ސުޕްރީމް ކޯޓުން މިރޭ ނެރުނު އަމުރާ ޚިލާފްވެއްޖެ ނަމަ ނުވަތަ އަމަލު ކުރުމުގައި ފަރުވާ ކުޑަކުރާ ކޮންމެ މައްސަލަ ވަކިވަކިން ތަހުގީގުކޮށް، ޝަރީއަތަށް ހުށަހަޅަން ޕްރޮސެކިއުޓާ ޖެނެރަލަށް ސުޕްރީމް ކޯޓުން މިރޭ އަމުރުކޮށްފި އެވެ.
ސުޕްރީމް ކޯޓުން މިރޭ ކުއްލި ގޮތަކަށް ނެރުނު އަމުރުގައި އިދިކޮޅު ލީޑަރުން މިނިވަން ކުރަން އެންގުމާ އެކު، ބައެއް އިތުރު ކަންކަން ވެސް ކުރަން ވަނީ އަންގައިފަ އެވެ. އެގޮތުން ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކުރިން ކަނޑައަޅާފައިވާ އެއްވެސް މެމްބަރެއްގެ ގޮނޑި ނުގެއްލޭ ކަމަށް ވެސް ވަނީ ކަނޑައަޅައިފަ އެވެ. އަދި ޕާޓީ ބަދަލުކޮށްފި ނަމަ ގޮނޑި ގެއްލޭނެ ކަމަށް ކުރިން ކުރި ހުކުމް ވެސް މިރޭ ވަނީ ބާތިލްކޮށްފަ އެވެ. އަދި ސުޕްރީމް ކޯޓުގެ އެއްވެސް ފަނޑިޔާރެއްގެ މައްސަލަ ޖޭއެސްސީން ނުބެލުމަށާއި ކޯޓުތަކަށް ފަނޑިޔާރުން އައްޔަން ކުރާއިރު ސުޕްރީމް ކޯޓުގެ ހުއްދަ ހޯދަން ވެސް ވަނީ އަންގައިފަ އެވެ.
އެ އަމުރުގައިވާ ގޮތުން އެ އަމުރާ އެއްގޮތަށް އަމަލު ކުރުމަކީ ސަރުކާރާއި މަޖިލީހާއި ސިފައިންނާއި ފުލުހުން އެކުލެވޭ ގޮތުން ދައުލަތުގެ އެންމެހައި މުއައްސަސާތަކުން ކުރަންޖެހޭނެ ކަމެކެވެ. އަދި އެ އަމުރާ ޚިލާފަށް އަމަލުކޮށްފި ނަމަ ނުވަތަ އަމުރު ތަންފީޒު ކުރުމުގައި ފަރުވާ ކުޑަކޮށްފި ނަމަ ނުވަތަ ހުރަސް އަޅައިފި ނަމަ އެފަދަ ކޮންމެ މައްސަލައެއް ވެސް ވަކިވަކިން ބަލައި، ޝަރީއަތަށް ހުށަހެޅުމަށް ޕްރޮސެކިއުޓާ ޖެނެރަލަށް އަންގާ ކަމަށް އެ އަމުރުގައިވެ އެވެ.
ސުޕްރީމް ކޯޓުގެ އެ އަމުރާ ގުޅިގެން އިދިކޮޅު ކޯލިޝަނުން މިހާރު އުފާ ފާޅު ކުރަމުންދާއިރު، އެ އަމުރާ އެއްގޮތަށް ސިޔާސީ ބޭފުޅުން މިނިވަން ކުރަން ވަކީލުން ދަނީ މަސައްކަތް ކުރަމުންނެވެ.
