ޖަލު ހުކުމެއް ތަންފީޒު ކުރަމުން ގެންދަވާ ކުރީގެ ނައިބު ރައީސް އަހުމަދު އަދީބު ގޭ ބަންދަށް ބަދަލުކޮށްދޭން އޭނާގެ އާއިލާއިން އެދިއްޖެ އެވެ.
ތަފާތު ތިން ކުށެއް ސާބިތުވެ 33 އަހަރުގެ ޖަލު ހުކުމެއް ތަންފީޒު ކުރަމުން ގެންދަވާ އަދީބު ގޭ ބަންދަށް ބަދަލުކޮށްދިނުމަށް އާއިލާއިން އެދުނީ އޭނާގެ ލޮލަށް ދިމާވެފައިވާ މައްސަލައިގެ ސަބަބުންނެވެ.
އަދީބުގެ އަނބިކަނބަލުން މަރިޔަމް ނަޝްވާ ކުރެއްވި ޓްވީޓެއްގައި ވަނީ އަދީބުގެ ލޮލަށް ދިމާވެފައިވާ މައްސަލައިގެ ސަބަބުން، ހިރަފުސް ނުހުންނަ ތަނެއްގައި އޭނާ ބަހައްޓަން ޑޮކްޓަރުން ލަފާ ދީފައިވާ ކަމަށެވެ. އެހެންވެ، އަދީބު ގޭ ބަންދަށް ބަދަލު ކޮށްދޭން ކަމާބެހޭ އިދާރާތަކުގައި އެދިވަޑައިގެންފައިވާ ކަމަށް އެ ޓްވީޓްގައިވެ އެވެ.
އަދީބުގެ އާއިލާއިން ކުރިން ބުނެފައިވާ ގޮތުގައި ލޮލަށް ޖެހޭ ބައްޔެއް ކަމަށްވާ "ގްލުކޮމާ" އަދީބަށް ވަނީ ޖެހިފަ އެވެ. އަދި އެތެރެ ހަށީގައި ސިސްޓެއް އުފެދިފައިވާ ކަމަށް ވެސް އާއިލާއިން ބުނެފައިވެ އެވެ.
އަދީބު ގެއަށް ބަދަލުކޮށްދޭން އާއިލާއިން އެދުނުއިރު އިތުރު ފަރުވާއަށް އަދީބު ރާއްޖެއިން ބޭރަށް ފޮނުވުމުގެ އަމުރަކަށް އެދި އަދީބުގެ ފަރާތުން ވަނީ ދައުލަތާ ދެކޮޅަށް ސިވިލް ކޯޓުގައި ދައުވާކޮށްފަ އެވެ. އެ މައްސަލަ މިހާރު ދަނީ ހިނގަމުންނެވެ.
