މިހާރު ވެސް ފަސް ފިހާރައިގެ އިތުރުން ހުޅުމާލޭގައި ރެޑް ވޭވް ސިޓީ ސްކޮއާގެ ނަމުގައި ބޮޑު ފިހާރައެއް ހިންގަ އެވެ. އެއީ ހުޅުމާލޭގައި ހިންގާ އެންމެ ބޮޑު ފިހާރަ ވެސް މެ އެވެ.
