މަޖުބޫރު ކަމެއް ނެތް، އަދިވެސް ހުންނާނީ ރައީސް ޔާމީނާ އެކު: ޣައްސާން

ރައީސް އަބްދުﷲ ޔާމީނާ އެކު ހުންނަވަނީ އެއްވެސް މަޖުބޫރު ކަމެއް އޮވެގެން ނޫން ކަމަށާއި ކުރިއަށް އޮތް ތަނުގައި ވެސް ހުންނަވާނީ އެމަނިކުފާނާ އެކުގައި ކަމަށް ރައީސް އޮފީހުގެ ސްޓޭޓް މިނިސްޓަރު އަދި ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ޣައްސާން މައުމޫން މިރޭ ވިދާޅުވެއްޖެ އެވެ.

ރައީސް ޔާމީނާއި މައުމޫނާ ދެމެދު އުފެދުނު ޚިޔާލު ތަފާތުވުންތަކުގައި އިދިކޮޅު ފަރާތްތަކާ އެކު މައުމޫން މަސައްކަތް ފެއްޓެވިޔަސް ޣައްސާނާއި އެއްބަނޑު އެއްބަފާ ދައްތާފުޅު ދުންޔާ މައުމޫން ތިއްބެވީ މި ސަރުކާރުގެ އިސް މަގާމްތަކުގަ އެވެ. އެކަމަކު ބައްޕާފުޅު މައުމޫނާއި ބޭބޭފުޅު އަހުމަދު ފާރިސް މައުމޫނާއި ދައްތާފުޅު ޔުމްނާ މައުމޫން ތިއްބެވީ އިދިކޮޅު ކޯލިޝަންގަ އެވެ.

ޕީއެސްއެމްގެ ޕްރޮގްރާމެއްގައި މިރޭ ވާހަކަ ދައްކަވަމުން ޣައްސާން ވިދާޅުވީ އޭނާއަށް ދަސްކޮށް ދެއްވާފައި ވަނީ ކަންކަން ބަލައި، ކޮންމެ ކަމެއްގައި ވެސް އަމިއްލައަށް ގޮތް ނިންމުމުގެ އުސޫލް ކަމަށެވެ. ރައީސް ޔާމީނާ އެކު އޭނާ ހުންނެވީ އެގޮތުން ކަމަށް ވެސް ވިދާޅުވި އެވެ.

ރައީސް ޔާމީނާއެކު ހުންނެވިއަސް، ޣައްސާން ވިދާޅުވި ގޮތުގައި، އޭގެ ސަބަބުން އާއިލާގެ ތެރޭގައި އޮތް ގުޅުންމުން ދުވަހަކު ވެސް ވަތްކެއް ނުވާނެ އެވެ. އާއިލީ ގުޅުން އެއަށް ވުރެ ބަދަހިކަމަށް ވިދާޅުވި އެވެ.

"އަޅުގަނޑުމެން ތަރުބިއްޔަތުކޮށް ދެއްވާފައި ތިބީ ކޮންމެ މައްސަލައެއް ވެސް އަމިއްލައަށް ދިރާސާކޮށް، ކަން އޮތްގޮތް ބަލައި، އޭގެ ހަގީގަތް އަމިއްލަ ބުއްދީގެ ބޭނުންކޮށް ހޯދައިގެން ގޮތްތަކެއް ނިންމަން. އެގޮތުން އަޅުގަނޑު މިހާރު ވެސް ހުންނާނީ ވަރަށް ސާބިތުވެ ރައީސް ޔާމީނާ އެކު،" ޣައްސާން ވިދާޅުވި އެވެ.

ޣައްސާން ރައީސް ޔާމީނާ ސަލާމް ކުރައްްވަނީ: ރައީސް ޔާމީނާއެކު ހުންނެވިއަސް އާއިލީ ގުޅުމަށް ބުރުލެއް ނާރާނެ ކަމަށް ވިދާޅުވި.

ބައްޕާފުޅާއި ބޭބޭފުޅު ވެސް މި ސަރުކާރަށް ވަރަށް ބޮޑަށް ފާޑުވިދާޅުވަމުން ގެންދަވާއިރު، ޣައްސާން ސަރުކާރުން ދުރަށް ވަޑައިނުގެން ހުންނެވީ މަޖުބޫރީ ހާލަތެއް އޮވެގެން ކަމަށް ކުރާ ތުހުމަތުތަކަށް ރައްދު ދެއްވައި ވިދާޅުވީ ރައީސް ޔާމީނާ އެކު އަދިވެސް ހުންނެވީ އޮގަސްޓް، 2012 އިން ފެށިގެން އޭނާ ހުރީ އެއް ގޮތެއްގައި ކަމަށްވާތީ ކަމަށެވެ. ރައީސް ޔާމީނާ އެކު އޭނާ ހުންނެވުމާ ގުޅުވައިގެން ދައްކަމުންދާ ވާހަކަތަކަށް ރައްދު ނުދެއްވަނީ ބަޔަކު ދައްކާ ކޮންމެ ވާހަކައަށް ރައްދު ދެއްވަން ބޭނުން ނުވާތީ ކަމަށް ވެސް ވިދާޅުވި އެވެ.

"އެ ދުވަހު ރާއްޖޭގެ ވެރިކަމަށް ކުރިމަތިލައްވަން ރައީސް ޔާމީނަށް ދަންނަވަން އަޅުގަނޑުމެން ދިޔަ ދުވަހުން ފެށިގެން އެހެން ގޮތަކަށް އަޅުގަނޑު ބަދަލެއް ނުވަން. އަޅުގަނޑަކަށް ހިޔެއް ނުވޭ ހުރި ގޮތް ބަދަލު ނުވަންޏާ މާ ގިނަ ޖަވާބެއް ދޭން ޖެހޭ ހެނެއް،" ދެހާސްތޭރައިގެ ރިޔާސީ އިންތިޚާބަށް ނިކުމެވަޑައިގަތުމަށް ރައީސް ޔާމީނަށް ދެންނެވި ދުވަހަށް އިޝާރާތް ކުރައްވައި، ޣައްސާން ވިދާޅުވި އެވެ.

ބޮޑެތި މަޝްރޫއުތައް ހިނގަމުންދާ ގޮތް ބެލުން ރައީސް ހަވާލު ކުރައްވާފައިވާ ޣައްސާން ވިދާޅުވީ ތަރައްގީގެ ހުރިހާ މަޝްރޫއެއް ވެސް ހިންގަނީ އޮންނަ އުސޫލުތަކުގެ މަތިން ކަމަށާއި އެ ހުރިހާ މަޝްރޫއެއް ވެސް ވަރަށް ކައިރިން ސަރުކާރުން ބަލަމުންދާ ކަމަށެވެ. އަދިވެސް ކޮރަޕްޝަނަށް މަގުފަހިވާ ގޮތަށް އެއްވެސް ކަމެއް ކުރުމުގެ ފުރުސަތު ސަރުކާރުން ނުދޭ ކަމަށް ވިދާޅުވެ، ރައީސް ޔާމީންގެ ސިޔާސަތުތަކަށް ޣައްސާން ތާއީދު ކުރައްވައި، ވާހަކަ ދެއްކެވި އެވެ.

"ފައިސާ ދޫކުރަނީ ވެސް އެ ބުނާ މަސައްކަތް ކުރިކަމަށް ކޮންސަލްޓަންޓުން ސޮއި ކުރައްވާފައި ކަށަވަރު ކުރެއްވުމުން. މިކަހަލަ ޗެކް އެންޑް ބެލެންސަސް ގާއިމް ކުރައްވާފައި ރައީސް ޔާމީން ހުންނެވީ. މިކަންކަން ވަރަށް ކައިރިން ފެންނާތީ އަޅުގަނޑު މިހެން މި ވާހަކަ ދަންނަވާލަން މި ކެރެނީ،" ޣައްސާން ވިދާޅުވި އެވެ.