ރާއްޖޭގައި ހުންނަ އިންޑިއާ ހައި ކޮމިޝަނުން، ޓެކްނިކަލް މައްސަލައެއް ދިމާވެގެން ކަމަށް ބުނެ ދިވެހިންނަށް ވިސާ ދިނުން މިއަދުން ފެށިގެން މަޑުޖައްސާލައިފި އެވެ.
އިންޑިއާ ހައި ކޮމިޝަނަށް ވިސާ ހޯދަން ދިޔަ މީހަކު ބުނީ އެތަނުގެ ސިސްޓަމަށް ދިމާވި މައްސަލައަކާ ގުޅިގެން، ވިސާ ދިނުން އަންނަ އަންގާރަ ދުވަހާ ހަމަޔަށް މެދުކަނޑާލާފައިވާ ކަމަށެވެ.
"ވިސާ ހޯދަން މިއަދު ހެނދުނު އެތަނަށް ދިޔައިމަ ބުނީ މިއަދު ހުށަހެޅިދާނެ ކަމަށް. ނަމަވެސް ވިސާ ޕްރޮސެސްވާން ހަފުތާއެއްހާ ދުވަސް މިހާރު ނަގާނޭ،" އެ މީހާ ބުންޏެވެ.
އިންޑިއާ ހައި ކޮމިޝަނުން ވާހަކަދެއްކި މީހަކު ވެސް ބުނީ ޓެކްނިކަލް މައްސަލައެއް ދިމާވެގެން ދިވެހިންނަށް ވިސާ ދިނުން އަންނަ އަންގާރަ ދުވަހާ ހަމަޔަށް މަޑުޖައްސާލާފައިވާ ކަމަށެވެ.
"އާޖެންޓް އެއްޗެއްވިއްޔާ މިއަދު ވެސް ބަލައިގަނެވިދާނެ. އެކަމަކު އާއްމު އުސޫލުން ވިސާ ދޫކުރުން މިއަދުން ފެށިގެން އަންގާރަ ދުވަހާ ހަމަޔަށް ވަނީ މެދުކަނޑާލާފައި. އެ މައްސަލަ ހައްލުވިހާ އަވަހަށް އަލުން ވިސާ ދޭން ފަށާނަން،" އޭނާ ބުންޏެވެ.
އިންޑިއާގެ ވިސާ ހޯދަން ހުށަހެޅުމުން މީގެ ކުރިން އާއްމުކޮށް ދެ ތިން ދުވަސް ތެރޭގައި ވިސާ ލިބެ އެވެ.
އިންޑިއާ އިން ވިސާ ދިނުން މަޑުޖައްސާލިއިރު، ބުރާސްފަތި ދުވަހުން ފެށިގެން އެއް ހަފުތާއަކަށް ސްކޫލްތައް ބަންދުކުރަން ވަނީ ނިންމައިފަ އެވެ. އަދި ސްކޫލް ބަންދާ ދިމާކޮށް ގިނަ އަދަދެއްގެ ބަޔަކު ކޮންމެ އަހަރަކު ވެސް ބޭސްފަރުވާ އަށް އެ ގައުމަށް ދަތުރުކުރެ އެވެ.
އިންޑިއާއިން ވިސާ ދިނުން މަޑުޖައްސާލި އިރު، ކުއްލި ނުރައްކަލުގެ ހާލަތު އިއުލާންކުރި ފަހުން، ދެ ގައުމުގެ ދެމެދުގައި އޮންނަ ސިޔާސީ ގުޅުން ވަނީ ވަރަށް ބޮޑަށް ހީނަރުވެފަ އެވެ.
