ޒުވާން ބަތަލާ ޝްރަދާ ކަޕޫރް ބަތަލާގެ ރޯލް ކުޅެފައިވާ ދެ ފިލްމެއް އެއް ދުވަހެއްގައި ބޮކްސް އޮފީހުގެ ކުރިމަތިލުމަކަށްދާ ގޮތަށް ހަމަޖެހިއްޖެ އެވެ.
އެއީ އޮގަސްޓް 31 ގައި ރިލީޒް ކުރީ "ސްޓްރީ" އާއި "ބައްޓީ ގުލް މީޓަރު ޗާލޫ" އެވެ.
ބޮލީވުޑްގެ ހަބަރުތައް ދިރާސާ ކުރާ ބައެއް ފަރާތްތަކުން ބުނާ ގޮތުގައި ދެ ފިލްމުން ކުރެ ކޮންމެވެސް އެއް ފިލްމެއްގެ ތާރީހު ބަދަލުވުމަކީ ވެދާނެ ގޮތެކެވެ. އެއް ދުވަހެއްގައި އެކެއްގެ ދެ ފިލްމެއް ބޮކްސް އޮފީހުގައި ވާދަކުރަން ނުކުތުމަކީ އެހާ އާންމުކޮށް ވާ ކަމެއް ވެސް ނޫނެވެ.
އެކަމަކު ބައެއް މީހުން ލަފާކުރާ ގޮތުގައި "ސްޓްރީ" އާއި "ބައްޓީ ގުލް މީޓަރު ޗާލޫ" އެއް ދުވަހެއްގައި ރިލީޒްކޮށްގެން ވާނެ މާ ބޮޑު ގެއްލުމެއް ނެތެވެ. ސަބަބަކީ ދެ ފިލްމްގެ ޖޯންރާ ވަރަށް ތަފާތުވުމެވެ.
މިދިޔަ އަހަރު "ޓޮއިލެޓް: އޭކް ޕްރޭމް ޙަތާ" ގެނެސް ދިން ޝްރީ ނާރަޔަން ސިންގް ޑައިރެކްޓް ކުރާ "ބައްޓީ ގުލް މީޓަރު ޗާލޫ" އަކީ އިންޑިއާގައި ކަރަންޓް ބިލް ބޮޑުވާ މައްސަލަ އަށް ބިނާކޮށް ހަދާ ސޯޝަލް ޑްރާމާއެކެވެ. މި ފިލްމްގައި ޝްރަދާއާ އެކު ބަތަލުގެ ރޯލުން ފެނިގެން ދާނީ ޝާހިދު ކަޕޫރެވެ.
މިއީ އެ ދެ ތަރިން 2014 ގައި އެކުގައި ކުޅުނު ފުރަތަމަ ފިލްމް "ހައިދަރް" އަށް ފަހު، އެކީގައި ކުޅޭ ފުރަތަމަ ފިލްމެވެ. އަދި މީގެ ކާސްޓުން ޔަމީ ގޯތަމް ވެސް ފެނިގެން ދާނެ އެވެ.
"ސްޓްރީ" އަކީ ބިރުވެރި ހާދިސާތަކެއް ދައްކުވައިދޭ ހޮރޯ/ކޮމެޑީއެކެވެ. މި ފިލްމްގައި ޝްރަދާ ފެނިގެން ދާނީ ނެޝަނަލް އެވޯޑް ހޯދާފައިވާ އެކްޓަރު ރާޖްކުމާރް ރާއޯއާ އެކުގަ އެވެ. މިއީ މި ދެ ތަރިން އެކުގައި ކުޅުނު ފުރަތަމަ ފިލްމެވެ.
"ހިންދީ މީޑިއަމް" ގެ ޕްރޮޑިއުސަރު ދިނޭޝް ވިޖަން ޕްރޮޑިއުސްކޮށް، އަމަރް ކޯޝިކް ޑައިރެކްޓްކޮށްފައިވާ "ސްޓްރީ" ގެ ޓީޒާ ވެސް މިހާރު ވަނީ ދައްކާލައިފަ އެވެ.
މިދިޔަ އަހަރު ރިލީޒްކޮށް ބޮކްސް އޮފީހުގައި ފިނި ތަރުހީބެއް ލިބުނު "ހަސީނާ ޕަރްކާރް" އަށް ފަހު، ޝްރަދާ، 31، ގެ ދެ ފިލްމެއް އެއް ދުވަހެއްގައި ރިލީޒް ވާން ތާވަލް ކުރި އިރު، އޭނާގެ ކުރިއަށް ހުރި ފިލްމްތަކުގެ ތެރެއިން އެންމެ ފާހަގަކޮށްލެވޭ އެއް ފިލްމަކީ "ބާހްބަލީ" ގެ އެކްޓަރު ޕްރަބާސްއާ އެކު ކުޅޭ "ސާހޯ" ހިމެނެ އެވެ.
އެކަމަކު އެ ފިލްމް ސިނަމާތަކަށް އަންނާނީ އަންނަ އަހަރު އެވެ.