ދިގު މުއްދަތުގެ ޖަލު ހުކުމެއް ތަންފީޒު ކުރައްވަމުން ގެންދަވާ، އަދާލަތު ޕާޓީގެ ރައީސް އިމްރާން އަބްދުﷲ އަށް އަދިވެސް އެންމެ ހެޔޮއެދިވަޑައިގަންނަވަނީ އޭނާ ކަމަށް، ރައީސް އަބްދުﷲ ޔާމީންގެ ރަނިން މޭޓު، ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
ވެރިކަމުގެ ދެ ވަނަ ދައުރަކަށް ރައީސް ޔާމީން ވާދަ ކުރައްވާ އިރު ރަނިން މޭޓަކަށް ޝަހީމް ހަމަޖެއްސެވުމާއެކު، އޭނާ އާއި އިމްރާނާ ގުޅުވައި އިދިކޮޅު ފަރާތްތަކުން އަންނަނީ ފާޑު ކިޔަމުންނެވެ. ރައީސް ޔާމީންގެ ސަރުކާރުގެ އިސްލާމިކް މިނިސްޓަރުގެ މަގާމުން ޝަހީމް އިސްތިއުފާ ދެއްވީ، މެއި 1، 2015 ގައި ސަރުކާރާ ދެކޮޅަށް އިދިކޮޅު ފަރާތްތަކުން ކުރި މުޒާހަރާގައި އިމްރާން ބަންދު ކުރުމުންނެވެ. އެ މުޒާހަރާގައި އިމްރާން އަޑުއުފުއްލެވީ މި ސަރުކާރުގައި ކޮރަޕްޝަނާއި އަނިޔާވެރިކަމާއި ފަސާދަ އިންތިހާ އަށް ބޮޑުވެފައިވާ ކަމަށް ވިދާޅުވެ އެވެ.
ވަރަށް ގާތް އަޚަކު ބަންދު ކުރުމަކީ ސަރުކާރުގެ އިސް މަގާމެއްގައި ދެމިހުންނެވުމަށް ޟަމީރު ގަބޫލުކުރާ ކަމެއް ނޫން ކަމަށް ވިދާޅުވެ އިސްތިއުފާ ދެއްވި ޝަހީމް، އަލުން ރައީސް ޔާމީނާ ގުޅިވަޑައިގަތުމަކީ އޭނާ އޭރު ދެއްކެވި ވާހަކަތަކާ މެދު ސުވާލު އުފެދޭ ކަމެއް ކަމަށް އިދިކޮޅު ސިޔާސީ މީހުން އަންނަނީ ބުނަމުންނެވެ.
މުޒާހަރާގައި، ޓެރަރިޒަމަށް ހިތްވަރު ލިބޭ ގޮތަށް ވާހަކަ ދެއްކެވި މައްސަލައިގައި އިމްރާން އަދިވެސް ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެކަމަކު، މާފުށީ ޖަލުގައި އިމްރާން ހުންނެވި ގޮޅި މަރާމާތުކުރާ ކަމަށް ބުނެ، އޭނާ މިހާރު ހުންނެވީ ގޭބަންދަށް ބަދަލުކޮށްފަ އެވެ.
ރަނިން މޭޓަކަށް ހަމަޖެއްސި ފަހުން ބޭއްވި ފުރަަތަމަ ނޫސްވެރިންގެ ބައްދަލުވުމުގައި، ޝަހީމް މިއަދު ވެސް ވިދާޅުވީ އިމްރާން ބަންދުކުރުމުން ވަރަށް ހިތާމަކުރެއްވި ކަމަށެވެ. ސަރުކާރުގައި މަޑުކޮށްދެއްވަން ރައީސް ޔާމީން އެދިވަޑައިގަތުމުން ވެސް އޭރު ވަކިވެވަޑައިގަތީ، އިމްރާނަށްޓަކައި ކަމަށާއި އެކަން އިމްރާން ވެސް ގަބޫލު ކުރައްވާނެ ކަމަށެވެ.
ރައީސް ޔާމީންގެ ފަހަތަށް އަލުން އަރާވަޑައިގަތީ، އިސްލާމީ ވަހުދަތު ދެމެހެއްޓުމަށާއި، އިދިކޮޅު ފަރާތްތަކުން ހިންގާ އަމަލުތަކަކީ އޭނާ އަށް ގަބޫލުކުރެއްވޭ ފަލްސަފާތަކަކަށް ނުވާތީ ކަމަށް ވެސް ވިދާޅުވި އެވެ.
"އަޅުގަނޑުގެ ކިތަންމެ ގާތް އަޚެއް ނަމަވެސް އަޅުގަނޑު އިދިކޮޅު ހަރަކާތުގެ ތެރެއަށް ދާން ބޭނުން ނުވީ. އެއީ، އަޅުގަނޑަކީ ވެސް ވަކި އުސޫލްތަކެއް ގަބޫލުކުރާ މީހެއް. އެ އުސޫލްތަކާ ޚިލާފަށް ކަންކަން ދާނަމަ، އެހެން މީހެއްގެ އަތުގައި އަޅުގަނޑުގެ ލަގަނެއް ނޯންނާނެ. އަޅުގަނޑަށް ހުރެވޭނީ އަޅުގަނޑު ބޭނުންވާ ހިސާބުގައި. އެހެންވެ އަޅުގަނޑުމެން ދެ މީހުން ވަރަށް އިހްތިރާމާ އެކު ސިޔާސީ ގޮތުން ވަކިވީ،" ޝަހީމް ވިދާޅުވި އެވެ.
އޭގެ ފަހުން މިއަދާ ހަމައަށް ވެސް ދެ ބޭފުޅުންގެ ސިޔާސީ ގުޅުމެއް ނެތް ކަމަށް ވިދާޅުވި އެވެ. ނަމަވެސް ކުރިއެކޭ އެއްގޮތަށް އަޚުވަންތަކަމުގެ ގުޅުން އަދިވެސް އެބައޮތް ކަމަށް ޝަހީމް ވިދާޅުވި އެވެ.
"އެ އަޚުވަންތަކަން އިރާދަ ކުރެއްވިއްޔާ މުޅި އުމުރުގައި ވެސް ދަމަހައްޓާނަން،" އޭނާ ވިދާޅުވި އެވެ.
"އެ މަނިކުފާނަށް [އިމްރާނަށް] ކުރިމަތިވެވަޑައިގެންނެވި ކަންކަމުން އެ ވަނީ ހުކުމެއްގެ ދަށުގައި. އެހެންވީމަ އެ މަރުހަލާތަކުން ދެއްތޯ އެ ކަންކަމުން ސަލާމަތްވުމަށް މަސައްކަތް ކުރަން ޖެހޭނީ. އަނެއް ކަމަކީ އަޅުގަނޑު އަމިއްލަ އަށް ކަންކަން ނިންމަން ޖެހޭ ފަހަރު ވެސް އަންނާނެ. އޭގެ މާނައަކީ އަޅުގަނޑު އަޚުވަންތަކަން ކެނޑިގެން ދިޔައީކީއެއް ނޫން،" ޝަހީމް ވިދާޅުވި އެވެ.
އިމްރާން ޖަލަށް ލުމުގެ ކުރިން އަދި މިހާރު ވެސް ރަހުމަތްތެރިންނާއި ގާތް މީހުންގެ ތެރެއިން އެންމެ ހެޔޮ މީހަކީ ކޮބައިތޯ ސުވާލު ކުރަން ނޫސްވެރިންގެ ގާތު ޝަހީމް އެދިވަޑައިގަތެވެ.
"ސަތޭކަ ޕަސެންޓް، އެ މީހަކީ އަޅުގަނޑު ކަމަށް އިމްރާން ވިދާޅުވާނެ. އަޅުގަނޑަށް ޔަގީން. އެހެންކަމުން، މިއަދު ވެސް އަޅުގަނޑު އިމްރާނަށް އެދެނީ، އަޅުގަނޑު ކައިރި އަށް ވަޑައިގަތުމަށް،" ޝަހީމް ވިދާޅުވި އެވެ.
"އަޅުގަނޑަށް ވުރެން އިމްރާނަށް ވަކި ހެޔޮ އެދޭ މީހަކު މި އުޑު ދަށުގައި ނުހުންނާނެ. ސަތޭކަ ޕަސެންޓް ޔަގީންކަމާ އެކު މި ދަންނަވަނީ. އިމްރާން ހުންނަވަން ޖެހޭނީ އަޅުގަނޑާ އެއްކޮށް. އަޅުގަނޑު މި ދަންނަވަނީ އިމްރާނަށް، ޒާތީ ކަމެއް ރައީސް ޔާމީނާ އޮވެއްޖިއްޔާ ފިލުވާލާފައި އަޅުގަނޑާ އެއްކޮށް ވަޑައިގަންނަވާށޭ."
އިދިކޮޅު ފަރާތްތަކާ އެކު އިމްރާން މޭޑޭ މުޒާހަރާ އަށް ވަޑައިގެންނެވި އިރު "އެއް ފިޔަ ބިނދިއްޖިއްޔާ އަނެއް ފިޔަ ބިނދޭނެ ކަމަށް" ވިދާޅުވި ކަމަށް ޝަހީމް ވިދާޅުވި އެވެ. އޭރު އޭނާ ހުންނެވީ ސަރުކާރުގެ ތެރޭގައި ކަން ފާހަގަ ކުރައްވަމުން ވިދާޅުވީ، ކަން ހިނގައި ދިޔައީ ހަމަ އެގޮތަށް ކަމަށެވެ.
"އިމްރާން ވެސް، ޝޭހް އިލްޔާސް ވެސް ވަޑައިގަންނަވަންވީ އަޅުގަނޑު ކައިރި އަށް، އެއީ އަޅުގަނޑުގެ އެންމެ ލޯބިވާ ދެ އަޚުން. އެ ދެ ބޭފުޅުން އަޅުގަނޑުގެ ގާތުގައި ނެތް އިހްސާސް އަޅުގަނޑަށް ކުރެވޭ. އެ ބޭފުޅުންނާ ދޭތެރޭގައި އެއްވެސް ނަފްރަތު ކަމެއް އަޅުގަނޑުގެ ނެތް،" ޝަހީމް ވިދާޅުވި އެވެ.
އިސްލާމް ދީން ކުރިއަރުވަން ބޭނުންވާ ވެރިއަކު ހުއްޓައި އެ ނޫން ފަލްސަފާއެއް ގަބޫލު ނުކުރެއްވޭނެ ކަމަށާއި އެހެންކަމުން، އިމްރާނާ އެކު ވެސް އުފެދިފައިވާ ޚިޔާލު ތަފާތުވުންތަކުގައި މަޝްވަރާ ކޮށްގެން ގޮތްތަކެއް ހޯދަން ޝަހީމް ގޮވައިލެއްވި އެވެ.
އޭނާ ވިދާޅުވި ގޮތުގައި ދީނީ އިލްމުވެރިން ތިބެން ޖެހޭނީ ރައީސް ޔާމީނާ އެކުގަ އެވެ. އޭނާއެކު ރައީސް ޔާމީންގެ ފަހަތްޕުޅަށް ވަރަށް ގިނަ އިލްމުވެރިން އަރާފައިވާ ކަމަށާއި ދެން ތިއްބެވި ބޭފުޅުން ވެސް އުސޫލުން އަމަލުކުރައްވަން ޝަހީމް އެދިވަޑައިގަތެވެ.
