އިލެކްޓްރޯނިކް ވޯޓިންއާ ދެކޮޅު ހަދައި ފާޑުކިޔުން އަމާޒުކުރަނީ އެކަމުގެ މައުލޫމާތު ރަނގަޅަށް ނޭނގި ތިބެ ކަމަށް އިލެކްޝަންސް ކޮމިޝަނުން މިއަދު ބުނެފި އެވެ.
ރާއްޖެ އަށް އީ ވޯޓިން މުހިއްމު ނޫން ކަމަށް ކުރީގެ އިލެކްޝަންސް ކޮމިޝަނަރު ފުއާދު ވިދާޅުވެފައިވާތީ އެކަމާ ގުޅޭގޮތުން ވާހަކަ ދައްކަވަމުން ކޮމިޝަންގެ މެމްބަރު އަހްމަދު އަކްރަމް ވިދާޅުވީ އެންމެ ފުރަތަމަ އީ ވޯޓުންގެ މަސައްކަތް ފެށީ ވެސް ފުއާދު ކޮމިޝަނަރަކަށް ހުންނެވިއިރު 2011 ގައި ކަމަށެވެ. އެ މަސައްކަތް ފެއްޓެވީ ރާއްޖެ އަށް މުހިއްމު ނިޒާމަކަށް ވާތީ ކަން ފާހަގަކުރައްވައި އަކްރަމް ވިދާޅުވީ ކައުންސިލް އިންތިހާބު އެއްކޮށް އިލެކްޓްރޯނިކް ވޯޓިން އަށް ބަދަލުކުރުމުގެ ވިސްނުމެއް އެ ކޮމިޝަންގައި ނެތް ކަމަށެވެ.
"އަޅުގަނޑުމެން ދަންނަވަމުން މި އަންނަނީ އެންމެ ތިން ފޮއްޓެއްގައޭ އީ ވޯޓިން ބޭނުން ކުރާނީ. އެއީ ހަމައެކަނި ވޯޓު ކަރުދާސް ގުނުމަށް. އާއްމުކޮށް ވޯޓުލުން ކުރިއަށް ގެންދާ ގޮތާ މާބޮޑު ތަފާތެއް ނާންނާނެއޭ،" އަކްރަމް ވިދާޅުވި އެވެ.
އަންނަ ޖެނުއަރީ މަހު ބާއްވާ ލޯކަލް ކައުންސިލް އިންތިހާބުގައި އީ ވޯޓިން ތައާރަފްކުރަން ކޮމިޝަނުން މަސައްކަތް ފަށާފައިވީ ނަމަވެސް އީ ވޯޓިންއާ އެކު އިންތިހާބު ބާއްވަން އިދިކޮޅު ސިޔާސީ ޕާޓީތަކުން ދެކޮޅެވެ. އެމްޑީޕީ އާއި އަދާލަތުގެ އިތުރުން ޖުމްހޫރީ ޕާޓީން ވެސް ބުނެފައި ވަނީ އީ ވޯޓިން އަށް އިތުބާރެއް ނެތް ކަމަށެވެ.
އަކްރަމް ވިދާޅުވީ އިންތިހާބާއި އީ ވޯޓިން އަށް ހޭލުންތެރިކުރަން އެ ކޮމިޝަނުން އަންނަނީ ގިނަ މަސައްކަތްތަކެއް ކުރަމުންނެވެ. ކުރިއަށް އޮތް ތަނުގައި ވެސް އީ ވޯޓިންއާ ގުޅޭގޮތުން ސިޔާސީ ޕާޓީތަކާ އެކު ގިނަ މަޝްވަރާތަކެއް ކުރިއަށް ގެންދާނެ ކަމަށް ވެސް އަކްރަމް ވިދާޅުވި އެވެ.
އިލެކްޝަންސް ކޮމިޝަނަށް އިތުބާރު ނެތް ކަމަށް ސިޔާސީ ޕާޓީތަކުން ބުނާ ބުނުމަށް ރައްދު ދެއްވައި އަކްރަމް ވިދާޅުވީ "އިތުބާރު ކުރެވޭތޯ ނުވަތަ ނޫންތޯ ކަނޑައެޅޭނީ އެ ކޮމިޝަނުން އިންތިހާބެއް ބޭއްވުމުން" ކަމަށެވެ. ކޮމިޝަނަކީ ނުފޫޒެއް ނެތް މިނިވަން ކޮމިޝަނެއް ކަމަށް ވެސް އޭނާ ވިދާޅުވި އެވެ.
އިލެކްޝަންސް ކޮމިޝަނުން ނިންމާފައި ވަނީ ކައުންސިލް އިންތިހާބުގައި ރާއްޖޭގެ ތިން ސަރަހައްދެއްގއި އިލެކްޓްރޯނިކް ވޯޓިން ކުރިއަށް ގެންދިއުމަށެވެ. އެކަމަކު އެއީ ކޮން ސަރަހައްދުތަކެއް ކަމެއް އަދި ކަނޑައެއްނާޅަ އެވެ.