މާދަމާ ޒަކާތް ބަހަން ފަށަނީ

ފިތުރު ޒަކާތުގެ ގޮތުގައި ލިބުނު ފައިސާއާ ގޮވާމުގެ ގޮތުގައި ލިބުނު ޒަކާތް މާދަމާ ބަހަން އިސްލާމިކް މިނިސްޓްރީން ނިންމައިފި އެވެ.

އެ މިނިސްޓްރީން މިއަދު ކުރި އިއުލާނުގައި ބުނެފައިވާ ގޮތުގައި، ޒަކާތުގެ ގޮތުގައި ލިބިފައިވާ ފައިސާ ބަހަން ހަމަޖައްސާފައިވަނީ އިސްލާމިކް މިނިސްޓްރީންނެވެ. ޒަކާތް ބަހަން ހަމަޖައްސާފައިވަނީ ހެނދުނު 10:30 އިން 12:00 އަށް، މެންދުރު ފަހު 12:35 އިން ހަވީރު 3:30 އަށް އަދި، ރޭގަނޑު 9:00 އިން 11:00 އަށެވެ.

އިސްލާމިކް މިނިސްޓްރީން ޒަކާތް ބަލައިގަތުމުގެ އެންމެ ފަހު ތާރީހަކީ މާދަމާ އެވެ. ޒަކާތުގެ ގޮތުގައި މިހާތަނަށް ހަތަރު މިލިއަނަށް ވުރެ ގިނަ ރުފިޔާ ލިބިފައިވިއަސް، ޒަކާތުގެ ގޮތުގައި މީހަކަށް ބަހަނީ ކިހާ ވަރެއް ކަމެއް މިނިސްޓްރީން އަދި ނުބުނެ އެވެ.

އެހެން ރަށްރަށުގައި ޒަކާތް ބަލައިގަތުމުގެ ފުރުސަތު މިިހާރު ބަންދު ކޮށްފަ އެވެ.

ގޮވާމުން ޒަކާތް ދޫކުރަން ހަމަޖައްސާފައިވަނީ އަރަބިއްޔާ ސްކޫލު ހޯލުގަ އެވެ. ހެނދުނު 10:30 އިން 12:00 އަށް، މެންދުރުފަހު 12:45 އިން ހަވީރު 3:30 އަށް، އަދި ރޭގަނޑު 9:00 އިން 11:00 ވަންދެން ގޮވާމުން ޒަކާތް ދޫކުރާނެ އެވެ.

ފިތުރު ޒަކާތުގެ ގޮތުގައި މިދިޔަ އަހަރު މާލޭ ސަރަހައްދުން ތިން މިލިއަނަށް ވުރެ ގިނަ ރުފިޔާ ލިބުނު އިރު، މީހަކަށް ބަހާފައިވަނީ 1250ރ. އެވެ.