ގދ. އަތޮޅު ރަށެއްގައި އެއްބަނޑު އެއްބަފާ ހަތަރު އަންހެން ކުއްޖަކާ ގަދަކަމުން ބަދު އަޚުލާގީ އަމަލު ހިންގިކަމުގެ ތުހުމަތު ކުރެވޭ 75 އަހަރުގެ މީހާގެ މައްޗަށް ދައުލަތުން ދައުވާކޮށްފި އެވެ.
އެއްބަނޑު އެއްބަފާ ހަތަރު ބެއިންނާ ގަދަކަމުން ބަދު އަޚުލާގީ އަމަލު ހިންގިކަމުގެ ތުހުމަތު ކުރެވޭ އެ މީހާގެ މައްޗަށް ދައުލަތުން ދައުވާކުރީ ގދ. އަތޮޅުގެ ކޯޓެއްގަ އެވެ. އެކަމަކު އޭނާގެ މައްޗަށް ކުރީ ކޮން ދައުވާއެއް ކަން އަދި ސާފެއް ނުވެ އެވެ. މާލޭގައި ހުއްޓާ މިދިޔަ ނޮވެމްބަރު މަހު އެ މީހާ ހައްޔަރު ކުރީ ކުޑަކުއްޖަކާ ގަދަކަމުން ބަދު އަޚުލާގީ އަމަލު ހިންގުމުގެ ތުހުމަތުގަ އެވެ.
އެ މައްސަލާގައި އެ މީހާ ހައްޔަރު ކުރުމުން ދެ ފަހަރަށް ބަންދުގެ މުއްދަތު އިތުރު ކުރުމަށް ފަހު، ކްރިމިނަލް ކޯޓުން ވަނީ އެ މީހާ ދޫކޮށްލައިފަ އެވެ. އެ މައްސަލަ ދައުލަތުން އިސްތިއުނާފް ކުރުމުން، ހައި ކޯޓުން މިއަދު ކުރި ހުކުމުގައި ވަނީ އެ މީހާގެ މައްޗަށް ތުހުމަތެއް އުފެދޭ މިންވަރުގެ ހެކި އެބަހުރި ކަމަށާއި އެހެންވެ އެ މީހާ ދޫކޮށްލާފައި ބެހެއްޓުމަކީ މުޖްތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމެއް ކަމަށެވެ.
އެކަމަކު އެ މީހާގެ މައްޗަށް މިހާރު ދައުވާ ކޮށްފައިވާތީ، އެ މީހާ އިތުރަށް ބަންދުގައި ބަހައްޓަން ދައުލަތުން އެދެން ޖެހޭނީ އެ މައްސަލަ ހިނގަމުންދާ ކޯޓެއްގައި ކަމަށް އެ ހުކުމުގައިވެ އެވެ. އެހެންވެ، ހައި ކޯޓުގެ ހުކުމުގައި އަންގާފައިވަނީ އެ މީހާގެ ބަންދާ މެދު ގޮތެއް ނިންމުމަށް އެ މައްސަލަ ހިނގަމުންދާ ކޯޓުގައި އެދުމަށެވެ.