އަންނަ މަހު 23ގައި ބާއްވާ ރިޔާސީ އިންތިޚާބުގެ ވަގުތީ ނަތީޖާ ޝީޓް، ވޯޓު ލާ ނިމުމާއެކު ވޯޓިން މަރުކަޒުގައި ހަރުކޮށް އާއްމުކުރާނެ ކަމަށް އިލެކްޝަންސް ކޮމިޝަނުން މިއަދު ބުނެފި އެވެ.
އިންތިޚާބުގެ ނަތީޖާ އާއްމު ކުރުމާ ގުޅޭގޮތުން، އީސީގެ މެމްބަރު އަހުމަދު އަކްރަމް ވިދާޅުވީ، ނަތީޖާ އިއުލާން ކުރާނީ ކުރީ އިންތިހާބުތަކުގައި ވެސް އެކަން ކޮށް އުޅުނު ގޮތަށް ކަމަށާއި އެއްވެސް ކަމަކަށް ބަދަލު ނުގެންނަ ކަމަށެވެ.
އަދި އިންތިޚާބުގެ ނަތީޖާ ޓެބްލެޓްތައް މެދުވެރިކޮށް ވޯޓު ލާ މަރުކަޒުތަކުން އީސީއަށް ފޮނުވުމުގެ ކުރިން، އެ ނަތީޖާ ހިމެނޭ ޝީޓު، ވޯޓިން މަރުކަޒުގައި ތަތްކުރާނެ ކަމަށް އަކްރަމް ވިދާޅުވި އެވެ.
ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް ކުރެއްވި ޓްވީޓްގައި ވިދާޅުވީ އިންތިޚާބުގެ ނަތީޖާ، ޓެބްލެޓަށް އެންޓާ ކުރުމަށް ފަހު އީސީން އެ ނަތީޖާ ގަބޫލު ނުކުރަނީސް، ނަތީޖާ ޝީޓް ޕްރިންޓް ނުކުރެވޭނެ ކަމަށެވެ. އަދި ވޯޓު ގުނަން ޓެބްލެޓް ބޭނުން ކުރުމަކީ ގާނޫނު އަސާސީއާ ހިލާފް ކަމެއް ކަމަށް ވެސް އޭނާ ވިދާޅުވި އެވެ.
މަހުލޫފްގެ މި ޓްވީޓަށް ޖަވާބު ދެއްވަމުން، އިލެކްޝަންސް ކޮމިޝަނުގެ ކުރީގެ ރައީސް ފުއާދު ތައުފީގް ވެސް ވަނީ، ވޯޓު ގުނުމަށް ފަހު އެ ފޮށީގެ ނަތީޖާ ވަގުތުން އިއުލާން ކުރަން ޖެހޭނެ ކަމަށް ވިދާޅުވެފަ އެވެ.
އަކްރަމް ވިދާޅުވި ގޮތުގައި މަހްލޫފް އެ ފަދަ ޓްވީޓްތައް ކުރައްވަނީ، އިންތިޚާބާ ގުޅޭގޮތުން ރައްޔިތުންގެ ހިތުގައި ޝައްކު އުފެއްދުމަށެވެ. އަދި އެކަން އޭނާ ކުށްވެރިކުރެއްވި އެވެ.
އީސީން ވަނީ އިންތިހާބުގެ ނަތީޖާ އީސީއަށް ފޮނުވުމަށް، 500 ޓެބްލެޓް ހޯދުމަށް ފިނޭންސް މިނިސްޓްރީގައި އެދިފަ އެވެ.
މީގެ ކުރިން ބޭއްވި އިންތިޚާބުތަކުގައި، ވޯޓުގެ ނަތީޖާ އިލެކްޝަންސް ކޮމިޝަންގެ އިންތިޚާބީ މައި މަރުކަޒަށް ފޮނުވަނީ ފެކްސް އާއި ނެޓްބުކް މެދުވެރިކޮށެވެ. އެކަމަކު، މިފަހަރު ނަތީޖާ ފޮނުވަން ހަމަޖައްސާފައި ވަނީ ޓެބްލެޓުންނެވެ.
ފުރަތަމަ ބުރުން ރައީސަކު އައްޔަންކުރާ، މި އިންތިޚާބުގައި 491 ވޯޓު ފޮށި ބަހައްޓާއިރު 263،000 މީހަކަށް ވޯޓުލުމުގެ ހައްގު ލިބިގެންވެ އެވެ.