މިދިޔަ މަހުގެ 29 ގައި ރިލީޒްކުރި، ރަންބީރްގެ ކަޕޫރްގެ ފިލްމް "ސަންޖޫ" އަށް އިންޑިއާ އިން ލިބުނު އާމްދަނީ 300 ކްރޯޑް ރުޕީސް ފަހަނައަޅައިފި އެވެ.
މިއީ ރަންބީރް މިހާތަނަށް ކުޅުނު ފިލްމްތަކުގެ ތެރެއިން އެވަރުގެ އާމްދަނީއެއް ހޯދި ފުރަތަމަ ފިލްމް ވެސް މެ އެވެ. ރާޖްކުމާރް ހިރާނީ ޑައިރެކްޓް ކުރި "ސަންޖޫ" އަކީ މި އަހަރުގެ މިހާތަނަށް އެންމެ ބޮޑު ފެށުމެއް ވެސް ހޯދި ފިލްމެވެ. މި ފިލްމަށް 300 ކްރޯޑްގެ އާމްދަނީއެއް ހަމަކުރެވުނީ ފިލްމް ރިލީޒްކުރިތާ 16 ދުވަހުގެ ތެރޭގަ އެވެ.
ސަތޭކަ ކްރޯޑްގެ އާމްދަނީއެއް ފިލްމް ހޯދީ އެންމެ ތިން ދުވަހުގެ ތެރޭގަ އެވެ. އަދި ރަންބީރްގެ ފިލްމަކަށް ފުރަތަމަ ފަހަރަށް 200 ކްރޯޑް "ސަންޖޫ" ހަމަކޮށް ދިނީ ހަތް ދުވަހުގެ ތެރޭގަ އެވެ.
ފިލްމަށް އިންޑިއާ އިން އެކަނި ލިބުނު އާމްދަނީ 300 ކްރޯޑަށް ވުރެ މައްޗަށް ގޮސްފައިވާ އިރު، ދުނިޔޭގެ އެހެން ގައުމުތަކުގައި ދައްކައިގެން "ސަންޖޫ" އަށް އާދީއްތަ ދުވަހާ ހަމައަށް ލިބުނު އާމްދަނީ ވަނީ 507.13 ކްރޯޑް ރުޕީސް އަށް ވުރެ މައްޗަށް ގޮސްފަ އެވެ.
މީގެ ކުރިން އިންޑިއާގައި ދައްކައިގެން 300 ކްރޯޑް ރުޕީސްގެ އާމްދަނީއެއް ހޯދި ފިލްމްތަކުގެ ތެރޭގައި ހިމެނެނީ މި އަހަރު ރިލީޒް ކުރި ދީޕިކާ ޕަދްކޯންގެ "ޕަދްމާވަތު" އާއި މިދިޔަ އަހަރު ރިލީޒް ކުރި ސަލްމާން ހާންގެ "ޓައިގާ ޒިންދާ ހޭ" އާއި 2016 ގައި ރިލީޒް ކުރި އާމިރް ހާންގެ "ޑަންގަލް" އާއި ހަމަ އެ އަހަރު ނުކުތް ސަލްމާންގެ "ސުލްތާން" ގެ އިތުރުން 2015 ގައި ރިލީޒް ކުރި ސަލްމާންގެ "ބަޖިރަންގީ ބައިޖާން" އަދި 2014 ގައި ރިލީޒް ކުރި އާމިރްގެ "ޕީކޭ" އެވެ.
"ސަންޖޫ" އަކީ ހިރާނީ ޑައިރެކްޓް ކުރި ފިލްމްތަކުގެ ތެރެއިން "ޕީކޭ" އާ އެކު އިންޑިއާގެ ބޮކްސް އޮފީހުގައި 300 ކްރޯޑްގެ އާމްދަނީއެއް ހޯދި ދެވަނަ ފިލްމެވެ.
މިހާތަނަށް އިންޑިއާގެ ބޮކްސް އޮފީހުގައި 500 ކްރޯޑް ރުޕީސްގެ ވިޔަފާރިއެއް ކުރި ހަމައެކަނި ފިލްމަކީ މިދިޔަ އަހަރު ރިލީޒް ކުރި ސައުތު ފިލްމް އިންޑަސްޓްރީގެ "ބާހްބަލީ 2" އެވެ.
މަޝްހޫރު ފިލްމް ކްރިޓިކް ތަރަން އަދާޝް ބުނި ގޮތުގައި "ސަންޖޫ" އަށް ބޮކްސް އޮފީހުގައި އަދިވެސް ލިބެމުން އަންނަ ކާމިޔާބީތަކަށް ބަލާ އިރު، "ބާހްބަލީ 2" ގެ ރިކޯޑް މި ފިލްމް މުގުރައިލުން ވެސް ގާތެވެ. އެހެންވެ އެކަމަށް ވަރަށް ބޮޑަށް އިންތިޒާރު ކުރެވޭ ކަމަށް ބުންޏެވެ.
"ސަންޖޫ" އަކީ އެކްޓަރު ސަންޖޭ ދަތުގެ ހަޔާތުގެ ވާހަކަ ކިޔައިދޭ ބައޮގްރަފިކަލް ޑްރާމާއެކެވެ. ފިލްމްގައި ސަންޖޭގެ ރޯލަށް ވަރަށް ފުރިހަމަ އަށް ރަންބީރް އިންސާފުކޮށް ދީފައިވާ އިރު ގިނަ ބަޔަކު ވަނީ އޭނާ އަށް ވަރަށް ބޮޑަށް ތައުރީފުކޮށްފަ އެވެ.
މި ފިލްމްގެ އިތުރު ކާސްޓުންގެ ތެރޭގައި ސޯނަމް ކަޕޫރް، ވިކީ ކޯޝަލް، މަނީޝާ ކޮއިރަލާ، ޕަރޭޝް ރާވަލް، އަނުޝްކާ ޝަރްމާ، ޖިމް ސަރްބް، ދިއާ މިރްޒާ އަދި ކަރިޝްމާ ތަންނާ ހިމެނެ އެވެ.