ހުކުރު ދުވަހު ރިލީޒްކުރި، ޝާހިދު ކަޕޫރާއި ޝްރަދާ ކަޕޫރްގެ ފިލްމު "ބައްތީ ގުލް މީޓަރު" އަކީ ވަރަށް ފުރިހަމަ މޮޅު ފިލްމަކަށް ވާނެ ކަމަށް އުންމީދު ކުރެވުނަސް މި ފިލްމް ކްރިޓިކުން މާޔޫސްކޮށްލައިފި އެވެ.
ފިލްމު ރިވިއުކުރި ގިނަ ކްރިޓިކުން ބުނި ގޮތުގައި މިދިޔަ އަހަރު ރިލީޒްކޮށް، ބޮޑު ކާމިޔާބީއެއް ހޯދި އިޖުތިމާއީ ފިލްމު "ޓޮއިލެޓް: އޭކް ޕްރޭމް ހަތާ" އަށް ފަހު، ޑައިރެކްޓަރު ޝްރީ ނާރަޔަން ސިންގް ގެނެސް ދިން ފިލްމުގައި މާ ބޮޑު ޗަސްބެއް ނެތެވެ.
ފިލްމަށް ފާޑުކީ ގިނަ ކްރިޓިކުން ފާހަގަކުރި ގޮތުގައި ސިދާތު އާއި ގަރީމާ ލިޔުނު ސްކްރީންޕްލޭގައި ޝައުގުވެރި ކަންތައްތަކެއް ހުއްޓަސް، ނާރަޔަންގެ ޑައިރެކްޝަން ފީކަޅާކަމުން، މީގެ ވާހަކަ އެންމެ ފުރިހަމަ އަށް އިންސާފުކޮށްދެވިފައެއް ނެތެވެ. އެގޮތުން އޭނާގެ ޑައިރެކްޝަން ވަރަށް ފޫހި ކަމަށާއި ފިލްމުގެ ފުރަތަމަ ހާފު ވަރަށް ވަނދު ކަމަށް ކްރިޓިކުން ބުންޏެވެ.
"ބައްތީ ގުލް މީޓަރު" ޗާލޫއަކީ ވަރަށް އެކުގައި އުޅުނު ތިން ރައްޓެހިންނާއި އެ މީހުންގެ ހަޔާތަށް ފަހުން ދިމާވާ ކަންތައްތަކެއް ކިޔައިދޭ ފިލްމެކެވެ. އެގޮތުން ފިލްމްގެ މައިގަނޑު ވާހަކައަކީ އިންޑިއާގައި ކަރަންޓް ބިލް ބޮޑުވާ މައްސަލަ އެވެ.
ކްރިޓިކުން ބުނި ގޮތުގައި ގަރީމާ އާއި ސިދާތުގެ ސްކްރިޕްޓްގައި ތާޒާ ކަމެއް ހުއްޓަސް، އޭތި އަތުރާލައިފައި އޮތް އެހާ ކަމަކު ނުދެ އެވެ. އަނެއްކޮޅުން މި ފިލްމްގެ ބައެއް މަންޒަރުތައް "ޖޮލީ އެލްއެލްބީ" އާއި ޝާހިދު ކުޅުނު ފިލްމެއް ކަމަށްވާ "ޗުޕް ޗުޕް ކޭ" އާ ވެސް ވައްތަރު ކަމަށް ބުނެފައިވެ އެވެ.
"ޖޮލީ އެލްއެލްބީ" އާ އެއްގޮތަށް "ބައްތީ ގުލް މީޓަރު ޗާލޫ" ގައި ވެސް ކޯޓް ރޫމްތެރެ ވަރަށް ބޮޑަށް ދައްކާތީ ކްރިޓިކުން ވަނީ ދެ ފިލްމްގައި އެއްގޮތް ކަންތައްތަކެއް އަދި އެއް ގޮތް ކެރެކްޓާތަކެއް ވެސް ހުރި ކަމަށް ބުނެ އެވެ.
ނަމަވެސް ފިލްމުގައި ތަރިން ދެއްކި އެކްޓިން އަށް ބަލާއިރު ޝާހިދާއި ޝްރަދާ ވަރަށް މޮޅު ކަމަށް ހުރިހާ ކްރިޓިކުން ވެސް އެއްބަސްވި އެވެ. ވަކިން ހާއްސަކޮށް ޖަޒުބާތީ މަންޒަރުތަކުގައި ދެ ތަރިން ދައްކާފައިވާ ހުނަރަށް ސާބަސް ދީފައިވެ އެވެ.
"ބައްތީ ގުލް މީޓަރު ޗާލޫ" ގައި ޝާހިދު ކުޅެފައި ވަނީ ވަކީލެއްގެ ރޯލެވެ. އަދި ފިލްމުގެ މާ ބޮޑު ނޫން ރޯލަކުން ޔަމީ ގޯތަމް ވެސް ވަކީލެއްގެ ރޯލް ކުޅެފައިވެ އެވެ.
ކްރިޓިކުން ބުނީ "ބައްތީ ގުލް މީޓަރު ޗާލޫ" އަކީ އެއް ފަހަރު ބަލައިލަން ރަނގަޅު ފިލްމަކަށް ވެދާނެ ކަމަށެވެ. އަދި ބޮކްސް އޮފީހުގައި ފިލްމަށް ރަނގަޅަށް ވިޔަފާރިއެއް ކުރެވޭނީ ފިލްމު ބަލާފައި އޯޑިއަންސް ދައކާ ވާހަކަތަކުން އެކަނި ކަމަށް ބުނެފައިވެ އެވެ.
ފިލްމަށް ހޮނިހިރު ދުވަހާ ހަމައަށް ލިބފައި ވަނީ 8.33 ކްރޯޑް ރުޕީސް އެވެ.