މިދިޔަ މަހުގެ 29 ގައި ރިލީޒް ކުރި ރަންބީރު ކަޕޫރްގެ ފިލްމް "ސަންޖޫ" ގެ އާމްދަނީ 200 ކްރޯޑް ރުޕީސް ފަހަނައަޅައިފި އެވެ.
އިންޑިއާ އާއި އިންޑިއާ އިން ބޭރުގެ މާކެޓްތަކުން ފިލްމަށް ލިބެމުން އަންނަ ބޮޑު ތަރުހީބާ އެކު، ހަމައެކަނި އިންޑިއާ އިން ލިބުނު އާމްދަނީ ވަނީ 200 ފަހަނައަޅައި ގޮސް، އަދިވެސް ބޮޑު ވިޔަފާރިއެއް ކުރާނެކަން ކަށަވަރުވެފަ އެވެ.
އެވަރުގެ އާމްދަނީއެއް ފިލްމް ހޯދީ، ރިލީޒް ކުރި ދުވަސްވަރުން ފެށިގެން މިއަދާ ހަމައަށް އިރު، ބަންދު ދުވަހެއް ވެސް އޭގެ ތެރޭގައި ނުހިމެނި އެވެ. އެހެންވެ "ސަންޖޫ" އަކީ ބަންދު ދުވަހެއް ވެސް ނުލައި 200 ކްރޯޑް ހަމަކުރި ފުރަތަމަ ބޮލީވުޑް ފިލްމެވެ.
ފިލްމަށް ހުކުރު ދުވަހާ ހަމައަށް ލިބުނު ޖުމްލަ އާމްދަނީ ވަނީ 284.68 ކްރޯޑް ރުޕީސް އަށް ވުރެ މައްޗަށް އަރައިފަ އެވެ.
ރާޖްކުމާރް ހިރާނީ ޑައިރެކްޓް ކުރި "ސަންޖޫ" އަކީ ރަންބީރްގެ ފުރަތަމަ 200 ކްރޯޑް ފިލްމެވެ. އެ އަދަދު ފިލްމް ހަމަ ކުރީ އެންމެ 7 ދުވަހުގެ ތެރޭގަ އެވެ. އަދި 100 ކްރޯޑްގެ އާމްދަނީއެއް ފިލްމް ހަމަކުރީ އެންމެ ތިން ދުވަހުގެ ތެރޭގަ އެވެ.
މީގެ ކުރިން ބޮކްސް އޮފީހުގައި އެންމެ އަވަހަށް 200 ކްރޯޑް ރުޕީސްގެ އާމްދަނީއެއް ހޯދި ފިލްމަކީ މިދިޔަ އަހަރު ރިލީޒް ކުރި "ބާހްބަލީ: ދަ ކޮންކްލޫޝަން" އެވެ. އެއީ އެންމެ ހަ ދުވަހުގެ ތެރޭގަ އެވެ. "ސަންޖޫ" އާ އެއްގޮތަށް ހަފުތާއެއްގެ ތެރޭގައި 200 ކްރޯޑްގެ އާމްދަނީއެއް ދެން ހޯދި ފިލްމްގެ ރިކޯޑް އޮތީ މިދިޔަ އަހަރު ރިލީޒް ކުރި ސަލްމާން ހާންގެ "ޓައިގާ ޒިންދާ ހޭ" ގެ އަތުގަ އެވެ.
މި ފަހުން ކުޅުނު ގިނަ ފިލްމްތަކެއްހެން ޕްލޮޕްވި ރަންބީރްގެ ފިލްމްތަކުގެ ތެރެއިން 100 ކްރޯޑް ކުލަބުން ކުރިން ޖާގަ ހޯދާފައިވާ ފިލްމްތަކަކީ 2016 ގެ އޭ ދިލް ހޭ މުޝްކިލް (112.48 ކްރޯޑް)، 2013 ގެ ޔެ ޖަވާނީ ހޭ ދީވާނީ (188.57 ކްރޯޑް) އަދި 2012 ގެ ބަރްފީ (112.15 ކްރޯޑް) އެވެ.
މަޝްހޫރު ފިލްމް ކްރިޓިކް އަދި "ސަންޖޫ" އަކީ މާސްޓަޕީސްއެއްގެ ގޮތުގައި ސިފަ ކުރި ތަރަން އަދާޝް ބުނި ގޮތުގައި "ސަންޖޫ" ގެ ވިޔަފާރި މިހާރު ދާ ސްޕީޑަށް ބަލާ އިރު، މި ފިލްމަކީ މި އަހަރުގެ އެންމެ ބޮޑު އާމްދަނީއެއް ހޯދާނެ ފިލްމަށް ވެދާނެ އެވެ. އޭނާ ބުނަނީ "ސަންޖޫ" ހިފަހެއްޓުމެއް ނެތް ކަމަށާއި ބެލުންތެރިން ފިލްމްގެ ޖާދޫގައި ވަރަށް ވެސް ގަދައަށް ޖެހިފައިވާ ކަމަށެވެ.
މި ފިލްމަކީ މަޝްހޫރު އެކްޓަރު ސަންޖޭ ދަތުގެ ހަޔާތުގެ ވާހަކަ ކިޔައިދ ބައޮގްރަފިކަލް ޑްރާމާއެކެވެ. ސަންޖޭގެ ރޯލް ކުޅެން ރަންބީރު ވަނީ އޭނާގެ ހަށިގަނޑަށް ވެސް ތަފާތު އެކި ކަހަލަ ބަދަލުތައް ގެނުވައި އެތައް ބަޔަކު ހައިރާންކޮށްލައިފަ އެވެ.