އިސްލާމްއާބާދު (އެޕްރީލް 28) - އަލްގައިދާ ޖަމާއަތުގެ ކުރީގެ ލީޑަރު އުސާމާ ބިން ލާދިން ހުރި ތަނެއް ސީއައިއޭ އަށް ޔަގީންކޮށްދިން ޕާކިސްތާނުގެ ޑޮކްޓަރު ޝަކީލް އަފްރީދީ ބަންދުގައި ހުރި ޖަލުން އެހެން ތަނަކަށް ބަދަލުކޮށްފައިވާ ކަމަށް އޮފިޝަލުން ބުނެފި އެވެ.
ވޭތުވެދިޔަ ހަތް އަހަރެއްހާ ދުވަހު އަފްރީދީ ހުރީ ޕިޝާވަރުގެ ސެންޓްރަލް ޖަލުގައި އެކަހެރިކޮށް ބަންދުކޮށްފަ އެވެ. އެކަމަކު ޕިޝާވަރު ހިމެނޭ ޚައިބަރު ޕަޚްތުންކުވާ ޕްރޮވިންސްގެ އިސް އޮފިޝަލަކު ވިދާޅުވީ ޕާކިސްތާނުގެ އިންޓެލިޖެންސް އޮފިޝަލުން މިހާރު ވަނީ އަފްރީދީ ރައްކާތެރި އެހެން ތަނަކަށް ގެންގޮސްފައިވާ ކަމަށެވެ. އޭނާ ބަދަލުކުރީ ކީއްވެތޯ ސުވާލު ކުރުމުން އޮފިޝަލް ވިދާޅުވީ އެއީ ސަލާމަތީ ސަބަބުތަކަށްޓަކައި ކުރި ކަމެއް ކަމަށެވެ.
އަފްރީދީގެ ބޭބެ ޖަމީލް އަފްރީދީ ވެސް ބުނީ ޝަކީލް އަފްރީދީ އެހެން ތަނަކަށް ބަދަލުކުރިކަން އާއިލާ އަށް އަންގާފައިވާ ކަމަށެވެ.
ހަނގުރާމަވެރި ޖަމާއަތަކާ ގުޅުން އޮތް ކަމަށް ބަލާ އަފްރީދީގެ މައްޗަށް މެއި 2012 ގައި ވަނީ 33 އަހަރުގެ ޖަލު ހުކުމެއް އިއްވައިފަ އެވެ. އެމެރިކާގެ ބައެއް އޮފިޝަލުން ބުނީ އެއީ ބިން ލާދިން ހުރި ތަނެއް ހޯދަން އަފްރިދީ އެހީތެރިވެފައިވާތީ އެކަމުގެ ބަދަލު ހިފަން ޕާކިސްތާނުން ދިން އަދަބެއް ކަމަށެވެ.
އަފްރީދީ ވަނީ އަބޮޓްއާބާދުގައި ފޭކް ވެކްސިން ޕްރޮގްރާމެއް ހިންގާ އެ ސިޓީގައި ބިން ލާދިން ހުރިކަން އެމެރިކާ އަށް ޔަގީންކޮށްދީފަ އެވެ. އެމެރިކާގެ ރިޔާސީ އިންތިޚާބުގެ ތެރޭގައި ރައީސް ޑޮނަލްޑް ޓްރަމްޕް ވަނީ އަފްރީދީ މިނިވަން ކުރަން ޕާކިސްތާނަށް އަންގާނެ ކަމަށް ވިދާޅުވެފަ އެވެ.
ބިން ލާދިން ފިލައިގެން އުޅެނިކޮށް އެމެރިކާގެ ޚާއްސަ ސިފައިން ހަމަލާދީ އޭނާ މަރާލީ 2011 ވަނަ އަހަރު އެވެ.